புதுக்கோட்டை பல் மருத்துவக் கல்லூரி முறைகேடு புகார்: எம்.ஜி.ஆர் மருத்துவப் பல்கலைக்கழகம் தீவிர விசாரணை

புதுக்கோட்டை அரசு பல் மருத்துவக் கல்லூரியில் மாணவருக்கு முறையற்ற சலுகைகள் வழங்கப்பட்டதாக எழுந்த புகாரில் எம்.ஜி.ஆர் மருத்துவப் பல்கலைக்கழகம் விசாரணை தொடங்கியுள்ளது.

புதுக்கோட்டை அரசு பல் மருத்துவக் கல்லூரி மற்றும் மருத்துவமனையில் பயிலும் மூன்றாம் ஆண்டு பிடிஎஸ் (BDS) மாணவர் ஒருவருக்கு, கல்லூரி நிர்வாகம் முறையற்ற வகையில் சிறப்புச் சலுகைகளை வழங்கி வருவதாகக் கடுமையான புகார்கள் எழுந்துள்ளன. அகில இந்திய ஒதுக்கீட்டு இடத்தின் கீழ் சேர்ந்த அந்த மாணவர், கடந்த மார்ச் மாதம் முதல் ஜூலை மாதம் வரை கல்லூரிக்குச் செல்லவில்லை என்று கூறப்படுகிறது. மருத்துவப் படிப்பிற்கான விதிமுறைகளின்படி, ஒரு மாணவர் தேர்வெழுத 75 சதவீத வருகைப் பதிவு கட்டாயமாகும். ஆனால், வருகை குறைவாக இருந்தபோதிலும், அந்த மாணவரின் வருகைப் பதிவேடுகள் திருத்தப்பட்டு போதுமான வருகை இருப்பது போல முறைகேடாக மாற்றப்பட்டுள்ளதாக சக மாணவர்கள் குற்றம் சாட்டியுள்ளனர்.

இது தொடர்பாக மாணவர் அமைப்புகள் கடந்த ஆகஸ்ட் 11-ஆம் தேதி, தமிழ்நாடு டாக்டர் எம்.ஜி.ஆர் மருத்துவப் பல்கலைக்கழகப் பதிவாளர் மற்றும் தேர்வுக் கட்டுப்பாட்டாளரிடம் அதிகாரப்பூர்வமாகப் புகார் அளித்தனர். புகாரில் கூறப்பட்டுள்ள தகவல்படி, கல்லூரியின் உதவிப் பேராசிரியர் ஒருவர், நிர்வாக ஊழியர்கள் மற்றும் அலுவலகப் பணியாளர்களின் உதவியுடன் இந்தத் தில்லுமுல்லு வேலைகளில் ஈடுபட்டுள்ளார். குறிப்பாக, புகார் அளிக்கப்பட்ட பின்னரும், அந்த மாணவருக்குத் தேர்வு எழுத அனுமதிச் சீட்டு வழங்கப்பட்டதுடன், தேர்வு அறையிலும் அதே உதவிப் பேராசிரியர் கண்காணிப்பாளராகப் பணியாற்றியது பெரும் சர்ச்சையை ஏற்படுத்தியுள்ளது.

இந்த முறைகேடு குறித்த அதிர்ச்சிகரமான தகவலாக, தேர்வு அறைக்குள் நுழையும் முன்பே அந்த மாணவரின் விடைத்தாளில் பாதிக்கும் மேற்பட்ட பகுதிகள் பூர்த்தி செய்யப்பட்டிருந்ததாக மாணவர்கள் குற்றம் சுமத்தியுள்ளனர். தாங்கள் அளித்த முந்தைய புகார் மீது உரிய நடவடிக்கை எடுக்கப்படாததால், ஆகஸ்ட் 28-ஆம் தேதி, உண்மையான வருகைப் பதிவேடுகளை ஆதாரத்துடன் பல்கலைக்கழக நிர்வாகத்திடம் மாணவர்கள் சமர்ப்பித்தனர். உதவிப் பேராசிரியர் ஒருவர் புதுச்சேரியில் நீட் (NEET) பயிற்சி மையம் நடத்தி வருவதாகவும், அங்கு குறிப்பிட்ட அந்த மாணவர் பணிபுரிந்து வந்ததாகவும் கூறப்படுகிறது. இந்தத் தொடர்பே இந்த முறைகேடுகளுக்குக் காரணமாக இருக்கலாம் என்று சந்தேகிக்கப்படுகிறது.

இந்த விவகாரம் குறித்துப் பேசிய பல்கலைக்கழகத்தின் பொறுப்பு துணை வேந்தர் டாக்டர் எஸ். புஷ்கலா, பல்கலைக்கழகத்தின் ஒழுங்கு நடவடிக்கை குழு இந்த விவகாரம் குறித்து விரிவான விசாரணையைத் தொடங்கியுள்ளதாகத் தெரிவித்தார். விசாரணை முடிவடைந்தவுடன், அதன் அறிக்கை சுகாதாரத் துறைச் செயலாளரிடம் சமர்ப்பிக்கப்படும். அந்த அறிக்கையின் அடிப்படையில், மருத்துவக் கல்வி மற்றும் ஆராய்ச்சி இயக்குநரகம் மூலம் உரிய நடவடிக்கை எடுக்கப்படும் என்று அவர் உறுதியளித்துள்ளார். இந்த சம்பவம் மருத்துவக் கல்வித் துறையில் பெரும் அதிர்வலைகளை ஏற்படுத்தியுள்ளது.