புதுச்சேரி கூட்டுறவு நகர்ப்புற வங்கிக்கு ரிசர்வ் வங்கி கட்டுப்பாடு: வாடிக்கையாளர்கள் ரூ.5,000 வரை மட்டுமே எடுக்க அனுமதி

புதுச்சேரி கூட்டுறவு நகர்ப்புற வங்கியில் பணப்புழக்க நெருக்கடி காரணமாக வாடிக்கையாளர்கள் பணம் எடுப்பதற்கு இந்திய ரிசர்வ் வங்கி கட்டுப்பாடு விதித்துள்ளது.

புதுச்சேரியில் செயல்பட்டு வரும் புதுச்சேரி கூட்டுறவு நகர்ப்புற வங்கி லிமிடெட் (Puducherry Co-operative Urban Bank Limited) மீது இந்திய ரிசர்வ் வங்கி (RBI) அதிரடி கட்டுப்பாடுகளை விதித்துள்ளது. வங்கியின் பணப்புழக்க நிலை மற்றும் மேற்பார்வைக் குறைபாடுகள் காரணமாக, வாடிக்கையாளர்கள் தங்கள் கணக்குகளில் இருந்து அதிகபட்சம் 5,000 ரூபாய் மட்டுமே எடுக்க முடியும் என்று ரிசர்வ் வங்கி உத்தரவிட்டுள்ளது. இந்த புதிய கட்டுப்பாடுகள் அக்டோபர் 21 முதல் அமலுக்கு வந்துள்ளதாகவும், இவை அடுத்த ஆறு மாத காலத்திற்கு நடைமுறையில் இருக்கும் என்றும் ரிசர்வ் வங்கியின் முதன்மை பொதுமேலாளர் பிரிஜ் ராஜ் வெளியிட்ட அறிக்கையில் தெரிவிக்கப்பட்டுள்ளது.

வங்கியின் மேலாண்மை தரப்பில் இருந்து பெறப்பட்ட தகவல்களின்படி, கடந்த பத்தாண்டுகளாக கூட்டுறவு சங்கங்கள் மற்றும் மூன்றாம் தரப்பினர் பெற்ற கடன்களை முறையாகத் திருப்பிச் செலுத்தாததே இந்த நெருக்கடிக்கு முதன்மைக் காரணமாகக் கூறப்படுகிறது. சுமார் 14 கோடி ரூபாய் வரை வாராக் கடனாக இருப்பதே வைப்புத் தொகைகள் குறையக் காரணமாகியுள்ளது. இதனைத் தொடர்ந்து, முதல்வர் என். ரங்கசாமியின் அறிவுறுத்தலின் பேரில், வங்கி அதிகாரிகள் சென்னை மற்றும் புதுச்சேரியில் ரிசர்வ் வங்கி அதிகாரிகளுடன் பேச்சுவார்த்தை நடத்தியுள்ளனர். தமிழக அரசு அல்லது புதுச்சேரி யூனியன் பிரதேச அரசிடம் இருந்து பங்கு மூலதனத்தைப் பெறுவதன் மூலம் இந்த கட்டுப்பாடுகளை விரைவாக நீக்க முயற்சி மேற்கொள்ளப்பட்டு வருகிறது.

இந்த வங்கியானது புதுச்சேரி முழுவதும் ஆறு கிளைகளைக் கொண்டுள்ளதுடன், சுமார் 25,000 உறுப்பினர்களைக் கொண்டுள்ளது. இதில் 600-க்கும் மேற்பட்டோர் நிரந்தர வைப்புத் தொகை வைத்துள்ளனர். இருப்பினும், 2018-19 நிதியாண்டில் 163.89 கோடியாக இருந்த வைப்புத் தொகை, 2022-23 நிதியாண்டில் 131.91 கோடியாகக் குறைந்துள்ளது குறிப்பிடத்தக்கது. வைப்புத் தொகையாளர்கள் அச்சமடையத் தேவையில்லை என்றும், வங்கி விரைவில் பழைய நிலைக்குத் திரும்பும் என்றும் வங்கி அதிகாரிகள் நம்பிக்கை தெரிவித்துள்ளனர். மேலும், தகுதியுள்ள வைப்புத் தொகையாளர்களுக்கு 5 லட்சம் ரூபாய் வரையிலான வைப்புத் தொகை காப்பீட்டு வசதி உண்டு என்றும் தெரிவிக்கப்பட்டுள்ளது.

தற்போதைய கட்டுப்பாடுகளின்படி, வங்கியின் உரிமம் ரத்து செய்யப்படவில்லை. ஆனால், ரிசர்வ் வங்கியின் முன் அனுமதியின்றி புதிய கடன்களை வழங்குவதோ, முதலீடு செய்வதோ அல்லது புதிய வைப்புகளை ஏற்பதோ தடை செய்யப்பட்டுள்ளது. அதேசமயம், ஊழியர்களின் சம்பளம், வாடகை மற்றும் மின்சாரக் கட்டணம் போன்ற அத்தியாவசியச் செலவுகளை மேற்கொள்ள வங்கிக்கு அனுமதி வழங்கப்பட்டுள்ளது. வாடிக்கையாளர்கள் தங்கள் சந்தேகங்களுக்கு வங்கி அதிகாரிகளை அணுகலாம் அல்லது வைப்புத் தொகை காப்பீடு தொடர்பான தகவல்களுக்கு அதிகாரப்பூர்வ இணையதளத்தைப் பார்க்கலாம் என்று அறிவுறுத்தப்பட்டுள்ளது.