தமிழக அரசு பணிகளுக்கான தேர்வுகளை நடத்த தனியார் நிறுவனங்கள் தேர்வு: டி.என்.இ.ஜி.ஏ புதிய அறிவிப்பு

தமிழக அரசு துறைகளில் பணியாளர் தேர்வுகளை ஆன்லைன் முறையில் நடத்த தனியார் நிறுவனங்களை ஈடுபடுத்த தமிழ்நாடு மின் ஆளுமை முகமை நடவடிக்கை எடுத்துள்ளது.

தமிழ்நாடு அரசுத் துறைகளில் காலியாக உள்ள பணியிடங்களை நிரப்புவதற்கான தேர்வுகளை நடத்துவதில் புதிய மாற்றங்களை அரசு கொண்டு வர உள்ளது. இதற்காக ஆன்லைன் முறையிலான தேர்வு மற்றும் ஆட்சேர்ப்பு நடைமுறைகளை மேற்கொள்வதற்குத் தகுதியான தனியார் நிறுவனங்களைப் பட்டியலிட்டுப் பயன்படுத்தத் தமிழக அரசு திட்டமிட்டுள்ளது. டி.என்.பி.எஸ்.சி (TNPSC) தேர்வுகளைத் தவிர, இதர அரசுத் துறைகள் தங்களுக்குத் தேவைப்படும் சமயங்களில் இந்தத் தேர்வு நிறுவனங்களை நேரடியாக அணுகிப் பணிகளை ஒப்படைக்க வழிவகை செய்யப்பட்டுள்ளது.

இந்தத் திட்டத்தைச் செயல்படுத்துவதற்கான முன்னெடுப்புகளைத் தமிழ்நாடு மின் ஆளுமை முகமை (TNeGA) தொடங்கியுள்ளது. பல்வேறு அரசுத் துறைகளின் தேவைக்கேற்ப கணினி வழித் தேர்வுகளை நடத்துவதற்கு அதிக பாதுகாப்பு மற்றும் நவீன தொழில்நுட்ப உள்கட்டமைப்பு வசதிகளைக் கொண்ட நிறுவனங்கள் இதற்காகத் தேர்வு செய்யப்பட உள்ளன. குறிப்பிட்ட கால இடைவெளியில் ஒவ்வொரு முறையும் தேர்வு நிறுவனங்களைத் தேடுவதைத் தவிர்க்க, தகுதியான நிறுவனங்களின் பட்டியலை முன்கூட்டியே தயாரித்து வைப்பது அரசின் இந்த புதிய முயற்சியின் நோக்கமாகும். இதன் மூலம் ஆட்சேர்ப்பு நடவடிக்கைகளை விரைவாக மேற்கொள்ள முடியும் என்று அதிகாரிகள் தெரிவித்துள்ளனர்.

இந்த ஒப்பந்தப்புள்ளிக்கான விதிமுறைகளைத் தமிழ்நாடு மின் ஆளுமை முகமை வெளியிட்டுள்ளது. இதன்படி, தேர்வர்களின் எண்ணிக்கைக்கேற்ப நிறுவனங்களுக்கான தகுதி வரம்புகள் நிர்ணயிக்கப்பட்டுள்ளன. உதாரணமாக, 20,000-க்கும் மேற்பட்ட தேர்வர்கள் பங்கேற்கும் தேர்வுகளை நடத்த, விண்ணப்பிக்கும் நிறுவனம் ஆண்டுக்குக் குறைந்தபட்சம் ரூ. 15 கோடி வருவாய் ஈட்டியிருக்க வேண்டும் மற்றும் ஏற்கனவே இத்தகைய அளவிலான தேர்வுகளை நடத்திய அனுபவம் பெற்றிருக்க வேண்டும். மிகச்சிறிய தேர்வுகளுக்கு (100-க்கும் குறைவான நபர்கள்) ஆண்டு வருவாய் ரூ. 1 கோடி என்ற நிபந்தனை விதிக்கப்பட்டுள்ளது. தேர்வுக்கான விலை ஒரு வருடத்திற்கு நிர்ணயம் செய்யப்படும், மேலும் தேவைப்பட்டால் இந்தப் பட்டியலைத் தொடர்ந்து இரண்டு ஆண்டுகளுக்குப் புதுப்பித்துக்கொள்ளும் வசதியும் வழங்கப்பட்டுள்ளது.

தேர்வு முறைகளில் வெளிப்படைத்தன்மையைப் பேணக் கடுமையான விதிமுறைகளும் கொண்டுவரப்பட்டுள்ளன. வினாத்தாள் கசிவு, தேர்வு முடிவுகளை வெளியிடுவதில் குளறுபடிகள் அல்லது ஏதேனும் முறைகேடுகள் நடைபெற்றால், சம்பந்தப்பட்ட தனியார் நிறுவனத்திற்கு ரூ. 10 லட்சம் வரை அபராதம் விதிக்கப்படும் என எச்சரிக்கப்பட்டுள்ளது. தமிழ்நாடு மின் ஆளுமை முகமை நிறுவனங்களின் பட்டியலை மட்டுமே பராமரிக்கும்; அது தனிப்பட்ட துறைகளுக்குத் தேர்வு நிறுவனங்களை நேரடியாகத் தேர்ந்தெடுக்கவோ, கட்டணம் செலுத்தவோ அல்லது தேர்வு நடத்தவோ போவதில்லை. ஆலோசனைகளை வழங்குவதற்காக அரசுத் துறைகளிடம் இருந்து திட்ட மதிப்பீட்டில் 2% முதல் 2.5% வரை கட்டணமாக வசூலிக்கப்படும். ஆர்வமுள்ள நிறுவனங்கள் அக்டோபர் 15-ஆம் தேதிக்குள் தங்கள் சந்தேகங்களைப் பதிவு செய்யலாம் என்றும், அக்டோபர் 29-ஆம் தேதிக்குள் விண்ணப்பங்களைச் சமர்ப்பிக்க வேண்டும் என்றும் தெரிவிக்கப்பட்டுள்ளது.