கிராண்ட் செஸ் டூர்: சாம்பியன் பட்டம் வென்று வரலாறு படைத்த பிரக்ஞானந்தா!

கிராண்ட் செஸ் டூர் தொடரில் சாம்பியன் பட்டம் வென்ற முதல் இந்தியர் என்ற வரலாற்றுச் சாதனையை பிரக்ஞானந்தா படைத்துள்ளார்.

இந்தியாவின் இளம் கிராண்ட் மாஸ்டர் ஆர். பிரக்ஞானந்தா உலக அளவிலான செஸ் போட்டிகளில் புதிய மைல்கல்லை எட்டியுள்ளார். அமெரிக்காவின் செயின்ட் லூயிஸ் நகரில் நடைபெற்ற மதிப்புமிக்க கிராண்ட் செஸ் டூர் (GCT) தொடரின் இறுதிப்போட்டியில், நடப்பு சாம்பியனான பேபியானோ காருணாவை வீழ்த்தி பிரக்ஞானந்தா வரலாற்று வெற்றியைப் பதிவு செய்துள்ளார். இந்த வெற்றியின் மூலம் கிராண்ட் செஸ் டூர் தொடரை வெல்லும் முதல் இந்திய வீரர் என்ற பெருமையை அவர் பெற்றுள்ளார்.

போட்டியின் இறுதிநாளின் தொடக்கத்தில் பிரக்ஞானந்தா, காருணாவை விட ஆறு புள்ளிகள் பின்தங்கிய நிலையில் இருந்தார். கிளாசிக்கல் ஆட்டங்களின் முடிவில் 3-9 என்ற புள்ளி கணக்கில் பின்தங்கியிருந்த போதிலும், விடாமுயற்சியுடன் செயல்பட்ட பிரக்ஞானந்தா ராபிட் பிரிவில் அபாரமான ஆட்டத்தை வெளிப்படுத்தினார். தொடர்ந்து இரண்டு ராபிட் ஆட்டங்களிலும் வெற்றி பெற்று, காருணாவுடனான புள்ளிகள் வித்தியாசத்தை மிக வேகமாக ஈடுசெய்து முன்னிலை பெற்றார்.

அதன்பிறகு நடைபெற்ற நான்கு பிளிட்ஸ் ஆட்டங்களில், மிகுந்த மன உறுதியுடன் விளையாடிய பிரக்ஞானந்தா, எதிராளியின் கடுமையான அழுத்தத்திற்கு மத்தியிலும் துணிச்சலுடன் செயல்பட்டார். இறுதியில் 15-13 என்ற புள்ளி கணக்கில் வெற்றியை உறுதி செய்த அவர், இந்த ஆண்டிற்கான கிராண்ட் செஸ் டூர் கிரீடத்தைத் தனதாக்கிக் கொண்டார். இந்த வெற்றியின் மூலம் அவருக்கு 2 லட்சம் அமெரிக்க டாலர்கள், அதாவது இந்திய மதிப்பில் சுமார் 1.67 கோடி ரூபாய் பரிசுத்தொகையாக வழங்கப்பட்டது. மேலும், அடுத்த ஆண்டு நடைபெறவுள்ள கிராண்ட் செஸ் டூர் தொடருக்கு அவர் தானாகவே தகுதி பெற்றுள்ளார்.

21 வயதான பிரக்ஞானந்தாவின் இந்த வெற்றி, அவரது விளையாட்டுத் திறமைக்குச் சான்றாக அமைந்துள்ளது. சர்வதேச செஸ் அரங்கில் வளர்ந்து வரும் இளம் வீரர்களில் ஒருவராகத் திகழும் அவர், இந்த ஆண்டில் ஏற்கனவே பல சாதனைகளைப் படைத்துள்ளார். செயின்ட் லூயிஸில் நடைபெற்ற இந்தப் போட்டியில், பெரும் புள்ளி வித்தியாசத்தைக் கடந்து அவர் பெற்றுள்ள இந்த வெற்றி, அவரது தொழில்முறை வாழ்க்கையில் மிகவும் மறக்க முடியாத ஒரு சாதனையாகப் பார்க்கப்படுகிறது.