பொன்முடி மற்றும் அவரது மகன் மீதான அமலாக்கத்துறை வழக்கு ரத்து - சென்னை உயர்நீதிமன்றம் அதிரடி

முன்னாள் அமைச்சர் பொன்முடி மற்றும் அவரது மகன் மீதான பணமோசடி வழக்கை ரத்து செய்து சென்னை உயர்நீதிமன்றம் உத்தரவிட்டுள்ளது.

சென்னை உயர்நீதிமன்றத்தில் நடைபெற்ற முக்கிய வழக்கொன்றில், முன்னாள் அமைச்சரும் திமுக மூத்த தலைவருமான பொன்முடி மற்றும் அவரது மகன் கௌதம சிகாமணி ஆகியோர் மீதான பணமோசடி வழக்கை ரத்து செய்து நீதிமன்றம் உத்தரவிட்டுள்ளது. அமலாக்கத்துறை பதிவு செய்திருந்த இந்த வழக்கை எதிர்த்து தொடரப்பட்ட மனுவை, தலைமை நீதிபதி சுஷ்ருத் அரவிந்த் தர்மாதிஹாரி மற்றும் நீதிபதி ஜி. அருள்முருகன் ஆகியோர் அடங்கிய முதல் அமர்வு விசாரித்து இந்த அதிரடி தீர்ப்பை வழங்கியுள்ளது.

இந்த வழக்கு தொடர்பாக பொன்முடி மற்றும் அவரது தரப்பினர் நீதிமன்றத்தில் சமர்ப்பித்த மனுவில், இந்த வழக்கிற்கான அடிப்படை குற்றச்சாட்டு வழக்கில் இருந்து தாங்கள் ஏற்கனவே விடுவிக்கப்பட்டு விட்டதாக சுட்டிக்காட்டியிருந்தனர். விழுப்புரம் சிறப்பு நீதிமன்றம், இந்த விவகாரம் தொடர்பான அனைத்து குற்றச்சாட்டுகளிலிருந்தும் தங்களை முழுமையாக விடுவித்ததை ஆதாரமாக அவர்கள் முன்வைத்தனர். அடிப்படை வழக்கிலேயே குற்றச்சாட்டுகள் நிரூபிக்கப்படாத சூழலில், அதன் அடிப்படையில் பதியப்பட்ட பணமோசடி வழக்கு செல்லாது என்ற வாதத்தை ஏற்றுக்கொண்ட நீதிமன்றம், வழக்கை ரத்து செய்து உத்தரவிட்டது.

கடந்த 2007 முதல் 2011 ஆம் ஆண்டு வரையிலான காலகட்டத்தில் பொன்முடி சுரங்கங்கள் மற்றும் கனிமவளத்துறை அமைச்சராக இருந்தபோது, விதிமுறைகளை மீறி செம்மண் குவாரி உரிமம் வழங்கியதாக விழுப்புரம் மாவட்ட குற்றப்பிரிவு காவல்துறையினர் வழக்குப்பதிவு செய்திருந்தனர். அனுமதிக்கப்பட்ட அளவை விட கூடுதலாக செம்மண் எடுத்ததன் மூலம் அரசு கருவூலத்திற்கு சுமார் 28.37 கோடி ரூபாய் இழப்பு ஏற்படுத்தியதாக அவர் மீது குற்றம் சாட்டப்பட்டிருந்தது. இந்த வழக்கின் அடிப்படையில் தான் அமலாக்கத்துறை பணமோசடி சட்டத்தின் கீழ் வழக்கை பதிவு செய்தது என்பது குறிப்பிடத்தக்கது.

இதற்கிடையில், மற்றொரு முக்கிய வழக்காக, 2026 ஆம் ஆண்டு நடைபெற்ற சட்டமன்றத் தேர்தலில் மைலம் தொகுதியில் வெற்றி பெற்ற அதிமுக முன்னாள் அமைச்சர் சி.வி. சண்முகத்தின் வெற்றியை எதிர்த்து தாக்கல் செய்யப்பட்ட மனுவையும் சென்னை உயர்நீதிமன்றம் தள்ளுபடி செய்தது. வாக்காளர் ஒருவரால் தொடரப்பட்ட இந்த தேர்தல் மனுவை எதிர்த்து சி.வி. சண்முகம் தரப்பில் தாக்கல் செய்த மனுவை விசாரித்த நீதிபதி ஜி.கே. இளந்திரையன், தேர்தல் மனுவை நிராகரித்து உத்தரவிட்டார். மைலம் தொகுதியில் சி.வி. சண்முகம் 30,041 வாக்குகள் வித்தியாசத்தில் வெற்றி பெற்றிருந்தார் என்பது குறிப்பிடத்தக்கது.