சேலம்: பருவமழை பொய்த்ததால் கருகிய பயிர்கள் - வேதனையில் விவசாயிகள்

சேலத்தில் தென்மேற்கு பருவமழை பொய்த்ததால் சோளம், மக்காச்சோளம் மற்றும் மஞ்சள் பயிர்கள் கருகி விவசாயிகள் கடும் நஷ்டத்தை சந்தித்துள்ளனர்.

சேலம் மாவட்டத்தின் பல்வேறு பகுதிகளில் தென்மேற்கு பருவமழை போதிய அளவு பெய்யாத காரணத்தினால், விவசாயம் பெரும் பாதிப்புக்குள்ளாகியுள்ளது. குறிப்பாக தலைவாசல், தம்மம்பட்டி, ஆத்தூர் மற்றும் பெத்தநாயக்கன்பாளையம் ஆகிய பகுதிகளில் வானம் பார்த்த பூமியாக விவசாய நிலங்கள் இருப்பதால், நீர்ப்பாசன வசதிகள் குறைவாக உள்ள விவசாயிகள் கடுமையான நெருக்கடியைச் சந்தித்து வருகின்றனர். எதிர்பார்ப்பிற்கு மாறாக மழை பொய்த்ததால், இப்பகுதிகளில் பயிரிடப்பட்டிருந்த மக்காச்சோளம் மற்றும் சோளம் பயிர்கள் அறுவடைக்கு முன்பே கருகி வீணாகின.

விவசாயிகள் தங்களது வாழ்வாதாரத்திற்காக முதலீடு செய்து பயிரிட்ட பயிர்கள், போதிய ஈரப்பதம் இன்றி முழுமையாக காய்ந்துவிட்டன. இதனால் அறுவடை செய்து விற்பனைக்கு கொண்டு செல்ல வழியின்றி விவசாயிகள் பரிதவிக்கின்றனர். தங்களின் விளைநிலங்களில் காய்ந்துபோன பயிர்களைக் கால்நடைகளுக்கு தீவனமாகப் பயன்படுத்தும் நிலைக்கு விவசாயிகள் தள்ளப்பட்டுள்ளனர். கால்நடைகள் உண்ண முடியாத நிலையில் உள்ள உலர்ந்த பயிர்களை, டிராக்டர் மூலம் அழித்து அகற்றும் பணிகளில் விவசாயிகள் ஈடுபட்டு வருகின்றனர்.

சேலம் மாவட்ட விவசாயிகள் நல சங்கத்தின் தலைவர் வி.எஸ்.கோவிந்தராஜ் இதுகுறித்து கூறுகையில், பயிர்கள் முழுமையாக காய்ந்து போனதால் அறுவடை செய்ய வாய்ப்பே இல்லை என்றும், வேறு வழியின்றி கால்நடைகளுக்கு தீவனமாகப் பயன்படுத்துவதைத் தவிர விவசாயிகளுக்கு வேறு வழியில்லை என்றும் வேதனை தெரிவித்தார். சில வகை பயிர்கள் கால்நடைகளுக்குப் பொருந்தாததால், அவற்றையும் நிலத்திலிருந்து அகற்றி சுத்தம் செய்ய வேண்டிய கட்டாயத்தில் விவசாயிகள் உள்ளனர். இது அவர்களுக்கு கூடுதல் செலவை ஏற்படுத்தியுள்ளது.

இதேபோன்ற பாதிப்பு ஓமலூர் மற்றும் காடையாம்பட்டி பகுதிகளிலும் நிலவுகிறது. அங்கு பயிரிடப்பட்டிருந்த மஞ்சள் பயிர்கள், போதிய மழையின்மை மற்றும் பூச்சிகளின் தாக்குதலால் பெரும் சேதமடைந்துள்ளன. தற்போதைய உயர் வெப்பநிலையால் பூச்சிக்கொல்லிகளை தெளித்தும் பயிர்களைக் காப்பாற்ற முடியவில்லை என்று விவசாயிகள் தெரிவிக்கின்றனர். வருமானம் ஏதுமின்றி, கருகிய மஞ்சள் பயிர்களை டிராக்டர்களைக் கொண்டு அழித்து அகற்றும் அவல நிலையில் விவசாயிகள் உள்ளனர். பருவமழை தவறியதால் ஏற்பட்ட இந்த பாதிப்பு, இப்பகுதி விவசாயிகளின் பொருளாதாரத்தை பெரிதும் சீர்குலைத்துள்ளது.