திகில் படங்களிலிருந்து விலகி ரோமியோ ஜூலியட் கதையை இயக்கும் ராபர்ட் எக்கர்ஸ்

புகழ்பெற்ற இயக்குனர் ராபர்ட் எக்கர்ஸ் வில்லியம் ஷேக்ஸ்பியரின் ரோமியோ ஜூலியட் கதையை புதிய படமாக இயக்கவுள்ளார்.

தி லைட்ஹவுஸ் மற்றும் நோஸ்ஃபெராட்டு போன்ற புகழ்பெற்ற திகில் திரைப்படங்களை இயக்கி உலக அளவில் கவனம் ஈர்த்த இயக்குனர் ராபர்ட் எக்கர்ஸ், தனது திரைப்பயணத்தில் ஒரு புதிய மாற்றத்தை மேற்கொள்ளத் தயாராகியுள்ளார். இதுவரை திகில் மற்றும் மர்மம் கலந்த கதைகளைத் தேர்ந்தெடுத்து வந்த அவர், தற்போது வில்லியம் ஷேக்ஸ்பியரின் உலகப் புகழ்பெற்ற காவியமான ரோமியோ ஜூலியட் கதையைத் திரைப்படமாக இயக்க ஒப்பந்தமாகியுள்ளார். இந்த அறிவிப்பு உலக சினிமா ரசிகர்களிடையே பெரும் எதிர்பார்ப்பை ஏற்படுத்தியுள்ளது.

இந்தத் திரைப்படத்தை ராபர்ட் எக்கர்ஸ் தயாரிப்பதோடு இயக்குகிறார் என்பது குறிப்பிடத்தக்கது. புகழ்பெற்ற தயாரிப்பு நிறுவனமான ஃபோகஸ் ஃபீச்சர்ஸ் நிறுவனம் இந்தப் படத்தைத் தயாரிக்க முன்வந்துள்ளது. இந்தத் திரைப்படம் 16-ஆம் நூற்றாண்டின் காலகட்டத்தைப் பிரதிபலிக்கும் வகையில் தத்ரூபமாக உருவாக்கப்பட உள்ளது. குறிப்பாக, அக்காலகட்டத்தின் மொழியமைப்பைப் பாதுகாக்கும் நோக்கில், படத்தில் இடம்பெறும் உரையாடல்கள் அனைத்தும் பழங்கால ஆங்கிலத்தில் (Old English) அமைய வேண்டும் என்பதில் இயக்குனர் உறுதியாக உள்ளார்.

ரோமியோ மற்றும் ஜூலியட் ஆகிய இருவர் இடையேயான தடைசெய்யப்பட்ட காதலையும், அவர்களது குடும்பங்களுக்கு இடையேயான பகையையும் மையமாகக் கொண்ட இந்தக் கதை, இத்தாலியின் வெரோனா நகரில் நடப்பதாக அமைக்கப்பட்ட ஒரு காலத்தால் அழியாத சோகக் காவியமாகும். பல தசாப்தங்களாகப் பல மேடை நாடகங்களாகவும், திரைப்படங்களாகவும் இந்தக் கதை கையாளப்பட்டிருந்தாலும், ராபர்ட் எக்கர்ஸின் தனித்துவமான இயக்க பாணியில் இந்தத் திரைப்படம் எப்படி உருவாகப்போகிறது என்பது பெரும் எதிர்பார்ப்பை உருவாக்கியுள்ளது. முன்னதாக, இயக்குனர் பாஸ் லுஹ்ர்மான் இயக்கத்தில் லியோனார்டோ டிகாப்ரியோ மற்றும் கிளேர் டேன்ஸ் நடிப்பில் வெளிவந்த ரோமியோ ஜூலியட் திரைப்படம் பெரும் வரவேற்பைப் பெற்றிருந்தது.

இதற்கிடையில், ராபர்ட் எக்கர்ஸ் தனது மற்றுமொரு படைப்பான 'வெர்வூஃப்' திரைப்படத்தை வெளியிடுவதற்கான பணிகளில் தீவிரமாக ஈடுபட்டுள்ளார். 14-ஆம் நூற்றாண்டு இங்கிலாந்தை மையமாகக் கொண்ட இந்தப் படத்தில் ஆரோன் டெய்லர் ஜான்சன் முதன்மை கதாபாத்திரத்தில் நடிக்கிறார். சாபத்திற்குள்ளான விவசாயி ஒருவரின் குடும்பம், அந்த விவசாயியால் தங்களுக்கு ஏற்படும் ஆபத்திலிருந்து தங்களை எப்படிக் காத்துக்கொள்கிறது என்பதே இப்படத்தின் மையக்கருவாகும். இந்த படத்தின் வெளியீட்டுத் தேதி குறித்த அதிகாரப்பூர்வ தகவல் விரைவில் வெளியாகும் என எதிர்பார்க்கப்படுகிறது.