தொடரும் காயம்: ஆசிய விளையாட்டுப் போட்டியிலிருந்து விலகினார் நீரஜ் சோப்ரா

கணுக்கால் காயத்தால் ஜப்பான் ஆசிய விளையாட்டுப் போட்டியில் பங்கேற்கப்போவதில்லை என ஈட்டி எறிதல் வீரர் நீரஜ் சோப்ரா அறிவித்துள்ளார்.

இந்திய ஈட்டி எறிதல் நட்சத்திரமும், இருமுறை ஒலிம்பிக் பதக்கம் வென்றவருமான நீரஜ் சோப்ரா, எதிர்பாராதவிதமாக இந்த பருவத்தின் எஞ்சிய போட்டிகளிலிருந்து விலகுவதாக அறிவித்துள்ளார். பயிற்சியின் போது அவரது கணுக்காலில் தசைநார் கிழிவு (Ligament tear) ஏற்பட்டிருப்பது கண்டறியப்பட்டுள்ளது. இதன் காரணமாக, அடுத்த மாதம் ஜப்பானில் நடைபெறவிருக்கும் ஆசிய விளையாட்டுப் போட்டியில் அவர் கலந்துகொள்ள மாட்டார் என்பது உறுதியாகியுள்ளது. இந்த அறிவிப்பு இந்திய விளையாட்டு ரசிகர்கள் மற்றும் அவரது ஆதரவாளர்களிடையே பெரும் ஏமாற்றத்தை ஏற்படுத்தியுள்ளது.

தனது சமூக வலைதளப் பக்கத்தில் இது குறித்து உருக்கமாகப் பதிவிட்டுள்ள நீரஜ் சோப்ரா, சமீபத்திய லாசேன் டயமண்ட் லீக் தொடரில் 88.05 மீட்டர் தூரம் ஈட்டி எறிந்து தனது இந்த பருவத்தின் சிறந்த திறனை வெளிப்படுத்தியிருந்ததாகவும், மீண்டும் நல்ல பார்முக்குத் திரும்பியிருந்த வேளையில் இந்த காயம் ஏற்பட்டிருப்பது துரதிர்ஷ்டவசமானது என்றும் குறிப்பிட்டுள்ளார். விளையாட்டில் ஏற்றத்தாழ்வுகளும் காயங்களும் பயணத்தின் ஒரு பகுதிதான் என்பதை ஏற்றுக்கொண்டுள்ள அவர், தற்போது முழுமையான ஓய்வில் கவனம் செலுத்தவுள்ளார்.

கடந்த ஆண்டு டோக்கியோ உலக சாம்பியன்ஷிப் போட்டிகளுக்குப் பிறகு ஏற்பட்ட முதுகுத் தண்டு காயம் காரணமாக இந்த பருவத்தின் தொடக்கப் பகுதியில் நீரஜ் சோப்ரா பங்கேற்கவில்லை. அதன்பிறகு கத்தாரில் நடைபெற்ற டயமண்ட் லீக் மூலம் மீண்டும் களமிறங்கிய அவர், ஜூலை மாதம் கிளாஸ்கோவில் நடைபெற்ற காமன்வெல்த் போட்டிகளில் வெள்ளிப் பதக்கத்தை வென்றார். சீராக முன்னேற்றம் கண்டு வந்த வேளையில், மீண்டும் ஒரு காயம் அவரது விளையாட்டுப் பயணத்திற்கு தடையாக அமைந்திருப்பது கவலைக்குரியதாகப் பார்க்கப்படுகிறது.

நீரஜ் சோப்ரா விலகியதைத் தொடர்ந்து, ஆசிய விளையாட்டுப் போட்டியில் ஈட்டி எறிதல் பிரிவில் பதக்கத்திற்கான போட்டி கடுமையாக மாறியுள்ளது. இலங்கை வீரர் ரூமேஷ் பதி்ராஜே மற்றும் இந்தியாவின் ரோஹித் யாதவ் ஆகியோர் பதக்கம் வெல்லும் வாய்ப்புள்ள முக்கிய வீரர்களாகக் கருதப்படுகிறார்கள். மேலும், கிளாஸ்கோ காமன்வெல்த் போட்டியில் வெண்கலப் பதக்கம் வென்ற யஷ் வீர் சிங் மற்றும் பாகிஸ்தான் வீரர் அர்ஷத் நதீம் ஆகியோரும் இந்த போட்டியில் சிறப்பான ஆட்டத்தை வெளிப்படுத்தி பதக்கத்தை வெல்ல முனைப்பு காட்டுவார்கள் என்று எதிர்பார்க்கப்படுகிறது.