தனியார் பள்ளி அங்கீகார முறைகேடு வழக்கு: முன்னாள் அமைச்சர் அன்பில் மகேஷ் தொடர்புடைய இடங்களில் சிசிபி அதிரடி சோதனை

தனியார் பள்ளி அங்கீகார முறைகேடு வழக்கில் முன்னாள் அமைச்சர் அன்பில் மகேஷ் பொய்யாமொழி தொடர்புடைய இடங்களில் சென்னை காவல்துறை அதிரடி சோதனை நடத்தியுள்ளது.

சென்னை மாநகர காவல் துறையின் மத்திய குற்றப்பிரிவு (CCB) போலீசார், பெரும் பரபரப்பை ஏற்படுத்தியுள்ள 100 கோடி ரூபாய் மதிப்பிலான தனியார் பள்ளி அங்கீகார முறைகேடு தொடர்பான விசாரணையை தீவிரப்படுத்தியுள்ளனர். இதன் ஒரு பகுதியாக, பெருங்குடியில் வசித்து வரும் ஜவுளித் தொழில் அதிபர் சண்முகப்பிரியாவின் இல்லத்தில் புதன்கிழமை போலீசார் அதிரடி சோதனைகளை மேற்கொண்டனர். முன்னாள் பள்ளிக் கல்வித்துறை அமைச்சர் அன்பில் மகேஷ் பொய்யாமொழியுடன் தொடர்புடையதாகக் கருதப்படும் இந்த வழக்கில், சோதனையின் முடிவில் சில முக்கிய மின்னணு சாதனங்களை போலீசார் கைப்பற்றியுள்ளனர்.

முறைகேடு வழக்கில் கைது செய்யப்பட்டு தற்போது புழல் மத்திய சிறையில் அடைக்கப்பட்டுள்ள முன்னாள் அமைச்சர் அன்பில் மகேஷ் பொய்யாமொழியை, மேலும் விசாரணை செய்வதற்காகக் காவலில் எடுத்து விசாரிக்க அனுமதி கோரி, சென்னை ஊழல் தடுப்புச் சட்ட வழக்குகளுக்கான சிறப்பு நீதிமன்றத்தில் போலீசார் மனு தாக்கல் செய்துள்ளனர். இந்த வழக்கின் முக்கியக் கட்டமாக, அன்பில் மகேஷ் பொய்யாமொழியின் ஜாமீன் மனு மீதான விசாரணை வியாழக்கிழமை நடைபெற உள்ளது. முன்னதாக, இவ்வழக்கில் குற்றம் சாட்டப்பட்ட முன்னாள் எம்எல்ஏ முத்துகுமார் முன்ஜாமீன் கோரி உச்சநீதிமன்றத்தில் தாக்கல் செய்த மனு தள்ளுபடி செய்யப்பட்டது குறிப்பிடத்தக்கது.

இந்த விவகாரங்கள் ஒருபுறம் இருக்க, கடந்த 2025 ஆம் ஆண்டு கரூர் பகுதியில் நிகழ்ந்த நெரிசல் சம்பவம் தொடர்பாக ஆட்சேபனைக்குரிய வகையில் கருத்து தெரிவித்ததாக, வேலூர் திமுக கவுன்சிலர் டீட்டா சரவணன் என்பவரை சென்னை காவல் துறையினர் விழுப்புரத்தில் வைத்து கைது செய்துள்ளனர். அன்பில் மகேஷ் பொய்யாமொழியை புழல் சிறைக்கு அழைத்துச் சென்றபோது, அவர் பேசியதாகக் கூறப்படும் காணொளி இணையத்தில் வைரலானதைத் தொடர்ந்து அவர் மீது வழக்குப்பதிவு செய்யப்பட்டது. அவரிடம் விசாரணை நடத்தப்பட்டு சிறையில் அடைக்கப்பட உள்ளார்.

இதற்கிடையில், அன்பில் மகேஷ் பொய்யாமொழியை மருத்துவ பரிசோதனைக்காக சென்னை மாநகர காவல் ஆணையர் அலுவலகத்திற்கு அழைத்து வந்தபோது, அங்கு கூச்சல் குழப்பம் விளைவித்ததாக திமுக எம்எல்ஏ பி.கே. சேகர் பாபு, எம்பி கலாநிதி வீராசாமி மற்றும் எட்டு பேர் மீது வேப்பேரி காவல் நிலையத்தில் வழக்குப்பதிவு செய்யப்பட்டுள்ளது. அரசு ஊழியர்களைப் பணி செய்ய விடாமல் தடுத்தல் மற்றும் காயத்தை ஏற்படுத்துதல் உள்ளிட்ட சட்டப்பிரிவுகளின் கீழ் இந்த வழக்கு பதிவு செய்யப்பட்டுள்ளது. இந்தத் தொடர் நடவடிக்கைகள் தமிழக அரசியல் களத்தில் பெரும் அதிர்வலைகளை ஏற்படுத்தியுள்ளன.