புதுச்சேரி அரசுப் பள்ளி மதிய உணவில் மீன்: இந்தியாவில் முதல்முறை முன்னோடித் திட்டம் அறிவிப்பு

புதுச்சேரி மற்றும் ஏனாமில் உள்ள அரசுப் பள்ளி மாணவர்களுக்கு மதிய உணவில் மீன் வழங்கும் முன்னோடித் திட்டம் அறிமுகம் செய்யப்பட உள்ளது.

புதுச்சேரி மற்றும் ஏனாம் பிராந்தியங்களில் உள்ள அரசுப் பள்ளி மாணவர்களுக்கு வழங்கப்படும் மதிய உணவுத் திட்டத்தில் மீன் உணவைச் சேர்ப்பதற்கான புதிய முன்னோடித் திட்டத்தை புதுச்சேரி அரசு அறிவித்துள்ளது. இது குறித்த முக்கிய ஆலோசனைக் கூட்டம் புதுச்சேரி சட்டமன்ற வளாகத்தில் மீன்வளத்துறை அமைச்சர் மல்லாடி கிருஷ்ணாராவ் தலைமையில் நடைபெற்றது. இந்தத் திட்டம் இந்தியாவில் முதன்முறையாக அரசுப் பள்ளிகளில் செயல்படுத்தப்படவுள்ள ஒரு தனித்துவமான முயற்சியாகக் கருதப்படுகிறது.

இந்த முன்னோடித் திட்டத்தின் மூலம், புதுச்சேரி மற்றும் ஏனாமில் தலா ஒரு அரசுப் பள்ளியைத் தேர்வு செய்து, அங்குள்ள மாணவர்களுக்கு மதிய உணவோடு மீன் உணவை வழங்க அதிகாரிகள் நடவடிக்கை எடுக்க வேண்டும் என அமைச்சர் உத்தரவிட்டுள்ளார். மாணவர்களுக்கு சத்தான உணவை வழங்குவதோடு, உள்ளூர் மீன் வளத்தைப் பயன்படுத்துவதை ஊக்குவிப்பதே இந்தத் திட்டத்தின் முதன்மையான நோக்கம் என்று தெரிவிக்கப்பட்டுள்ளது. இதற்கான விரிவான ஏற்பாடுகளைச் செய்யத் துறை சார்ந்த அதிகாரிகளுக்கு அறிவுறுத்தல்கள் வழங்கப்பட்டுள்ளன.

இந்த ஆலோசனைக் கூட்டத்தில் கடல்சார் பொருட்கள் ஏற்றுமதி மேம்பாட்டு ஆணையத்தின் (MPEDA) தலைவர் பி. ஜவஹர், மண்டலத் தலைவர் அருள்மூர்த்தி, இணை இயக்குநர் கந்தன் மற்றும் மீன்வளத்துறை இயக்குநர் முகமது இஸ்மாயில், இணை இயக்குநர் கோவிந்தசாமி, ஏனாம் மீன்வளத்துறை துணை இயக்குநர் கொந்தையா உள்ளிட்ட உயர் அதிகாரிகள் கலந்து கொண்டனர். மாணவர்களின் ஊட்டச்சத்தை மேம்படுத்துவது மட்டுமின்றி, மீன் வளத்தை அதிகரிப்பது குறித்து விரிவாக ஆலோசிக்கப்பட்டது.

மேலும், புதுச்சேரி, காரைக்கால் மற்றும் ஏனாம் பிராந்தியங்களில் மீன் வளத்தைப் பெருக்குதல், ஏற்றுமதியை அதிகரித்தல், புதிய வேலைவாய்ப்புகளை உருவாக்குதல் மற்றும் மீன் சார்ந்த தொழில்களை ஊக்குவிப்பது குறித்து இந்த கூட்டத்தில் விவாதிக்கப்பட்டது. குறிப்பாக, புதுச்சேரி பாகூரிலும், காரைக்கால் போலகம் தொழில் பேட்டையிலும் மீன்வளப் பூங்காக்களை நிறுவுவதற்கான திட்டங்கள் மற்றும் ஏனாமில் நண்டு வளர்ப்பு முறைகளை நவீனப்படுத்துவது குறித்தும் ஆக்கபூர்வமான விவாதங்கள் மேற்கொள்ளப்பட்டன.