தமிழ்நாட்டில் புதுப்பிக்கத்தக்க எரிசக்தி திட்டங்களுக்கு இனி ஆன்லைன் முறை: அக்டோபர் 1-ல் புதிய இணையதளம் தொடக்கம்

தமிழ்நாட்டில் புதிய புதுப்பிக்கத்தக்க எரிசக்தி திட்டங்களுக்கான விண்ணப்பங்களை பெற அக்டோபர் 1 முதல் பிரத்யேக இணையதளத்தை TNGECL அறிமுகம் செய்கிறது.

தமிழகத்தில் மின்சாரத் தட்டுப்பாட்டை நிவர்த்தி செய்யவும், புதுப்பிக்கத்தக்க எரிசக்தி உற்பத்தியை அதிகரிக்கவும் தமிழ்நாடு பசுமை எரிசக்தி கழகம் (TNGECL) முக்கிய நடவடிக்கையை முன்னெடுத்துள்ளது. இதன்படி, புதிய சூரியசக்தி மற்றும் காற்றுாலை உள்ளிட்ட புதுப்பிக்கத்தக்க எரிசக்தி திட்டங்களுக்கான விண்ணப்பங்களை ஆன்லைன் மூலம் பெறுவதற்காக பிரத்யேக இணையதளத்தை அக்டோபர் 1-ம் தேதி முதல் அறிமுகப்படுத்த திட்டமிட்டுள்ளது. இந்த புதிய முயற்சி குறித்து முதலீட்டாளர்கள் மற்றும் திட்ட உருவாக்குநர்களுடன் சமீபத்தில் இணையவழி ஆலோசனை கூட்டம் நடைபெற்றது.

இந்த இணையதளத்தில் விண்ணப்பங்கள் சமர்ப்பிக்கப்படும் செயல்முறை 10 நிலைகளைக் கொண்டதாக வடிவமைக்கப்பட்டுள்ளது. முதல் இரண்டு நிலைகளில், விண்ணப்பதாரர்கள் தங்கள் திட்டத்தின் அடிப்படை விவரங்களை அளித்து, அதற்கான கட்டணத்தைச் செலுத்தி, பிணைய வைப்புத்தொகையை (Security Deposit) சமர்ப்பிக்க வேண்டும். இதனைத் தொடர்ந்து, அந்தத் திட்ட முன்மொழிவை கண்காணிப்பு பொறியாளர் (சூரியசக்தி பிரிவு) 10 நாட்களுக்குள் ஆய்வு செய்து சரிபார்ப்பார். விண்ணப்ப செயல்முறையில் ஏதேனும் விளக்கம் தேவைப்பட்டால், அதை 30 நாட்களுக்குள் விண்ணப்பதாரர் சமர்ப்பிக்க வேண்டும். இந்த நிலைகளைத் தொடர்ந்து, திட்டத்தின் சாத்தியக்கூறு அறிக்கை தயாரிக்கப்பட்டு, அடுத்த ஆறு மாதங்களுக்குள் நிலம் தொடர்பான ஆவணங்களைச் சமர்ப்பிக்க அறிவுறுத்தப்படும்.

அனைத்து அனுமதிகளையும் பெற்று, மின் இணைப்பு வசதிகளை உறுதி செய்த பிறகு, கட்டுமானப் பணிகளைத் தொடங்கலாம் என்று அதிகாரிகள் தெரிவித்துள்ளனர். நடப்பு நிதியாண்டின் இறுதிக்குள் குறைந்தபட்சம் 1,500 மெகாவாட் சூரியசக்தி மின் உற்பத்தி திறன் மற்றும் மின்கல ஆற்றல் சேமிப்பு அமைப்புகளை (BESS) நிறுவ தமிழக அரசு இலக்கு நிர்ணயித்துள்ளது. இந்த ஆன்லைன் முறை மூலம் திட்டங்களுக்கான இணைப்பு கோரும் செயல்முறைகள் எளிமையாக்கப்படும் என்று எதிர்பார்க்கப்படுகிறது.

இருப்பினும், இந்த புதிய நடைமுறை குறித்து எரிசக்தி துறை வல்லுநர்கள் சில கேள்விகளை எழுப்பியுள்ளனர். குறிப்பாக, தமிழ்நாடு மின்சார ஒழுங்குமுறை ஆணையம் (TNERC) ஏற்கனவே இதற்கான வழிகாட்டுதல்களை வழங்கியுள்ள நிலையில், இந்த இணையதளம் அதே நடைமுறைகளைப் பின்பற்றுமா அல்லது புதிய வடிவங்களை அறிமுகப்படுத்துமா என்ற சந்தேகம் எழுந்துள்ளது. மேலும், சுற்றுச்சூழல் பாதிப்பு மதிப்பீடு மற்றும் மாசுக்கட்டுப்பாட்டு வாரியத்தின் அனுமதி போன்ற சில நிபந்தனைகள், ஏற்கனவே புதுப்பிக்கத்தக்க எரிசக்தி திட்டங்களுக்கு விலக்களிக்கப்பட்டவை என்பதால், இந்த புதிய இணையதளத்தில் இடம்பெற்றுள்ள விதிகள் குறித்து மறுபரிசீலனை செய்யப்பட வேண்டும் என்று ஆர்வலர்கள் கோரிக்கை விடுத்துள்ளனர்.