தமிழ்நாட்டின் உள்கட்டமைப்பை அச்சுறுத்தும் இயற்கை பேரிடர்கள்: 6,000 கோடி ரூபாய் இழப்பு ஏற்பட வாய்ப்பு என ஆய்வு தகவல்

தமிழ்நாட்டில் ஏற்படும் ஒரு பெரும் இயற்கை பேரிடர் சுமார் 6,000 கோடி ரூபாய் பொருளாதார இழப்பை ஏற்படுத்தும் என சிடிஆர்ஐ எச்சரித்துள்ளது.

தமிழ்நாட்டில் முன்னெப்போதும் இல்லாத வகையில் இயற்கை பேரிடர்கள் மற்றும் காலநில மாற்றங்கள் பொருளாதார ரீதியாக பெரும் தாக்கத்தை ஏற்படுத்தக்கூடும் என்று புதிய ஆய்வு ஒன்று எச்சரித்துள்ளது. பேரிடர் மீள் திறன் உள்கட்டமைப்புக்கான கூட்டணி (CDRI) வெளியிட்டுள்ள அறிக்கையின்படி, மாநிலத்தில் ஏற்படும் ஒரு தீவிரமான வானிலை நிகழ்வு அல்லது இயற்கை பேரிடர் சுமார் 620 மில்லியன் அமெரிக்க டாலர்கள், அதாவது இந்திய மதிப்பில் சுமார் 6,000 கோடி ரூபாய் வரையிலான பொருளாதார இழப்பை ஏற்படுத்தும் என்று மதிப்பிடப்பட்டுள்ளது. இந்த பாதிப்பு உள்கட்டமைப்புகளை மீண்டும் கட்டமைப்பதற்கான செலவுகளை விட அதிகமாக இருக்கலாம் என்பது குறிப்பிடத்தக்கது.

இந்த அறிக்கை 2015-ம் ஆண்டு சென்னையில் ஏற்பட்ட பெரும் வெள்ள பாதிப்புகளுடன் தற்போதைய சூழலை ஒப்பிடுகிறது. ஒவ்வொரு 50 ஆண்டுகளுக்கும் ஒருமுறை ஏற்படக்கூடிய தீவிரமான வெள்ள பாதிப்பு ஏற்பட்டால், மாநிலத்தின் பொது நிதி மற்றும் உள்கட்டமைப்பு சேவைகள் கடுமையான அழுத்தத்திற்கு உள்ளாகும் என்று ஆய்வு சுட்டிக்காட்டுகிறது. வடகிழக்கு பருவமழை தொடங்கவுள்ள நிலையில், எல் நினோ (El Nino) தாக்கத்தினால் ஏற்படக்கூடிய தீவிர வானிலை மாற்றங்கள் குறித்து இந்த அறிக்கை முன்னெச்சரிக்கை விடுத்துள்ளது. குறிப்பாக ஆற்றல் துறையில் ஆண்டுக்கு சுமார் 84.3 மில்லியன் டாலர்களும், சாலைகள் மற்றும் பாலங்கள் கட்டமைப்பில் 24.5 மில்லியன் டாலர்களும் சராசரி இழப்பு ஏற்படுவதாக அந்த அறிக்கையில் குறிப்பிடப்பட்டுள்ளது.

கடந்த காலங்களில் வீசிய தானே புயல், 2015-ம் ஆண்டு வெள்ளம் மற்றும் கஜா புயல் போன்ற இயற்கை பேரிடர்கள் மாநிலத்தின் மின்சார உள்கட்டமைப்பை கடுமையாகச் சேதப்படுத்தியதை வரலாறு சான்றாகக் கொண்டுள்ளது. 2015 வெள்ளத்தின் போது சுமார் 40 லட்சம் மக்கள் பாதிக்கப்பட்டதோடு, 1.16 லட்சத்திற்கும் அதிகமான வீடுகள் சேதமடைந்தன. மொத்தமாக சுமார் 14,602 கோடி ரூபாய் அளவிற்கு இழப்பு ஏற்பட்டதாக மதிப்பீடுகள் தெரிவிக்கின்றன. இதுபோன்ற பேரிடர் காலங்களில் மாநிலத்தின் பொதுச் செலவினங்கள் அதிகரிப்பதும், நிவாரணப் பணிகளுக்காக கூடுதல் நிதி ஒதுக்க வேண்டிய கட்டாயமும் அரசுக்கு ஏற்படுகிறது.

சிடிஆர்ஐ அமைப்பின் தலைமை இயக்குநர் அமித் ப்ரோதி, தமிழ்நாடு அரசு தனது நிதித் திட்டமிடலில் பேரிடர் மேலாண்மையை ஒரு ஒருங்கிணைந்த பகுதியாக மாற்ற வேண்டும் என்று வலியுறுத்தியுள்ளார். உள்கட்டமைப்பு வடிவமைப்பு தரங்களை மேம்படுத்துதல், மின் கட்டமைப்பு மற்றும் சாலைகளை முறையாகப் பராமரித்தல், பேரிடர் இழப்புகளை ஆவணப்படுத்தும் டிஜிட்டல் தரவுத்தளத்தை உருவாக்குதல் போன்ற முன்னெச்சரிக்கை நடவடிக்கைகளை மேற்கொள்ள வேண்டும் என்று அவர் பரிந்துரைக்கிறார். பேரிடருக்குப் பிறகு செலவு செய்வதைக் காட்டிலும், பேரிடர் தயார்நிலை மற்றும் உள்கட்டமைப்பு வலிமைக்கு முன்னுரிமை அளிப்பதே எதிர்கால பொருளாதார பாதுகாப்பிற்கு சிறந்த வழியாகும்.