நாங்குநேரி வேத பாடசாலையில் பயங்கரம்: மாணவர்களுக்கு பாலியல் துன்புறுத்தல் அளித்த ஆசிரியர் போக்சோ சட்டத்தில் கைது

திருநெல்வேலி மாவட்டம் நாங்குநேரியில் வேத பாடசாலையில் பயின்ற மாணவர்களுக்கு பாலியல் துன்புறுத்தல் அளித்த ஆசிரியர் போக்சோ சட்டத்தின் கீழ் கைது செய்யப்பட்டுள்ளார்.

திருநெல்வேலி மாவட்டம் நாங்குநேரி பகுதியில் இயங்கி வரும் வேத பாடசாலை ஒன்றில், அங்கு பயின்று வந்த சிறுவர்களுக்கு பாலியல் துன்புறுத்தல் அளித்த விவகாரம் பெரும் அதிர்ச்சியை ஏற்படுத்தியுள்ளது. பீகாரைச் சேர்ந்த துர்கேஷ் திவாரி என்ற 24 வயது நபர், இந்த பாடசாலையில் ஆசிரியராகப் பணிபுரிந்து வந்தார். இவர் அங்கிருந்த 7 முதல் 12 வயதுக்குட்பட்ட மாணவர்களைத் தொடர்ச்சியாகப் பாலியல் துன்புறுத்தலுக்கு உள்ளாக்கியதாகக் குற்றம் சாட்டப்பட்டுள்ளது. ஒரு சிறுவனின் பெற்றோர் அளித்த புகாரின் பேரில், காவல்துறையினர் தீவிர விசாரணை நடத்தி அந்த ஆசிரியரைக் கைது செய்துள்ளனர்.

இந்த வழக்கில் பாதிக்கப்பட்ட 10 வயது சிறுவன் ஒருவன், பாடசாலை அமைந்துள்ள கட்டிடத்தின் உரிமையாளரிடம் நடந்த கொடுமைகளைப் பற்றித் தெரிவித்துள்ளான். இதனையடுத்து, கட்டிட உரிமையாளர் சிறுவனின் பெற்றோர்களுக்குத் தகவல் தெரிவிக்க, அவர்கள் உடனடியாக திருநெல்வேலிக்கு விரைந்து வந்து காவல்துறையில் புகார் அளித்தனர். இதன்பேரில் துர்கேஷ் திவாரி மீது போக்சோ சட்டத்தின் கீழ் பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. கல்வி நிறுவனத்தில் அதிகாரம் மிக்க நிலையில் இருந்த ஒருவர், சிறுவர்களுக்கு எதிராக இத்தகைய கொடூரமான செயலில் ஈடுபட்டது அப்பகுதியில் பெரும் பரபரப்பை ஏற்படுத்தியுள்ளது.

இது குறித்து காவல்துறை தரப்பில் கூறுகையில், குற்றஞ்சாட்டப்பட்ட திவாரி, 2024-ம் ஆண்டு மாமல்லபுரத்தில் இருந்த பாடசாலையிலிருந்து இங்கு அழைத்து வரப்பட்டவர் என்றும், அவருடன் பீகாரைச் சேர்ந்த இரு குழந்தைகள் வந்தனர் என்றும் தெரியவந்துள்ளது. அங்கிருந்த பீகார் மாநிலத்தைச் சேர்ந்த ஒன்பது குழந்தைகளில் எட்டு பேர், பல்வேறு காலக்கட்டங்களில் இரவு நேரங்களில் இந்த ஆசிரியரால் பாலியல் துன்புறுத்தலுக்கு உள்ளாக்கப்பட்டது முதற்கட்ட விசாரணையில் கண்டறியப்பட்டுள்ளது. தற்பொழுது அனைத்து மாணவர்களின் பெற்றோர்களையும் நேரில் வரவழைத்து விசாரணை நடத்த காவல்துறையினர் அறிவுறுத்தியுள்ளனர்.

பாதிக்கப்பட்ட சிறுவர்களுக்குத் தேவையான மருத்துவ சிகிச்சைகளும், ஆலோசனைகளும் முறையாக வழங்கப்பட்டு வருகின்றன. மாவட்ட குழந்தைகள் பாதுகாப்பு அலுவலக அதிகாரிகள் மற்றும் காவல்துறை இணைந்து, பாதிக்கப்பட்ட மாணவர்களைப் பாதுகாப்பான இடத்திற்கு மாற்றும் பணிகளில் ஈடுபட்டுள்ளனர். குற்றஞ்சாட்டப்பட்ட துர்கேஷ் திவாரி, நாங்குநேரி நீதித்துறை நடுவர் நீதிமன்றத்தில் ஆஜர்படுத்தப்பட்டு, பின்னர் சிறையில் அடைக்கப்பட்டார். இந்தச் சம்பவம் வேத பாடசாலைகளில் தங்கிப் பயிலும் குழந்தைகளின் பாதுகாப்பு குறித்த கேள்விகளை எழுப்பியுள்ள நிலையில், விரிவான விசாரணை தொடர்ந்து நடைபெற்று வருகிறது.