ராம் பொத்தினேனியின் இயக்கத்தில் களமிறங்கும் ரித்தேஷ் தேஷ்முக் - RAPO23 படத்தின் புதிய அப்டேட்

நடிகர் ரித்தேஷ் தேஷ்முக், ராம் பொத்தினேனி இயக்கத்தில் உருவாகும் RAPO23 திரைப்படத்தில் முக்கிய கதாபாத்திரத்தில் நடிக்க ஒப்பந்தமாகியுள்ளார்.

தமிழ் மற்றும் தெலுங்கு ரசிகர்களிடையே பெரும் எதிர்பார்ப்பை ஏற்படுத்தியுள்ள திரைப்படம் RAPO23. நடிகர் ராம் பொத்தினேனி கதாநாயகனாக நடிப்பதோடு, முதன்முறையாக இந்தத் திரைப்படத்தின் மூலம் இயக்குநராகவும் அறிமுகமாகிறார். தற்போது இந்தப் படத்தில் பிரபல பாலிவுட் நடிகர் ரித்தேஷ் தேஷ்முக் ஒரு முக்கிய கதாபாத்திரத்தில் நடிக்க ஒப்பந்தம் செய்யப்பட்டுள்ளார் என்ற அதிகாரப்பூர்வ தகவல் வெளியாகியுள்ளது. ஹைதராபாத்தில் நடைபெற்று வரும் இப்படத்தின் தற்போதைய படப்பிடிப்பு தளத்தில், ரித்தேஷ் தேஷ்முக் இணைந்ததற்கான பிடிஎஸ் (BTS) காணொளியை படக்குழுவினர் வெளியிட்டுள்ளனர்.

ரித்தேஷ் தேஷ்முக் ஏற்றுள்ள கதாபாத்திரம் குறித்து தயாரிப்பு தரப்பில் இருந்து பெரிய அளவில் தகவல்கள் வெளியாகவில்லை என்றாலும், கதைக்களத்தில் மிகவும் முக்கியமான மற்றும் அழுத்தமான பாத்திரத்தில் அவர் நடிக்கிறார் என்று கூறப்படுகிறது. பல வித்தியாசமான கதாபாத்திரங்களில் நடித்து முத்திரை பதித்த ரித்தேஷ் தேஷ்முக், ராம் பொத்தினேனியின் இயக்கத்தில் இணைந்திருப்பது படத்தின் மீதான எதிர்பார்ப்பை மேலும் அதிகரித்துள்ளது. முன்னதாக 2026 ஆம் ஆண்டு வெளியான 'ராஜா சிவாஜி' மற்றும் 'தமால் 4' ஆகிய படங்களில் ரித்தேஷ் தேஷ்முக் முக்கிய பணிகளை மேற்கொண்டிருந்தது குறிப்பிடத்தக்கது.

இந்தத் திரைப்படத்தில் நடிகர் ராம் பொத்தினேனி மற்றும் ரித்தேஷ் தேஷ்முக் ஆகியோருடன் இணைந்து நடிகை சம்யுக்தாவும் முக்கிய வேடத்தில் நடிக்கிறார். சம்யுக்தா ஏற்கனவே 'அகண்டா 2' மற்றும் 'நாரி நாரி நடும முராரி' ஆகிய படங்களில் சிறப்பாக நடித்திருந்த நிலையில், தற்போது இந்தப் படத்தில் இணைந்திருப்பது கூடுதல் சிறப்பம்சமாக பார்க்கப்படுகிறது. திறமையான நடிகர்களின் கூட்டணியில் உருவாகும் இப்படம், பிரம்மாண்டமான பொருட்செலவில் தயாராகி வருகிறது.

தொழில்நுட்பக் கலைஞர்களைப் பொறுத்தவரை, இப்படத்திற்கு சாம் சி.எஸ் இசையமைக்கிறார். ஒளிப்பதிவாளராக திருநாவுக்கரசு பணியாற்ற, கலை இயக்குநராக ஏ.எஸ். பிரகாஷ் இணைந்துள்ளார். சண்டைக் காட்சிகளுக்கு பீட்டர் ஹெய்ன், விக்ரம் மோர் மற்றும் கெவின் ஆகியோர் பொறுப்பேற்றுள்ளனர். இப்படத்தை கிருஷ்ணா பொத்தினேனி தனது ராப்போ சினிமாட்டிக்ஸ் பேனரின் கீழ் பிரம்மாண்டமாக தயாரித்து வருகிறார். படத்தின் அடுத்தகட்ட படப்பிடிப்புகள் திட்டமிட்டபடி விறுவிறுப்பாக நடைபெற்று வருகின்றன.