திருவள்ளூர் அருகே கடன் தொல்லை: கந்துவட்டி கொடுமையால் தனியார் நிறுவன ஊழியர் தற்கொலை

திருவள்ளூர் அருகே கடன் கொடுத்தவரின் நெருக்கடியால் தனியார் நிறுவன ஊழியர் ஒருவர் தற்கொலை செய்துகொண்ட சம்பவம் சோகத்தை ஏற்படுத்தியுள்ளது.

திருவள்ளூர் அருகே உள்ள ஈக்காடு பகுதியைச் சேர்ந்தவர் 45 வயதான சத்தியமூர்த்தி. இவர் மின்சூரில் உள்ள ஒரு தனியார் நிறுவனத்தில் பணியாற்றி வந்தார். சத்தியமூர்த்தி தனது மனைவி மகேஸ்வரியுடன் வசித்து வந்த நிலையில், அவர்களுக்கு குழந்தைகள் இல்லை. இத்தகைய சூழலில், கடந்த செவ்வாய்க்கிழமை இரவு சத்தியமூர்த்தி வீட்டில் யாரும் இல்லாத நேரத்தில் தற்கொலை செய்துகொண்டார். அருகில் உள்ள கடைக்குச் சென்றுவிட்டு வீடு திரும்பிய அவரது மனைவி மகேஸ்வரி, கணவர் மயக்க நிலையில் இருப்பதை கண்டு அதிர்ச்சியடைந்தார். அக்கம் பக்கத்தினர் உதவியுடன் அவரை மீட்டு உடனடியாக அருகிலுள்ள மருத்துவமனைக்கு கொண்டு சென்றனர். அங்கு அவரை பரிசோதித்த மருத்துவர்கள் சத்தியமூர்த்தி ஏற்கனவே உயிரிழந்துவிட்டதாக தெரிவித்தனர்.

இந்த சம்பவம் தொடர்பாக மகேஸ்வரி புல்லரம்பாக்கம் காவல் நிலையத்தில் புகார் அளித்துள்ளார். அந்தப் புகாரில் அவர் குறிப்பிட்டுள்ள தகவலின்படி, சத்தியமூர்த்தி புங்கத்தூரைச் சேர்ந்த ஒரு நபரிடம் 50 ஆயிரம் ரூபாய் கடன் வாங்கியிருந்ததாகத் தெரிகிறது. அதற்கு அவர் தொடர்ந்து வட்டி செலுத்தி வந்த போதிலும், கடன் கொடுத்த நபர் முழுத் தொகையையும் உடனடியாக திருப்பித் தர வேண்டும் என்று வற்புறுத்தி, சத்தியமூர்த்தியின் இருசக்கர வாகனத்தைப் பறித்துச் சென்றதாகக் கூறப்படுகிறது. இந்தச் சம்பவத்தால் சத்தியமூர்த்தி மிகுந்த மன உளைச்சலுக்கு ஆளாகியிருந்ததாக அவரது மனைவி தெரிவித்துள்ளார்.

மேலும், சத்தியமூர்த்தி வள்ளுவபுரத்தைச் சேர்ந்த ஒருவரிடம் சீட்டுப் பணம் கட்டியிருந்ததாகவும், அந்தப் பணத்தை அவர் திருப்பித் தராததால் அது குறித்து சத்தியமூர்த்தி கேள்வி எழுப்பியதாகவும் கூறப்படுகிறது. பணத்தை திரும்பக் கேட்டதற்காக, கடன் கொடுத்த நபரும், சீட்டு நிறுவன உரிமையாளரும் சேர்ந்து பெரியம்பாக்கத்தைச் சேர்ந்த ஒரு நபர் மூலம் சத்தியமூர்த்திக்கு கொலை மிரட்டல் விடுத்ததாக மகேஸ்வரி தனது புகாரில் குறிப்பிட்டுள்ளார். இது தொடர்பாக தன்னிடம் உள்ள தொலைபேசி அழைப்புப் பதிவுகள் மற்றும் குரல் பதிவுகளை ஆதாரங்களாகக் காவல் துறையினரிடம் ஒப்படைப்பதாக அவர் கூறியுள்ளார்.

தனது கணவரின் இறப்பிற்குக் காரணமான நபர்கள் மீது உரிய நடவடிக்கை எடுக்க வேண்டும் என்று மகேஸ்வரி வலியுறுத்தியுள்ளார். இந்தப் புகாரின் அடிப்படையில் புல்லரம்பாக்கம் காவல்துறையினர் வழக்குப் பதிவு செய்து விசாரணை நடத்தி வருகின்றனர். அனைத்து கோணங்களிலும் விசாரணை மேற்கொள்ளப்பட்டு வருவதாகவும், குற்றவாளிகள் மீது விரைவில் சட்டப்படி நடவடிக்கை எடுக்கப்படும் என்றும் காவல்துறை தரப்பில் தெரிவிக்கப்பட்டுள்ளது. தற்கொலை எண்ணங்களை எதிர்கொள்ள தமிழக அரசின் 104 உதவி எண் மற்றும் சிநேகா தற்கொலை தடுப்பு உதவி மையத்தின் 044-24640050 ஆகிய எண்களைத் தொடர்பு கொள்ளலாம்.