தமிழகத்தில் ரூ. 6,126 கோடியில் புதிய ரயில்வே திட்டங்கள்: மத்திய அரசு அதிரடி அனுமதி

தமிழகத்தில் ரூ. 6,126 கோடி மதிப்பீட்டில் 3 புதிய ரயில்வே திட்டங்களுக்கு மத்திய அமைச்சரவை ஒப்புதல் அளித்துள்ளது.

பிரதமர் நரேந்திர மோடி தலைமையிலான மத்திய அமைச்சரவைக் குழு, தமிழகத்தின் ரயில்வே கட்டமைப்பை மேம்படுத்தும் நோக்கில் மூன்று முக்கிய திட்டங்களுக்கு அனுமதி வழங்கியுள்ளது. மொத்தம் 383 கிலோமீட்டர் தூரத்தை உள்ளடக்கிய இந்த உள்கட்டமைப்பு பணிகளுக்காக சுமார் 6,126 கோடி ரூபாய் நிதி ஒதுக்கீடு செய்யப்பட்டுள்ளது. இந்த திட்டங்கள் மாநிலத்தின் சரக்கு போக்குவரத்து மற்றும் பயணிகளின் பயண நேரத்தை கணிசமாகக் குறைக்கும் என்று எதிர்பார்க்கப்படுகிறது. இந்தத் தகவலை மத்திய ரயில்வே அமைச்சர் அஷ்வினி வைஷ்ணவ் புது தில்லியில் செய்தியாளர்களிடம் தெரிவித்தார்.

இந்தத் திட்டங்களின் முக்கிய அங்கமாக அரக்கோணம் மற்றும் ரேணிகுண்டா இடையே மூன்றாவது மற்றும் நான்காவது ரயில் பாதை அமைக்கும் பணி மேற்கொள்ளப்பட உள்ளது. 77 கிலோமீட்டர் தூரம் கொண்ட இந்தப் பாதை மும்பை-சென்னை இடையிலான அதிநவீன ரயில் வலைப்பின்னலின் ஒரு பகுதியாகும். சுமார் 1,936 கோடி ரூபாய் செலவில் அமையும் இந்தப் பாதையில் 12 பெரிய பாலங்களும் 221 சிறிய பாலங்களும் கட்டப்பட உள்ளன. இப்பணி அடுத்த மூன்று ஆண்டுகளில் நிறைவடையும் எனத் திட்டமிடப்பட்டுள்ளது. இதன் மூலம் ஆண்டுக்கு 7.21 மில்லியன் டன் சரக்குகளைக் கையாள முடியும் என்பதோடு, ஆண்டுக்கு 110 கோடி ரூபாய் தளவாடச் செலவு மிச்சமாகும் என்று மதிப்பிடப்பட்டுள்ளது.

இதனைத் தொடர்ந்து, 147 கிலோமீட்டர் நீளமுள்ள ஓசூர்-ஓமலூர் இருப்புப்பாதை இரட்டிப்புப் பணிக்கும் மத்திய அரசு ஒப்புதல் அளித்துள்ளது. 1,948 கோடி ரூபாய் மதிப்பீட்டில் செயல்படுத்தப்படும் இந்தத் திட்டத்தில் 20 பெரிய பாலங்களும் 359 சிறிய பாலங்களும் அமைக்கப்பட உள்ளன. இந்தப் பணிகளை நான்கு ஆண்டுகளில் முடிக்கத் திட்டமிடப்பட்டுள்ளது. இந்தப் பாதை தருமபுரி பிராந்தியத்தின் இணைப்பை வலுப்படுத்துவதுடன், கன்னியாகுமரி மற்றும் ராமேஸ்வரம் செல்லும் ரயில்களின் பயண நேரத்தை பெருமளவு குறைக்கும். மேலும், சரக்கு போக்குவரத்தில் ஆண்டுக்கு 8.95 மில்லியன் டன் கூடுதல் திறன் கிடைக்கும் என்றும், இதன் மூலம் 263.13 கோடி ரூபாய் சேமிப்பு ஏற்படும் என்றும் கணிக்கப்பட்டுள்ளது.

மூன்றாவது திட்டமாக, 159 கிலோமீட்டர் நீளமுள்ள சேலம்-கரூர்-திண்டுக்கல் ரயில் பாதையை இரட்டிப்பாக்கும் பணிக்கு 2,242 கோடி ரூபாய் ஒதுக்கீடு செய்யப்பட்டுள்ளது. இப்பணி மூன்று ஆண்டுகளில் முடிக்கப்பட உள்ளது. இதற்காக 18 பெரிய பாலங்களும் 241 சிறிய பாலங்களும் கட்டப்பட உள்ளன. இந்தப் பாதை சேலம் உருக்காலையின் சரக்கு போக்குவரத்துக்கும், தமிழகத்தின் வடமேற்கு பகுதிகளை தூத்துக்குடி மற்றும் காரைக்கால் துறைமுகங்களுடன் இணைப்பதற்கும் பெரிதும் உதவும். இதன் மூலம் சிறு, குறு மற்றும் நடுத்தர தொழில் நிறுவனங்களின் வளர்ச்சிக்குத் தேவையான போக்குவரத்து வசதிகள் மேம்படுத்தப்படும் என்பது குறிப்பிடத்தக்கது.