தமிழ்நாட்டில் அதிரடி விலை குறைப்பு: கிலோ 30 ரூபாய்க்கு தரமான அரிசி விற்பனை தொடக்கம்

தமிழ்நாட்டில் அரிசி விலை உயர்வை கட்டுப்படுத்த அமுதம் மற்றும் கூட்டுறவு அங்காடிகளில் கிலோ ரூ.30-க்கு தரமான அரிசி விற்பனை செய்யப்பட உள்ளது.

தமிழ்நாட்டில் அத்தியாவசிய உணவுப் பொருட்களின் விலை உயர்வைக் கட்டுப்படுத்தவும், பொதுமக்களின் சுமையைக் குறைக்கவும் தமிழக அரசு பல்வேறு முக்கிய நடவடிக்கைகளை எடுத்துள்ளது. இதன்படி, திறந்த சந்தையில் கிலோ 75 முதல் 85 ரூபாய் வரை விற்கப்படும் தரமான அரிசியை, இனி அமுதம் மற்றும் கூட்டுறவு அங்காடிகள் மூலம் கிலோ 30 ரூபாய் என்ற மானிய விலையில் விற்பனை செய்ய அரசு உத்தரவிட்டுள்ளது. உணவு மற்றும் நுகர்வோர் பாதுகாப்புத்துறை அமைச்சர் பி. வெங்கடரமணன் இதனைச் செயலகத்தில் அறிவித்தார்.

எள் நினோ (El Niño) பாதிப்புகளால் ஏற்பட்ட வேளாண் விளைச்சல் குறைவு மற்றும் அண்டை மாநிலங்களில் இருந்து அரிசி வரத்து குறைந்ததன் காரணமாகவே சந்தையில் விலையேற்றம் ஏற்பட்டுள்ளதாக அரசு விளக்கமளித்துள்ளது. இந்தச் சூழலை எதிர்கொள்ளும் வகையில், முதற்கட்டமாக 25,000 மெட்ரிக் டன் தரமான அரிசியை மாநிலம் முழுவதும் உள்ள 201 கூட்டுறவு அங்காடிகள் மற்றும் 49 அமுதம் விற்பனை நிலையங்கள் மூலம் விநியோகம் செய்ய நடவடிக்கை எடுக்கப்பட்டுள்ளது. பொதுமக்கள் தங்கள் தேவைக்கேற்ப ஒருமுறைக்கு அதிகபட்சம் 5 கிலோ அரிசியைப் பெற்றுக்கொள்ளலாம் எனத் தெரிவிக்கப்பட்டுள்ளது.

அரிசி மட்டுமல்லாது துவரம் பருப்பு மற்றும் பிற அத்தியாவசியப் பொருட்களின் விலையையும் கட்டுக்குள் வைக்க அரசு திட்டமிட்டுள்ளது. இதற்காக, வரும் திங்கட்கிழமை முதல் அமுதம் மற்றும் கூட்டுறவு அங்காடிகளில் துவரம் பருப்பு கிலோ 130 ரூபாய்க்கு விற்பனை செய்யப்படும். இதற்கென மத்திய அரசின் நாபெட் (NAFED) அமைப்பிடமிருந்து 500 மெட்ரிக் டன் துவரம் பருப்பு கொள்முதல் செய்யப்பட்டுள்ளது. அத்தியாவசியப் பொருட்கள் பதுக்கப்படுவதைத் தடுக்கவும், கள்ளச்சந்தையில் விற்பனை செய்யப்படுவதைக் கண்காணிக்கவும் கடுமையான நடவடிக்கைகள் எடுக்கப்படும் என அமைச்சர் எச்சரிக்கை விடுத்துள்ளார்.

தமிழகம் முழுவதும் உள்ள சுமார் 2.29 கோடி குடும்ப அட்டைதாரர்களுக்குத் தடையின்றி ரேஷன் பொருட்கள் வழங்கப்படுவதை அரசு உறுதி செய்துள்ளது. சர்க்கரை, பாமாயில் மற்றும் பருப்பு வகைகள் அடுத்த மூன்று மாதங்களுக்குத் தேவையான அளவு கையிருப்பில் உள்ளதாகவும் அரசு தெரிவித்துள்ளது. விலை நிலவரத்தைக் கண்காணிக்கக் குழு அமைக்கப்பட்டு, சந்தை நிலவரத்திற்கு ஏற்ப மற்ற பொருட்களின் விலையையும் குறைக்கத் திட்டமிடப்பட்டுள்ளது. பொதுமக்கள் பாதிக்கப்படாத வகையில், சந்தை விலையை விடக் குறைவான விலையில் பொன்னி அரிசி, உளுந்தம் பருப்பு, பூண்டு மற்றும் மிளகாய் போன்ற அத்தியாவசியப் பொருட்கள் தொடர்ந்து விற்பனை செய்யப்படும் என அரசு உறுதியளித்துள்ளது.