பெரம்பலூர்: சிறுமியுடன் பழகிய கல்லூரி மாணவர் கொடூர கொலை - தந்தை கைது

பெரம்பலூர் அருகே சிறுமியை காதலித்த கல்லூரி மாணவனை, பெண்ணின் தந்தை இரும்பு கம்பியால் தாக்கி கத்தியால் குத்திக் கொலை செய்த சம்பவம் அதிர்ச்சியை ஏற்படுத்தியுள்ளது.

பெரம்பலூர் மாவட்டம் வேப்பந்தட்டை வட்டம் வெண்பாவூர் கிராமத்தில், 21 வயது கல்லூரி மாணவர் ஒருவர் கத்தியால் குத்திக் கொல்லப்பட்ட சம்பவம் அப்பகுதி மக்களிடையே பெரும் பரபரப்பை ஏற்படுத்தியுள்ளது. உயிரிழந்த இளைஞர் எஸ். அபிமன்யு என அடையாளம் காணப்பட்டுள்ளார். இவர் பெரம்பலூரில் உள்ள ஒரு தனியார் கல்லூரியில் முதுநிலை கணினி பயன்பாட்டுத் துறையில் (MCA) இரண்டாம் ஆண்டு பயின்று வந்தார்.

இந்தக் கொடூரச் சம்பவத்திற்குப் பின்னணியில் காதல் விவகாரம் இருப்பது காவல்துறையின் விசாரணையில் தெரியவந்துள்ளது. அபிமன்யு அப்பகுதியைச் சேர்ந்த 12 வயது சிறுமி ஒருவருடன் நட்பாகப் பழகி வந்துள்ளார். இது தொடர்பாகச் சிறுமிக்கு அவர் அண்மையில் அலைபேசி ஒன்றையும் வாங்கிக் கொடுத்து, அவருடன் தொடர்ந்து பேசி வந்ததாகக் கூறப்படுகிறது. இந்தத் தகவல் சிறுமியின் வீட்டிற்குத் தெரியவந்ததையடுத்து, இரு குடும்பத்தினருக்கும் இடையே மோதல் உருவாகும் சூழல் ஏற்பட்டது.

சம்பவம் நடந்த ஞாயிற்றுக்கிழமை இரவு, சிறுமியின் தந்தை ஆத்திரமடைந்த நிலையில் அபிமன்யுவின் வீட்டிற்குச் சென்றுள்ளார். அங்கு வைத்து இரும்பு கம்பியால் அபிமன்யுவைத் தாக்கிய அவர், தான் மறைத்து வைத்திருந்த கத்தியால் அவரைத் சரமாரியாகக் குத்திக் கொலை செய்துள்ளார். தாக்குதல் மிகக் கடுமையானதாக இருந்ததால், அபிமன்யு சம்பவ இடத்திலேயே துடிதுடித்து உயிரிழந்தார்.

தகவலறிந்த கைக்கலாத்தூர் காவல்துறையினர் உடனடியாக சம்பவ இடத்திற்கு விரைந்து வந்து, உயிரிழந்த அபிமன்யுவின் உடலை மீட்டு பிரேதப் பரிசோதனைக்காக மகாத்மா காந்தி நினைவு அரசு மருத்துவமனைக்கு அனுப்பி வைத்தனர். இந்தச் சம்பவம் தொடர்பாக வழக்குப்பதிவு செய்த காவல்துறையினர், கொலையில் ஈடுபட்ட சிறுமியின் தந்தையைக் கைது செய்துள்ளனர். தற்போது இச்சம்பவம் குறித்து காவல்துறையினர் தீவிர விசாரணை நடத்தி வருகின்றனர்.