புதுச்சேரி காவல்துறைக்கு வரலாற்று சிறப்புமிக்க ஜனாதிபதி கொடி விருது: அமித் ஷா பெருமிதம்

புதுச்சேரி காவல்துறைக்கு ஜனாதிபதி கொடியை வழங்கிய மத்திய அமைச்சர் அமித் ஷா, யூனியன் பிரதேசத்தின் வளர்ச்சிக்காக 2014 முதல் ரூ.13,762 கோடி வழங்கப்பட்டுள்ளதாகத் தெரிவித்துள்ளார்.

புதுச்சேரி கோரிமேடு காவலர் அணிவகுப்பு மைதானத்தில் நடைபெற்ற பிரம்மாண்டமான விழாவில், புதுச்சேரி காவல்துறைக்கு ஜனாதிபதி கொடி (President’s Colour) வழங்கி கௌரவிக்கப்பட்டது. இந்த வரலாற்று முக்கியத்துவம் வாய்ந்த நிகழ்ச்சியில் மத்திய உள்துறை அமைச்சர் அமித் ஷா கலந்துகொண்டு, ஜனாதிபதியின் சார்பில் இந்தக் கௌரவத்தை வழங்கினார். காவல் துறையின் சிறப்பான சேவை, தொழில்முறை நேர்த்தி மற்றும் பொது பாதுகாப்புக்கான அர்ப்பணிப்பை அங்கீகரிக்கும் வகையில் வழங்கப்படும் உயரிய விருதான இது, இந்தியாவில் இந்த அங்கீகாரம் பெற்ற 18-வது மாநிலம் அல்லது யூனியன் பிரதேசமாக புதுச்சேரியை மாற்றியுள்ளது.

இந்த நிகழ்ச்சியில் பேசிய மத்திய அமைச்சர் அமித் ஷா, பிரதமர் நரேந்திர மோடியின் தலைமையிலான அரசு, யூனியன் பிரதேசங்களை வலுப்படுத்துவதில் தனிப்பட்ட கவனம் செலுத்தி வருவதாகக் குறிப்பிட்டார். கடந்த 2014 முதல் 2026 வரையிலான காலக்கட்டத்தில் மட்டும் புதுச்சேரியின் வளர்ச்சித் திட்டங்களுக்காக மத்திய அரசு ரூ.13,762 கோடியை வழங்கியுள்ளது. இது கடந்த அறுபது ஆண்டுகளில் வழங்கப்பட்ட ரூ.3,500 கோடியை விட பல மடங்கு அதிகம் என்று அவர் புள்ளிவிவரங்களுடன் சுட்டிக்காட்டினார். மேலும், காரைக்கால் தேசிய நெடுஞ்சாலை விரிவாக்கம் மற்றும் பல்வேறு சாலை மேம்பாட்டுத் திட்டங்கள் மத்திய அரசின் ஆதரவுடன் சிறப்பாகச் செயல்படுத்தப்பட்டு வருவதாகவும் அவர் கூறினார்.

புதுச்சேரியின் ஆன்மீக மற்றும் கலாச்சார பாரம்பரியத்தைப் போற்றிய அமித் ஷா, ஸ்ரீ அரவிந்தர், அன்னை மற்றும் மகாகவி சுப்பிரமணிய பாரதியார் ஆகியோரின் பங்களிப்புகள் நாட்டின் தேசிய உணர்வில் நீங்கா இடம் பெற்றுள்ளன என்றார். புதிய குற்றவியல் சட்டங்கள் குறித்துப் பேசிய அவர், ஆங்கிலேயர் காலத்து சட்டங்களுக்குப் பதிலாக, நவீனத் தொழில்நுட்பம், காலக்கெடுவுக்குள் நீதி மற்றும் வெளிப்படைத்தன்மை கொண்ட புதிய சட்டங்கள் கொண்டு வரப்பட்டுள்ளதாக விளக்கினார். விழாவில் சிறப்பாகப் பணியாற்றிய மூத்த காவல் கண்காணிப்பாளர்கள் ஆர். கலைவாணன் மற்றும் எம்.வி.என்.வி. லட்சுமி சௌஜன்யா ஆகியோருக்கு மத்திய உள்துறை அமைச்சரின் தக்‌ஷதா பதக்கங்களை அமித் ஷா வழங்கினார்.

விழாவின் இறுதிப்பகுதியில், காலை முதலே கடுமையான வெயிலில் நின்றிருந்த காவலர்களில் ஒன்பது பேர் மயக்கமடைந்தனர். இதில் குறிப்பாகப் பெண் காவலர்கள் அதிக அளவில் பாதிக்கப்பட்டனர், அவர்களுக்கு உடனடியாக மருத்துவக் குழுவினரால் சிகிச்சை அளிக்கப்பட்டது. இந்த நிகழ்ச்சியில் புதுச்சேரி துணைநிலை ஆளுநர் கே. கைலாஷ்நாதன், முதலமைச்சர் என். ரங்கசாமி, உள்துறை அமைச்சர் ஏ. நமச்சிவாயம் மற்றும் காவல்துறை தலைமை இயக்குநர் ஷாலினி சிங் உள்ளிட்ட பல முக்கியப் பிரமுகர்கள் கலந்துகொண்டனர். ஜனாதிபதி கொடி பெற்றதன் அடையாளமாக, இனி புதுச்சேரி காவல்துறை சீருடையில் இந்த சின்னம் இடம்பெறும் என்பது குறிப்பிடத்தக்கது.