ராணிப்பேட்டை நெசவாளர்களின் வாழ்வாதாரத்தை முடக்கும் பருவமழை: பொதுப்பணி கூடம் அமைக்கக் கோரிக்கை

ராணிப்பேட்டை மாவட்டம் வாழப்பந்தல் பகுதியில் பருவமழை காரணமாக 60 நெசவாளர் குடும்பங்கள் வாழ்வாதாரத்தை இழக்கும் அவலம் தொடர்கிறது.

ராணிப்பேட்டை மாவட்டம் ஆற்காடு அருகே உள்ள வாழப்பந்தல் கிராமத்தில் பச்சையம்மன் தெருவில் சுமார் 60 நெசவாளர் குடும்பங்கள் பல ஆண்டுகளாக வசித்து வருகின்றன. இங்குள்ள குடியிருப்புகள் சுமார் 30 ஆண்டுகளுக்கு முன்பு பச்சையம்மன் பட்டு கைத்தறி கூட்டுறவு சங்கத்தால் கட்டப்பட்டவை. ஆனால், இவை போதிய வசதிகள் இன்றி கட்டப்பட்டதால், நெசவாளர்கள் தங்கள் பாரம்பரிய தொழிலைச் செய்வதில் பெரும் சிக்கல்களைச் சந்தித்து வருகின்றனர். ஒரு பட்டுப் புடவையை நெய்வதற்கு ஒரு நெசவாளர் குடும்பம் பல நாட்கள் உழைக்க வேண்டியுள்ளது. இதற்காக வீட்டின் தரைத்தளத்தில் நான்கு அடி ஆழமான குழி தோண்டி, அதில் தறிகளைப் பொருத்தி நெசவு செய்யும் முறையை அவர்கள் பின்பற்றி வருகின்றனர்.

ஒவ்வொரு ஆண்டும் வடகிழக்கு பருவமழை தொடங்கும் போது, இந்த நெசவாளர்களின் வாழ்வாதாரம் கடுமையாகப் பாதிக்கப்படுகிறது. வீடுகளின் தரைத்தளம் மற்றும் தறி குழிகளில் நிலத்தடி நீர் புகுந்து கொள்வதாலும், மேற்கூரையிலிருந்து மழைநீர் கசிவதாலும் நெசவுத் தொழில் முற்றிலுமாக முடங்குகிறது. பட்டுப் புடவைகள் மிகவும் மென்மையானவை என்பதால், ஈரப்பதம் பட்டால் அவை வீணாகிவிடும் என்ற அச்சத்தில் நெசவாளர்கள் மூன்று முதல் நான்கு மாதங்கள் வரை வேலையை நிறுத்தி வைக்க வேண்டிய சூழல் உள்ளது. ஈரப்பதத்தால் பட்டு நூல்களில் பூஞ்சை காளான் ஏற்படுவதையும், தரமான துணிகளை உருவாக்க முடியாமல் போவதையும் அவர்கள் பெரும் இழப்பாகக் கருதுகின்றனர்.

தங்கள் வாழ்வாதாரத்தைப் பாதுகாக்க நெசவாளர்கள் நீண்டகாலமாக பொதுப்பணி கூடம் (Common work shed) அமைக்க கோரிக்கை விடுத்து வருகின்றனர். கடந்த சட்டமன்ற தேர்தலின் போது தங்களின் கோரிக்கைகளை வலியுறுத்தி கறுப்புக் கொடி ஏந்தி ஆர்ப்பாட்டத்தில் ஈடுபட்டனர். தற்போது ஆற்காடு சட்டமன்ற உறுப்பினர் எஸ்.எம். சுகுமார் இந்த விவகாரத்தை சட்டமன்றத்தில் எழுப்பியுள்ளார். இருப்பினும், கூட்டுறவு சங்கம் செயலிழந்துவிட்டதால், வீடுகளுக்கான பட்டா மாறுதல் மற்றும் புதிய பொதுப்பணி கூடத்திற்கான இடம் ஒதுக்கீடு ஆகியவற்றில் சட்ட ரீதியான சிக்கல்கள் நீடிக்கின்றன.

இது குறித்து ராணிப்பேட்டை கைத்தறி உதவி இயக்குனர் கூறுகையில், நெசவாளர்கள் தற்போது எந்தவொரு முதன்மை கூட்டுறவு சங்கத்திலும் உறுப்பினராக இல்லாததால், இது குறித்த நடவடிக்கைகள் காஞ்சிபுரத்தில் உள்ள மத்திய அரசின் நெசவாளர் சேவை மையம் மூலம் மேற்கொள்ளப்பட வேண்டும் என்று தெரிவித்துள்ளார். இதற்கிடையில், நெசவாளர்கள் சுய உதவி குழுக்களாக இணைந்தால் மட்டுமே பொதுப்பணி கூடத்திற்கான கோரிக்கையை பரிசீலிக்க முடியும் என நெசவாளர் சேவை மைய அதிகாரிகள் தெரிவித்துள்ளனர். அரசும் அதிகாரிகளும் மனிதாபிமான அடிப்படையில் விரைந்து நடவடிக்கை எடுத்து, தங்களின் வாழ்வாதாரத்தை மீட்டெடுக்க முன்வர வேண்டும் என்பதே இப்பகுதி மக்களின் தற்போதைய எதிர்பார்ப்பாகும்.