சாலிகிராமம் அடுக்குமாடி குடியிருப்பு விவகாரம்: 30 மாதங்களுக்குள் கட்டுமானத்தை முடிக்க உயர் நீதிமன்றம் உத்தரவு

சென்னை சாலிகிராமத்தில் உள்ள அடுக்குமாடி குடியிருப்பினை 30 மாதங்களுக்குள் கட்டி முடிக்க ஜெயின் ஹவுசிங் நிறுவனத்திற்கு சென்னை உயர் நீதிமன்றம் உத்தரவிட்டுள்ளது.

சென்னை சாலிகிராமம் பகுதியில் அமைந்துள்ள ஜெயின்ஸ் வெஸ்ட்மின்ஸ்டர் அடுக்குமாடி குடியிருப்பு, கட்டுமான குறைபாடுகள் மற்றும் பாதிப்புகள் காரணமாக இடிக்கப்பட்டது. இந்த விவகாரம் தொடர்பாக அடுக்குமாடி குடியிருப்பு உரிமையாளர்கள் மற்றும் உரிமையாளர்கள் சங்கம் சார்பில் 2022-ஆம் ஆண்டு தாக்கல் செய்யப்பட்ட மனுக்களை விசாரித்த சென்னை உயர் நீதிமன்ற நீதிபதிகள் எஸ்.எம்.சுப்பிரமணியம் மற்றும் ஆர்.ராஜேஷ் விவேகானந்தன் அடங்கிய அமர்வு, தற்போது முக்கிய தீர்ப்பினை வழங்கியுள்ளது. இதன்படி, கட்டுமான நிறுவனமான ஜெயின் ஹவுசிங் அண்ட் கன்ஸ்ட்ரக்ஷன்ஸ் லிமிடெட் நிறுவனம், சர்ச்சைக்குரிய அந்த இடத்தில் 21 மாடிகளைக் கொண்ட புதிய அடுக்குமாடி குடியிருப்பினை மீண்டும் கட்டி முடிக்க வேண்டும் என உத்தரவிடப்பட்டுள்ளது.

நீதிமன்றத்தின் இந்த உத்தரவின்படி, சென்னை மாநகராட்சி ஆணையர், உள்ளாட்சி அமைப்புகளின் சட்ட விதிகளுக்கு உட்பட்டு, உரிய கட்டிட அனுமதி சான்றிதழை நீதிமன்ற உத்தரவு நகல் பெற்ற இரண்டு வாரங்களுக்குள் வழங்க வேண்டும் என அறிவுறுத்தப்பட்டுள்ளது. அந்த கட்டிட அனுமதியைப் பெற்ற பிறகு, கட்டுமான நிறுவனம் பணிகளைத் தொடங்கி, அடுத்த 30 மாதங்களுக்குள் 21 அடுக்கு மாடி குடியிருப்பு கட்டுமானப் பணிகளை முழுமையாக நிறைவு செய்ய வேண்டும் என நீதிபதிகள் காலக்கெடு விதித்துள்ளனர். கட்டுமானப் பணிகள் தரம் மாறாமல் நடைபெறுவதை உறுதி செய்ய வேண்டும் என்பதில் நீதிமன்றம் உறுதியாக உள்ளது.

கட்டுமானப் பணிகள் முறையாக நடைபெறுவதை உறுதி செய்ய, சென்னை மாநகராட்சி மற்றும் சென்னை பெருநகர வளர்ச்சிக் குழுமம் (சிஎம்டிஏ) ஆகிய அமைப்புகள் அவ்வப்போது நேரில் ஆய்வு செய்ய வேண்டும் என நீதிமன்றம் உத்தரவிட்டுள்ளது. கட்டிடங்கள் அங்கீகரிக்கப்பட்ட திட்ட வரைபடத்தின்படியும், நிர்ணயிக்கப்பட்ட கட்டுமானத் தரநிலைகளின்படியும் அமைக்கப்படுவதை இந்த அமைப்புகள் கண்காணிக்க வேண்டும். இதற்கென ஓய்வு பெற்ற உயர் நீதிமன்ற நீதிபதிகள் அடங்கிய குழுவின் மேற்பார்வை தற்போது தேவைப்படாது என்றும் நீதிபதிகள் தெரிவித்துள்ளனர். எவ்வாறாயினும், கட்டிடத்தின் கட்டமைப்பு வடிவமைப்பு சட்ட விதிகளுக்கு உட்பட்டு இருப்பதை உறுதி செய்ய நிபுணர்களை நியமிக்க வேண்டும் என கட்டுமான நிறுவனத்திற்கு அறிவுறுத்தப்பட்டுள்ளது.

மேற்கண்ட கட்டுமானப் பணிகள் நிறைவடையும் காலம் வரை, பாதிக்கப்பட்ட பிளாட் உரிமையாளர்களுக்கு அந்த நிறுவனம் மாதாந்திர வாடகைத் தொகையை நேரடியாக வழங்க வேண்டும் என்றும் நீதிமன்றம் உத்தரவு பிறப்பித்துள்ளது. உரிமையாளர்களின் கருத்துகளைக் கேட்டறிந்த பிறகு, வீடுகளை மறுசீரமைப்பு (re-development) செய்ய நீதிமன்றம் உத்தரவிட்டதன் மூலம், புதிய குடியிருப்புகளில் உரிமையாளர்களுக்கு கூடுதல் இடவசதி கிடைக்க வாய்ப்பு ஏற்பட்டுள்ளது. இந்த உத்தரவு பாதிக்கப்பட்ட வீட்டு உரிமையாளர்கள் மத்தியில் நீண்டகாலப் போராட்டத்திற்குப் பிறகு ஒரு நம்பிக்கையை ஏற்படுத்தியுள்ளது.