சாலை உயர்வால் வீடுகளுக்குள் புகும் மழைநீர்: முறையான மில்லிங் செய்ய வலியுறுத்தி அறப்போர் இயக்கம் போராட்டம்

சாலைகளை மீண்டும் அமைக்கும் போது தகுந்த முறையில் சுரண்டாமல் (milling) உயரத்தை அதிகரிப்பது வீடுகளில் வெள்ளநீர் புகுவதற்கு காரணமாகிறது என அறப்போர் இயக்கம் எதிர்ப்பு தெரிவித்துள்ளது.

சென்னையில் உள்ள ராஜரத்தினம் மைதானம் அருகே அறப்போர் இயக்கம் சார்பில் நடைபெற்ற கவன ஈர்ப்பு போராட்டத்தில், தமிழகம் முழுவதும் சாலைகளை மீண்டும் அமைக்கும் பணிகளின் போது முறையான மில்லிங் (milling) தொழில்நுட்பத்தை பின்பற்ற வேண்டும் என்ற கோரிக்கை முன்வைக்கப்பட்டது. பழைய தார்ச் சாலைகளை முறையாக சுரண்டி சமப்படுத்தாமல் அதன் மேல் புதிய தார்ச் சாலைகளை அமைப்பதால், சாலைகளின் உயரம் நாளுக்கு நாள் அதிகரித்து வருகிறது. இது குடியிருப்புப் பகுதிகளை விட சாலைகள் மிக உயரமாக மாறுவதற்கு காரணமாகிறது என்று இந்த அமைப்பு குற்றம் சாட்டியுள்ளது.

அறப்போர் இயக்கத்தின் ஆய்வின்படி, தமிழகத்தின் 30 மாவட்டங்களில் சுமார் 245 இடங்களில் சாலைகள் இவ்வாறு உயர்த்தப்பட்டிருப்பது கண்டறியப்பட்டுள்ளது. பல இடங்களில் வீடுகளின் தரைமட்டத்தை விட சாலைகள் சுமார் மூன்று அடி உயரம் வரை உயர்ந்துள்ளன. இதனால், மழைக்காலங்களில் மழைநீருடன் கழிவுநீரும் கலந்து குடியிருப்புகளுக்குள் புகும் அபாயம் ஏற்பட்டுள்ளதாக அப்பகுதி மக்கள் வேதனை தெரிவிக்கின்றனர். இந்தச் சிக்கலைத் தீர்க்க அரசு உடனடியாக ஒரு நிபுணர் குழுவை அமைத்து நடவடிக்கை எடுக்க வேண்டும் என்றும், பாதிக்கப்பட்ட குடியிருப்பாளர்களுக்கு உரிய இழப்பீடு வழங்க வேண்டும் என்றும் போராட்டக்காரர்கள் வலியுறுத்தினர்.

சாலைப் பணிகளுக்காக டெண்டர் விடும்போதே, புதிய தார் அடுக்கின் தடிமனுக்கு ஏற்ப பழைய சாலையை மில்லிங் செய்ய வேண்டும் என்பதை கட்டாய நிபந்தனையாக சேர்க்க வேண்டும் என கோரப்பட்டுள்ளது. மேலும், சாலைகளை அமைப்பதற்கு முன்னரும் பின்னரும் அதன் உயரத்தை புகைப்படம் மற்றும் வீடியோ ஆதாரங்களுடன் ஆவணப்படுத்த வேண்டும் என்றும், நிரந்தர கடல் மட்டக் குறியீடுகளைப் பயன்படுத்த வேண்டும் என்றும் அறப்போர் இயக்கம் கேட்டுக்கொண்டுள்ளது. இதற்கான நடைமுறைகளைத் தீவிரப்படுத்த மாநிலம் தழுவிய பிரச்சாரத்தையும் அந்த அமைப்பு முன்னெடுத்துள்ளது.

அறப்போர் இயக்கத்தின் ஒருங்கிணைப்பாளர் ஜெயராமன் வெங்கடேசன் கூறுகையில், சமீபத்திய மழையின் போது பல வீடுகளில் தண்ணீர் புகுந்து மக்கள் பெரும் சிரமத்திற்குள்ளாகியுள்ளனர் என்றும், தாங்கள் தயாரித்த தணிக்கை அறிக்கையை உரிய அமைச்சரிடமும் அதிகாரிகளிடமும் சமர்ப்பித்துள்ளதாகவும் தெரிவித்தார். இனிவரும் காலங்களில் சாலைகளின் உயரத்தை ஒரு சென்டிமீட்டர் கூட அதிகரிக்க அனுமதிக்க மாட்டோம் என்றும், விதிமுறைகளை மீறும் ஒப்பந்ததாரர்கள் மற்றும் அதிகாரிகள் மீது கடுமையான ஒழுங்கு நடவடிக்கை எடுக்கப்பட வேண்டும் என்றும் அவர் குறிப்பிட்டார். முறையற்ற சாலைப் பணிகளுக்கு ஒப்பந்ததாரர்களுக்கு வழங்கப்படும் கட்டணத்தை நிறுத்தி வைக்க வேண்டும் என்றும் அந்த இயக்கம் கோரிக்கை விடுத்துள்ளது.