டிஎன்பிஎல் கிரிக்கெட்: திருப்பூர் தமிழன்ஸ் அணியை வீழ்த்தி முதல் வெற்றியைப் பதிவு செய்த சேலம் ஸ்பார்டன்ஸ்

டிஎன்பிஎல் 2026 தொடரில் சேலம் ஸ்பார்டன்ஸ் அணி தனது முதல் வெற்றியை பதிவு செய்துள்ளது.

சென்னை எம்.ஏ. சிதம்பரம் மைதானத்தில் நடைபெற்ற டிஎன்பிஎல் 2026 தொடரின் லீக் ஆட்டத்தில், சேலம் ஸ்பார்டன்ஸ் மற்றும் திருப்பூர் தமிழன்ஸ் அணிகள் மோதின. இந்த போட்டியில் சேலம் ஸ்பார்டன்ஸ் அணி 45 ரன்கள் வித்தியாசத்தில் அபார வெற்றி பெற்று, நடப்பு தொடரில் தனது முதல் வெற்றியை பதிவு செய்துள்ளது. புள்ளிகள் பட்டியலில் கடைசி இடத்தில் இருந்தாலும், இந்த வெற்றி அந்த அணிக்கு ஆறுதலைத் தந்துள்ளதாக கருதப்படுகிறது.

முதலில் பேட்டிங் செய்த சேலம் ஸ்பார்டன்ஸ் அணியின் தொடக்க ஆட்டக்காரர்களான அபிஷேக் மற்றும் பூபதி வைஷ்ணவ் குமார் ஆகியோர் அதிரடியாக விளையாடி 26 பந்துகளில் 47 ரன்களைச் சேர்த்தனர். இருப்பினும், திருப்பூர் அணியின் மதிவாணன் 3 விக்கெட்டுகளைக் கைப்பற்றி சேலம் அணியின் ரன் வேகத்தைக் கட்டுப்படுத்தினார். பின்னர் ஜோடி சேர்ந்த ஈஸ்வரன் மற்றும் கார்த்திக் மணிகண்டன் ஆகியோர் அணியைச் சரிவிலிருந்து மீட்டெடுத்தனர். கார்த்திக் மணிகண்டன் தனது முதல் டிஎன்பிஎல் அரைசதத்தை அடித்து அசத்த, சேலம் அணி 20 ஓவர்களில் 8 விக்கெட் இழப்பிற்கு 169 ரன்களை எட்டியது.

170 ரன்கள் என்ற வெற்றி இலக்கை நோக்கி களமிறங்கிய திருப்பூர் தமிழன்ஸ் அணிக்கு, தொடக்க ஆட்டக்காரர்கள் அமித் சாத்விக் மற்றும் துஷார் ரஹேஜா சிறப்பான தொடக்கத்தை அளித்தனர். ஆனால், முகமது எம். பொய்யாமொழி வீசிய பந்துவீச்சில் அமித் சாத்விக் ஆட்டமிழந்தது ஆட்டத்தின் போக்கை மாற்றியது. அனுபவமிக்க சுழற்பந்து வீச்சாளர் ராகில் ஷா, 41 வயதிலும் தனது அபார திறமையை வெளிப்படுத்தி திருப்பூர் அணியின் முக்கிய விக்கெட்டுகளை அடுத்தடுத்து வீழ்த்தி நிலைகுலைய வைத்தார். துஷார் ரஹேஜா தனி ஒருவராகப் போராடி 75 ரன்களை எடுத்த போதிலும், மற்ற வீரர்கள் சொற்ப ரன்களில் ஆட்டமிழந்ததால் திருப்பூர் அணி 124 ரன்களுக்கு 9 விக்கெட்டுகளை இழந்து தோல்வியைத் தழுவியது.

ஆட்டத்திற்குப் பிறகு கருத்து தெரிவித்த சேலம் அணியின் கேப்டன் அபிஷேக், இந்த தோல்விகள் தங்களுக்குப் பெரிய பாடத்தைக் கற்றுக்கொடுத்துள்ளதாகவும், பேட்டிங் வரிசையில் வலுவான கூட்டணியை அமைப்பதே அடுத்த ஆண்டிற்கான முக்கிய இலக்காக இருக்கும் என்றும் குறிப்பிட்டார். அதேபோல் நடைபெற்ற மற்றொரு ஆட்டத்தில் மதுரை பேந்தர்ஸ் அணி, நெல்லை ராயல் கிங்ஸ் அணியை வீழ்த்தியது. இந்த தொடரின் பிளே-ஆஃப் சுற்றுகளுக்கு மதுரை, திருச்சி, கோவை மற்றும் திருப்பூர் ஆகிய அணிகள் தகுதி பெற்றுள்ளன.