புராணக் கதையில் ராகவா லாரன்ஸ்: பிரம்மாண்டமாக உருவாகும் 'மகாவீர கர்ணா' படத்தின் ஃபர்ஸ்ட் லுக் வெளியீடு

நடிகர் ராகவா லாரன்ஸ் முதன்முறையாக புராணக் கதாபாத்திரமான கர்ணனாக நடிக்கும் 'மகாவீர கர்ணா' திரைப்படத்தின் ஃபர்ஸ்ட் லுக் போஸ்டர் வெளியாகியுள்ளது.

தமிழ் திரையுலகின் முன்னணி நட்சத்திரமும், நடன இயக்குநருமான ராகவா லாரன்ஸ், நீண்ட நாட்களாக ரசிகர்களால் எதிர்பார்க்கப்பட்ட தனது புதிய திரைப்படத்தின் அறிவிப்பை வெளியிட்டுள்ளார். இயக்குனர் ரமேஷ் வர்மா இயக்கத்தில் உருவாகும் இந்தப் படத்திற்கு 'மகாவீர கர்ணா' என்று பெயரிடப்பட்டுள்ளது. முன்னதாக இப்படம் 'கால பைரவா' என்ற தலைப்பில் அறிவிக்கப்பட்ட நிலையில், தற்போது கதையின் பிரம்மாண்டத்திற்கேற்ப தலைப்பு மாற்றப்பட்டுள்ளது. புராணக் கதையம்சம் கொண்ட ஒரு காவியமாக இந்தப் படம் உருவாக உள்ளது ரசிகர்களிடையே பெரும் எதிர்பார்ப்பை ஏற்படுத்தியுள்ளது.

சமூக வலைதளப் பக்கங்களில் தனது மகிழ்ச்சியைப் பகிர்ந்து கொண்ட நடிகர் ராகவா லாரன்ஸ், இந்திய புராணக் கதைகளில் மிகவும் புகழ்பெற்ற மற்றும் வீரமிக்க கதாபாத்திரமான கர்ணனைத் திரையில் ஏற்றுவது மிகுந்த பாக்கியமாக உணர்கிறேன் என்று தெரிவித்துள்ளார். இயக்குனர் ரமேஷ் வர்மா தன்னிடம் இந்த ஸ்கிரிப்ட் கதையை எடுத்து வந்து இந்த வாய்ப்பை வழங்கியதற்கு அவர் நன்றி தெரிவித்துள்ளார். முதல்முறையாக புராணப் பாத்திரத்தில் நடிக்கும் தனது இந்த புதிய பயணத்திற்கு அனைவரின் ஆசியும் ஆதரவும் தேவை என்று அவர் உருக்கமாகக் குறிப்பிட்டுள்ளார்.

வெளியிடப்பட்டுள்ள ஃபர்ஸ்ட் லுக் போஸ்டரில், ராகவா லாரன்ஸ் கர்ணனுக்குரிய தோற்றத்துடன், நீண்ட கூந்தல், காதணிகள், கவசம் மற்றும் நெற்றியில் சூரிய திலகத்துடன் கம்பீரமாகக் காட்சியளிக்கிறார். இப்படம் தமிழ், தெலுங்கு, இந்தி, கன்னடம் மற்றும் மலையாளம் ஆகிய ஐந்து மொழிகளில் வெளியாக உள்ளது. பென் மூவிஸ், ஸ்ரீ நீலாத்ரி புரொடக்ஷன்ஸ் மற்றும் ஆர்.வி ஸ்டுடியோஸ் ஆகிய நிறுவனங்கள் இணைந்து தயாரிக்கும் இந்தப் படம், ஒரு லைவ்-ஆக்ஷன் காவியமாக உருவாக்கப்பட உள்ளது.

படத்தின் தொழில்நுட்பக் குழுவில் ஒளிப்பதிவாளராக ராம்ஜி டாட், படத்தொகுப்பாளராக பிரவீன் பூடி, பாடலாசிரியர் ஸ்ரீமணி வசனகர்த்தாவாகவும், கியானி இசையமைப்பாளராகவும் பணியாற்றி வருகின்றனர். இப்படம் 2027-ஆம் ஆண்டில் திரைக்கு வரும் என்று எதிர்பார்க்கப்படுகிறது. இதற்கிடையில், ராகவா லாரன்ஸ் 'பென்ஸ்' மற்றும் 'காஞ்சனா 4' ஆகிய படங்களில் பிஸியாக நடித்து வருகிறார். லோகேஷ் கனகராஜின் எல்.சி.யு (LCU) பிரபஞ்சத்தில் இடம்பெறும் 'பென்ஸ்' திரைப்படத்தில் ரவி மோகன் மற்றும் நிவின் பாலியுடன் அவர் இணைந்து நடிக்கிறார் என்பது குறிப்பிடத்தக்கது.