நேபாள வெள்ளம்: புனிதப் பயணத்தில் சிக்கிய 37 தமிழர்கள் - மீட்புப் பணிகளை முடுக்கிவிட்ட தமிழ்நாடு அரசு

நேபாளத்தில் ஏற்பட்ட திடீர் வெள்ளம் மற்றும் நிலச்சரிவில் சிக்கியுள்ள 37 தமிழர்களை மீட்கும் பணிகளை தமிழ்நாடு அரசு தீவிரப்படுத்தியுள்ளது.

நேபாளத்தில் ஏற்பட்டுள்ள கடுமையான நிலச்சரிவு மற்றும் திடீர் வெள்ளப்பெருக்கு காரணமாக கைலாச மானசரோவர் புனிதப் பயணத்தில் இருந்த 57 பேர் கொண்ட குழுவைச் சேர்ந்த 37 தமிழர்கள் மாயமாகியுள்ளனர். இந்த குழுவினர் பயணம் செய்த மூன்று பேருந்துகளில் ஒன்று பள்ளத்தில் கவிழ்ந்ததாக தகவல்கள் வெளியாகி பெரும் அதிர்ச்சியை ஏற்படுத்தியுள்ளது. மோசமான வானிலை, தொலைத்தொடர்பு பாதிப்பு மற்றும் கரடுமுரடான நிலப்பரப்பு காரணமாக மீட்புப் பணிகளில் சவால்கள் நீடிக்கின்றன. இதுவரை 20 பயணிகள் பாதுகாப்பாக மீட்கப்பட்டு திமுரே பகுதியில் உள்ள ஆயுதப் படை முகாமில் தங்க வைக்கப்பட்டுள்ளனர்.

தமிழ்நாடு முதலமைச்சர் சி. ஜோசப் விஜய் இந்த விபத்து குறித்து ஆழ்ந்த கவலை தெரிவித்துள்ளார். மத்திய வெளியுறவுத் துறை அமைச்சகம் மற்றும் இந்திய தூதரகத்துடன் இணைந்து மாயமான தமிழர்களை விரைந்து மீட்கவும், பாதிக்கப்பட்டவர்களுக்குத் தேவையான அனைத்து உதவிகளையும் வழங்கவும் அதிகாரிகளுக்கு அவர் உத்தரவிட்டுள்ளார். இதற்காக டெல்லியில் உள்ள தமிழ்நாடு இல்லத்தில் பிரத்யேகக் கட்டுப்பாட்டு அறை திறக்கப்பட்டு, 24 மணி நேரமும் கண்காணிப்புப் பணிகள் மேற்கொள்ளப்பட்டு வருகின்றன. பாதிக்கப்பட்டவர்களின் குடும்பத்தினர் தொடர்பு கொள்ள ஏதுவாக 1800 309 3793 என்ற கட்டணமில்லா தொலைபேசி எண்ணையும், வெளிநாடுகளில் இருந்து அழைப்பதற்கான வசதிகளையும் அரசு அறிவித்துள்ளது.

மாயமான பயணிகள் தமிழகத்தின் பல்வேறு மாவட்டங்களைச் சேர்ந்தவர்கள் ஆவர். கடலூர், தஞ்சாவூர், திருச்சி, மயிலாடுதுறை, சென்னை, கிருஷ்ணகிரி, தருமபுரி மற்றும் புதுச்சேரி உள்ளிட்ட பகுதிகளைச் சேர்ந்தவர்கள் இந்த புனிதப் பயணத்தில் பங்கேற்றுள்ளனர். கும்பகோணத்தைச் சேர்ந்த தனியார் சுற்றுலா நிறுவனம் மூலம் சென்ற இக்குழுவினர், கடந்த ஆகஸ்ட் 23 அன்று சென்னையிலிருந்து டெல்லி சென்று அங்கிருந்து நேபாளம் சென்றனர். பயணம் செய்த பேருந்துகளில் ஒன்று பள்ளத்தில் விழுந்ததை சுற்றுலா நிறுவன ஊழியர் உறுதி செய்துள்ள நிலையில், சிக்கியுள்ளவர்களை மீட்க ஹெலிகாப்டர் வசதிகளும் பயன்படுத்தப்பட்டு வருகின்றன. இருப்பினும் மேகமூட்டமான வானிலை மீட்பு நடவடிக்கைகளுக்குப் பெரும் தடையாக உள்ளது.

மயிலாடுதுறை மாவட்டத்தைச் சேர்ந்த முன்னாள் சென்னை உயர் நீதிமன்ற நீதிபதி சிவஞானம் வீரசாமி உள்ளிட்ட நான்கு பேரைத் தேடும் பணிகள் தீவிரப்படுத்தப்பட்டுள்ளன. இதேபோல் மற்ற மாவட்டங்களைச் சேர்ந்த பயணிகளின் குடும்பத்தினர் தங்கள் உறவினர்களைத் தொடர்புகொள்ள முடியாமல் தவித்து வருகின்றனர். மத்திய அரசுடன் இணைந்து மீட்புப் பணிகளை ஒருங்கிணைக்க தமிழ்நாடு அரசு அனைத்து முயற்சிகளையும் மேற்கொண்டு வருவதாகத் தெரிவித்துள்ளது. மாயமான இந்தியர்கள் மற்றும் தமிழர்களை பத்திரமாக மீட்டு வர வேண்டும் என நாடாளுமன்ற உறுப்பினர் தயாநிதி மாறன் உள்ளிட்ட முக்கியப் பிரமுகர்களும் மத்திய அரசுக்கு வலியுறுத்தல் விடுத்துள்ளனர்.