தமிழ்நாட்டில் அதிகரிக்கும் வறட்சி பாதிப்பு: 52 ஆண்டுகால காலநிலை ஆய்வின் அதிர்ச்சி தகவல்

இந்தியாவின் முக்கிய வறட்சி பாதிப்பு மண்டலமாக தமிழ்நாடு உருவெடுத்துள்ளதாக 52 ஆண்டுகால காலநிலை ஆய்வு எச்சரிக்கை விடுத்துள்ளது.

இந்தியாவின் தென் தீபகற்பப் பகுதியில், குறிப்பாக தமிழ்நாட்டில் வறட்சியின் தாக்கம் கடந்த சில பத்தாண்டுகளில் கணிசமாக அதிகரித்துள்ளதாக அதிர்ச்சியூட்டும் காலநிலை ஆய்வு ஒன்று சுட்டிக்காட்டியுள்ளது. 1971 முதல் 2022 வரையிலான 52 ஆண்டுகால மழைப்பொழிவு மற்றும் வெப்பநிலை தரவுகளை அடிப்படையாகக் கொண்டு மேற்கொள்ளப்பட்ட இந்த விரிவான ஆய்வு, சர்வதேச காலநிலை இதழில் சமீபத்தில் வெளியிடப்பட்டுள்ளது. தேசிய நடுத்தர கால வானிலை முன்னறிவிப்பு மையம், இந்திய வானிலை ஆய்வு மையம் மற்றும் அட்ரியா பல்கலைக்கழகத்தைச் சேர்ந்த விஞ்ஞானிகள் இணைந்து இந்த ஆய்வை மேற்கொண்டனர்.

இந்த ஆய்வின்படி, வறட்சி, வெப்ப அலைகள், கனமழை மற்றும் வறண்ட காலநிலைகளை உள்ளடக்கிய இந்திய காலநிலை தீவிரத்தன்மை குறியீட்டை ஆராய்ச்சியாளர்கள் உருவாக்கியுள்ளனர். இதன்படி, 2000-ஆம் ஆண்டுக்கு பிறகு தென் தீபகற்பப் பகுதியில் வறட்சியினால் பாதிக்கப்படும் நிலப்பரப்பு தொடர்ந்து அதிகரித்து வருகிறது. பல ஆண்டுகளில் இப்பகுதியின் மொத்த நிலப்பரப்பில் 40 சதவீதத்திற்கும் மேலாக வறட்சி பாதிப்பு பதிவாகியுள்ளது. குறிப்பாக, தமிழ்நாட்டின் கிழக்கு கடற்கரைப் பகுதி நாட்டின் மிக முக்கியமான வறட்சி பாதிப்பு மிகுந்த மண்டலங்களில் ஒன்றாக அடையாளம் காணப்பட்டுள்ளது.

தமிழ்நாட்டின் மழைப்பொழிவு வரலாற்றை உற்றுநோக்கும்போது, வடகிழக்கு பருவமழை தோல்வியடையும் காலங்களில் வறட்சி எவ்வளவு தீவிரமடைகிறது என்பதைப் புரிந்துகொள்ள முடிகிறது. உதாரணமாக, 2016-ஆம் ஆண்டு அக்டோபர் முதல் டிசம்பர் வரையிலான காலக்கட்டத்தில், வழக்கமான 440 மி.மீ மழைப்பொழிவுக்குப் பதிலாக, வெறும் 168.3 மி.மீ மழை மட்டுமே பதிவானது. இது 62 சதவீத குறைபாடாகும். இதன் விளைவாக, மாநிலத்தின் 16,682 வருவாய் கிராமங்களில் 13,305 கிராமங்கள் வறட்சியால் கடுமையாகப் பாதிக்கப்பட்டதாக அறிவிக்கப்பட்டன. மாநிலத்தின் அனைத்து 32 மாவட்டங்களும் அப்போது வறட்சி பாதிப்புக்குள்ளான மாவட்டங்களாகக் கண்டறியப்பட்டன.

தற்போதைய சூழலில், எல் நினோ நிகழ்வினால் ஏற்படக்கூடிய வறட்சி, தண்ணீர் பற்றாக்குறை மற்றும் அணைகளுக்கு வரும் நீர்வரத்து குறைவு ஆகியவற்றை எதிர்கொள்ளும் வகையில் தமிழக அரசு முன்னெச்சரிக்கை நடவடிக்கைகளைத் தொடங்கியுள்ளது. 2027-ஆம் ஆண்டு வரை நீடிக்கக்கூடிய இந்த தண்ணீர் அழுத்தத்தைக் கருத்தில் கொண்டு, விவசாய நடைமுறைகளில் மாற்றங்களைக் கொண்டுவர நிபுணர் குழு பரிந்துரைத்துள்ளது. குறிப்பாக, நீர் மேலாண்மைக்கு உகந்த மற்றும் வறட்சியைத் தாங்கி வளரக்கூடிய பயிர் வகைகளை ஊக்குவிக்கவும், நீர் அதிகம் தேவைப்படும் பயிர்களைக் குறைக்கவும் நடவடிக்கைகள் எடுக்கப்பட வேண்டும் என்று வலியுறுத்தப்பட்டுள்ளது.