கட்டிட வரைபட மீறல் விவகாரம்: ரியல் எஸ்டேட் ஒழுங்குமுறை ஆணையத்திற்கு அதிகாரம் இல்லை - மேல்முறையீட்டு தீர்ப்பாயம் தீர்ப்பு

கட்டிட அனுமதி மீறல்கள் தொடர்பாக ரியல் எஸ்டேட் நிறுவனங்கள் மீது நடவடிக்கை எடுக்கும் அதிகாரம் டி.என்.ஆர்.இ.ஆர்.ஏ-விற்கு இல்லை என மேல்முறையீட்டு தீர்ப்பாயம் அதிரடி உத்தரவு பிறப்பித்துள்ளது.

தமிழ்நாடு ரியல் எஸ்டேட் மேல்முறையீட்டு தீர்ப்பாயம் (TNREAT) ஒரு முக்கிய உத்தரவை பிறப்பித்துள்ளது. இதன்படி, அங்கீகரிக்கப்பட்ட கட்டிட வரைபடங்களில் மேற்கொள்ளப்படும் மாற்றங்கள் அல்லது மீறல்கள் தொடர்பாக, கட்டுமான நிறுவனங்கள் மீது நடவடிக்கை எடுக்கும் அதிகாரம் தமிழ்நாடு ரியல் எஸ்டேட் ஒழுங்குமுறை ஆணையத்திற்கு (TNRERA) இல்லை என்று தீர்ப்பாயம் தெளிவுபடுத்தியுள்ளது. திட்டமிடும் பணிகளில் ஏற்படும் குளறுபடிகள் குறித்து சம்பந்தப்பட்ட திட்டமிடல் ஆணையமே நடவடிக்கை எடுக்க வேண்டும் என்றும் தீர்ப்பாயம் குறிப்பிட்டுள்ளது.

சென்னை நுங்கம்பாக்கத்தில் உள்ள நியூரி ஷன்மிதா (Newry Shanmita) வணிக வளாகத்தில், அனுமதிக்கப்பட்ட வரைபடத்தில் முறைகேடுகள் நடந்ததாக புகார் எழுந்தது. இது தொடர்பாக 2025-ஆம் ஆண்டு ஜனவரி மாதம் சென்னை பெருநகர வளர்ச்சிக் குழுமம் (CMDA) சட்டப்பூர்வமான 'படிவம்-4' அறிவிக்கையை வெளியிட்டிருந்தது. தரை தள அமைப்பில் மாற்றங்கள், இருமடங்கு கூரை உயரம் மற்றும் வணிக வளாகத்திற்கான அணுகல் வசதிகளில் செய்யப்பட்ட மாற்றங்கள் போன்றவை முக்கிய மீறல்களாக சுட்டிக்காட்டப்பட்டன. இந்த விவகாரத்தில், வாங்குபவர்கள் சார்பில் கட்டிட வரைபடத்தை திருத்தி அமைக்குமாறும், முறைகேடுகளை சரி செய்யுமாறும் டி.என்.ஆர்.இ.ஆர்.ஏ-வில் புகார் அளிக்கப்பட்டது.

இந்த வழக்கை விசாரித்த டி.என்.ஆர்.இ.ஆர்.ஏ, கடந்த 2026 ஜூன் மாதம் பிறப்பித்த உத்தரவில், கட்டுமான நிறுவனம் சி.எம்.டி.ஏ-வின் நிபந்தனைகளை மூன்று மாதங்களுக்குள் பூர்த்தி செய்ய வேண்டும் என்றும், சட்ட செலவுகளுக்காக 25,000 ரூபாயை வழங்க வேண்டும் என்றும் உத்தரவிட்டது. இந்த உத்தரவை எதிர்த்து நியூரி பிராப்பர்ட்டீஸ் பிரைவேட் லிமிடெட் நிறுவனம் மேல்முறையீடு செய்தது. சி.எம்.டி.ஏ வழங்கிய அறிவிக்கை தொடர்பான விஷயங்களில் தீர்ப்பு வழங்க டி.என்.ஆர்.இ.ஆர்.ஏ-விற்கு அதிகாரம் இல்லை என்று அந்த நிறுவனம் வாதிட்டது.

இந்த மேல்முறையீட்டு மனுவை விசாரித்த தமிழ்நாடு ரியல் எஸ்டேட் மேல்முறையீட்டு தீர்ப்பாயம், அக்டோபர் 14-ஆம் தேதி இறுதி உத்தரவை வழங்கியது. 1971-ஆம் ஆண்டின் தமிழ்நாடு நகர மற்றும் ஊரமைப்புச் சட்டத்தின்படி, சி.எம்.டி.ஏ தான் திட்டமிடலுக்கான அதிகாரம் பெற்ற சட்டப்பூர்வ அமைப்பு என்று தீர்ப்பாயம் உறுதிப்படுத்தியது. சி.எம்.டி.ஏ பிறப்பிக்கும் உத்தரவுகளை மறுஆய்வு செய்யும் அல்லது மாற்றியமைக்கும் அதிகாரம் டி.என்.ஆர்.இ.ஆர்.ஏ-விற்கு இல்லை என்று கூறி, கீழ் நீதிமன்றத்தின் உத்தரவை ரத்து செய்தது. கட்டிட மீறல்கள் நிரூபிக்கப்பட்டால், திட்டமிடல் சட்டத்தின் கீழ் சி.எம்.டி.ஏ உரிய நடவடிக்கை எடுக்கலாம் என்றும், பாதிக்கப்பட்டவர்கள் அந்த அமைப்பையே அணுக வேண்டும் என்றும் தீர்ப்பாயம் அறிவுறுத்தியுள்ளது.