புதுச்சேரியில் கடை மீது பெட்ரோல் குண்டு வீச்சு: மிரட்டல் விடுத்த ரவுடி கைது

புதுச்சேரி வில்லியனூர் பகுதியில் கடை உரிமையாளரிடம் மாமூல் கேட்டு பெட்ரோல் குண்டு வீசிய ரவுடி கைது செய்யப்பட்டார்.

புதுச்சேரி மாநிலம் வில்லியனூர் மார்க்கெட் வீதியில் இயங்கி வரும் பாபு டிரேடர்ஸ் என்ற அரிசி கடையின் மீது அடையாளம் தெரியாத மர்ம நபர் ஒருவர் பெட்ரோல் குண்டுகளை வீசி தாக்குதல் நடத்திய சம்பவம் பெரும் பரபரப்பை ஏற்படுத்தியுள்ளது. இந்த தாக்குதல் சம்பவத்தில் தொடர்புடைய 25 வயதான வினோத் என்பவரை வில்லியனூர் காவல்துறையினர் அதிரடியாகக் கைது செய்துள்ளனர். வில்லியனூர் பகுதியைச் சேர்ந்த வினோத், ஏற்கனவே பல்வேறு குற்ற வழக்குகளில் தொடர்புடையவர் என்று விசாரணையில் தெரியவந்துள்ளது.

சம்பவத்தன்று மாலை சுமார் 6:30 மணியளவில் கடை உரிமையாளரான பாபு என்பவரைச் சந்தித்த வினோத், அவரிடம் மாமூல் கேட்டு மிரட்டியுள்ளார். அத்துடன் அப்பகுதியில் உள்ள மற்ற வியாபாரிகளிடமும் பணத்தைப் பெற்றுத் தருமாறு பாபுவை கட்டாயப்படுத்தியுள்ளார். இதற்கு உரிமையாளர் கடும் எதிர்ப்பு தெரிவித்த நிலையில், இரவு 8:30 மணியளவில் மீண்டும் கடைக்குத் திரும்பிய வினோத், கையில் மறைத்து வைத்திருந்த பெட்ரோல் நிரப்பப்பட்ட மூன்று பீர் பாட்டில்களைக் கொண்டு தாக்குதல் நடத்தினார். இதனால் கடையில் தீப்பற்றி அரிசி மற்றும் பொருட்கள் சேதமடைந்தன.

இந்த தாக்குதலின் போது பாபு மற்றும் அவரது மனைவி திரிபுரசுந்தரி கடையினுள் இருந்த நிலையில், அதிர்ஷ்டவசமாக அவர்கள் எவ்வித காயங்களுமின்றி உயிர் தப்பினர். இருப்பினும், பெட்ரோல் குண்டு வீசப்பட்ட சத்தத்தாலும் தீப்பிடித்ததாலும் அப்பகுதியில் பெரும் பதற்றம் நிலவியது. இது குறித்த தகவலின் பேரில் வில்லியனூர் காவல் ஆய்வாளர் கலைச்செல்வன், காவல் கண்காணிப்பாளர் சுப்பிரமணியன் மற்றும் காவல்துறையினர் சம்பவ இடத்திற்கு விரைந்து வந்து விசாரணையை மேற்கொண்டனர். தடயங்கள் சேகரிக்கப்பட்டு விசாரணை தீவிரப்படுத்தப்பட்டது.

கைது செய்யப்பட்ட வினோத் மீது பாரதிய நியாய சன்ஹிதா சட்டத்தின் கீழ் கொலை முயற்சி, அச்சுறுத்தல், சொத்து சேதம் மற்றும் வெடிபொருள் தடுப்புச் சட்டம் உள்ளிட்ட பல்வேறு பிரிவுகளின் கீழ் வழக்குகள் பதிவு செய்யப்பட்டுள்ளன. வினோத் ஏற்கனவே கஞ்சா விற்பனை, தாக்குதல் மற்றும் மாமூல் வசூலித்தல் போன்ற 15-க்கும் மேற்பட்ட குற்ற வழக்குகளில் சம்பந்தப்பட்டிருப்பதாகவும், சமீபத்தில் தான் பிணையில் வெளிவந்தவர் என்றும் காவல்துறை தரப்பில் தெரிவிக்கப்பட்டுள்ளது. வில்லியனூர் பகுதியில் அதிகரித்து வரும் இத்தகைய குற்றச் செயல்களைத் தடுக்க வேண்டும் என்றும், போதைப்பொருள் புழக்கத்தை ஒழிக்க வேண்டும் என்றும் உள்ளூர் வியாபாரிகளும் பொதுமக்களும் அரசுக்கு கோரிக்கை விடுத்துள்ளனர்.