மணல் குவாரி முறைகேடு வழக்கு: முன்னாள் அமைச்சர் துரைமுருகன் உட்பட பலர் மீது லஞ்ச ஒழிப்புத்துறை அதிரடி வழக்குப்பதிவு

தமிழகத்தில் மணல் குவாரி முறைகேடு தொடர்பாக முன்னாள் அமைச்சர் துரைமுருகன் மற்றும் அதிகாரிகள் மீது லஞ்ச ஒழிப்புத் துறை வழக்குப்பதிவு செய்து 34 இடங்களில் அதிரடி சோதனை நடத்தியுள்ளது.

தமிழ்நாட்டில் கடந்த 2021 முதல் 2024-ஆம் ஆண்டு வரையிலான காலக்கட்டத்தில், மணல் குவாரிகளில் நடைபெற்ற முறைகேடுகள் தொடர்பாக முன்னாள் நீர்வளத்துறை அமைச்சர் துரைமுருகன் மற்றும் முக்கிய அதிகாரிகள் மீது லஞ்ச ஒழிப்பு மற்றும் ஊழல் தடுப்பு இயக்குநரகம் (DVAC) வழக்குப்பதிவு செய்துள்ளது. இந்த வழக்கில் நீர்வளத்துறையின் இரண்டு ஓய்வுபெற்ற தலைமைப் பொறியாளர்கள், 14 அரசு ஊழியர்கள் மற்றும் 10 தனியார் நபர்கள் மற்றும் நிறுவனங்களும் சேர்க்கப்பட்டுள்ளனர். மாநில அரசுக்கு சுமார் 1,427 கோடி ரூபாய் அளவிற்கு வருவாய் இழப்பு ஏற்படுத்தியதாகக் கூறப்படும் இந்த விவகாரம், தமிழக அரசியல் களத்தில் பெரும் பரபரப்பை ஏற்படுத்தியுள்ளது.

இந்த வழக்கு தொடர்பாக சென்னை, புதுக்கோட்டை, திருச்சி, கரூர், வேலூர், மதுரை, திண்டுக்கல், சிவகங்கை, கோவை, சேலம், நாமக்கல் மற்றும் புதுச்சேரி ஆகிய இடங்களில் உள்ள 34 இடங்களில் லஞ்ச ஒழிப்புத்துறையினர் வெள்ளிக்கிழமை அதிரடி சோதனையில் ஈடுபட்டனர். சோதனையின் முடிவில் முக்கியத்துவம் வாய்ந்த 825 ஆவணங்கள், 11 மின்னணு சாதனங்கள் மற்றும் மூன்று வங்கி லாக்கர் சாவிகள் பறிமுதல் செய்யப்பட்டுள்ளன. முறைகேடுகள் குறித்த விசாரணையை லஞ்ச ஒழிப்புத்துறை தீவிரப்படுத்தியுள்ளது.

அமலாக்கத்துறை (ED), அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் மற்றும் எஸ். தமிழ் செல்வன் ஆகியோர் அளித்த புகார்களின் அடிப்படையில் இந்த வழக்கு பதியப்பட்டுள்ளது. 28 ஆற்று மணல் குவாரிகளுக்கான ஒப்பந்தங்கள் வெளிப்படையான ஏலத்திற்குப் பதிலாக, குறைந்தபட்ச ஏல முறையைப் பயன்படுத்தி வழங்கப்பட்டதாகப் புகார்கள் தெரிவிக்கின்றன. மேலும், அனுமதிக்கப்பட்ட அளவை விட கூடுதலாக மணல் அள்ளப்பட்டது மற்றும் போலி ஆவணங்கள் மூலம் சட்டவிரோதமாக மணல் போக்குவரத்து மேற்கொள்ளப்பட்டது போன்ற குற்றச்சாட்டுகள் முன்வைக்கப்பட்டுள்ளன.

குறிப்பாக திண்டுக்கல்லில் மணல் ஒப்பந்ததாரர் கே. ரத்தினம் மற்றும் புதுக்கோட்டையில் மணல் ரவி என அறியப்படும் ராமச்சந்திரன் உள்ளிட்டோரின் வீடுகள் மற்றும் அலுவலகங்களில் சோதனை நடத்தப்பட்டது. அதேபோல் திருச்சியில் அரசுப் பொறியாளர்களின் வீடுகளிலும் சோதனைகள் மேற்கொள்ளப்பட்டன. கடந்த காலங்களில் சில குறிப்பிட்ட ஒப்பந்ததாரர்கள் மீது மத்திய அமைப்புகளும் விசாரணை நடத்தியிருந்த நிலையில், தற்போது தமிழக லஞ்ச ஒழிப்புத்துறையின் இந்த அதிரடி நடவடிக்கை விசாரணை வளையத்தை விரிவுபடுத்தியுள்ளது.