சேலத்தில் பயங்கரம்: 15 கோடி ரூபாய் மதிப்புள்ள 600 கிலோ வெள்ளி கொள்ளை

சேலத்தில் உள்ள தனியார் கிடங்கில் புகுந்த மர்ம கும்பல் 600 கிலோ வெள்ளிப் பொருட்களை கொள்ளையடித்துச் சென்ற சம்பவம் பெரும் பரபரப்பை ஏற்படுத்தியுள்ளது.

சேலம் மாநகரம் சினிமா நகர் பகுதியில் அமைந்துள்ள ஒரு தனியார் வெள்ளிப் பொருட்கள் கிடங்கில், சுமார் 15 கோடி ரூபாய் மதிப்புள்ள 600 கிலோ வெள்ளிப் பொருட்கள் கொள்ளையடிக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. திங்கள்கிழமை அதிகாலை சுமார் 1 மணி அளவில் இந்த துணிகரக் கொள்ளை சம்பவம் அரங்கேறியுள்ளது. இந்த கிடங்கு, அந்தப் பகுதியைச் சேர்ந்த மொத்த வெள்ளி வர்த்தகர் மற்றும் நகை உற்பத்தியாளரான 60 வயதுடைய பாலசுப்பிரமணியம் என்பவருக்குச் சொந்தமானது. வழக்கமாக நகை தயாரிப்புக்காக கொள்முதல் செய்யப்படும் வெள்ளிப் பொருட்கள் அனைத்தும் இந்த பாதுகாப்புக் கிடங்கில் வைக்கப்பட்டிருந்த நிலையில், மர்ம நபர்கள் அதனை நோட்டமிட்டு கைவரிசை காட்டியுள்ளனர்.

நான்கு பேர் கொண்ட முகமூடி அணிந்த மர்ம கும்பல் ஒன்று, அதிகாலை நேரத்தில் கிடங்கிற்குள் நுழைந்துள்ளது. அப்போது அங்கு பணியில் இருந்த பாதுகாப்பு காவலரான 60 வயதுடைய வெங்கடேசன் என்பவரை அந்த கும்பல் சரமாரியாகத் தாக்கி, பின்னர் அவரை கயிறுகளால் கட்டிப் போட்டுள்ளது. கொள்ளையர்கள் கிடங்கின் கதவுகளை உடைத்து உள்ளே சென்று, சுமார் 600 கிலோ எடையுள்ள வெள்ளிப் பொருட்களைக் கொள்ளையடித்துள்ளனர். அங்கிருந்த கண்காணிப்பு கேமராக்களின் அமைப்புகளைக் கூட இந்த மர்ம கும்பல் பழுதுபடுத்தி, தடயங்கள் சிக்காமல் தப்பிச் செல்ல முயற்சித்துள்ளது.

சம்பவம் நடந்த சிறிது நேரத்தில், கட்டி வைக்கப்பட்டிருந்த நிலையிலிருந்து எப்படியோ தன்னை விடுவித்துக்கொண்ட காவலர் வெங்கடேசன், உரிமையாளர் பாலசுப்பிரமணியத்திற்குத் தகவல் தெரிவித்துள்ளார். அதிகாலை 5 மணி அளவில் கிடங்கிற்கு விரைந்து வந்த உரிமையாளர், கொள்ளைச் சம்பவம் குறித்து பள்ளப்பட்டி காவல் நிலையத்திற்குத் தகவல் அளித்தார். காயமடைந்த காவலர் வெங்கடேசன் மீட்கப்பட்டு, சிகிச்சைக்காக சேலம் அரசு மருத்துவமனைக்கு அனுப்பி வைக்கப்பட்டார். அங்கு அவருக்கு உரிய மருத்துவ சிகிச்சைகள் அளிக்கப்பட்டு வருகின்றன.

தகவலறிந்ததும் சேலம் மாநகர காவல் ஆணையர் ஏ.ஜி.பாபு சம்பவ இடத்திற்கு வந்து நேரில் ஆய்வு மேற்கொண்டார். தடயவியல் நிபுணர்கள் வரவழைக்கப்பட்டு, கொள்ளையர்களின் கைரேகைகள் மற்றும் முக்கிய ஆதாரங்கள் சேகரிக்கப்பட்டன. இக்கொள்ளைச் சம்பவம் குறித்து வழக்கு பதிவு செய்துள்ள காவல்துறையினர், குற்றவாளிகளைப் பிடிக்க தனிப்படை அமைத்துள்ளனர். சுற்றியுள்ள பகுதிகளில் உள்ள சிசிடிவி கேமராக்களின் பதிவுகளை ஆய்வு செய்து, கொள்ளையர்கள் தப்பிச் சென்ற வழித்தடங்களை கண்டறியும் பணியில் காவல் துறையினர் தீவிரமாக ஈடுபட்டு வருகின்றனர்.