சாஸ்த்ரா பல்கலைக்கழக நில ஆக்கிரமிப்பு விவகாரம்: தமிழக அரசுக்கு உச்ச நீதிமன்றம் முக்கிய பரிந்துரை

தஞ்சாவூர் சாஸ்த்ரா பல்கலைக்கழகம் ஆக்கிரமித்துள்ள நில விவகாரத்தில், மாற்று நிலத்தை ஏற்றுக்கொள்வது குறித்து தமிழக அரசு பரிசீலிக்க உச்ச நீதிமன்றம் அறிவுறுத்தல்.

தஞ்சாவூரில் உள்ள சாஸ்த்ரா பல்கலைக்கழகம் சுமார் 31.37 ஏக்கர் நிலத்தை ஆக்கிரமித்துள்ளதாகக் கூறப்படும் வழக்கில், அந்தப் பல்கலைக்கழக வளாகத்தை இடிப்பதற்குப் பதிலாக, மாற்று நிலத்தைப் பெற்றுக்கொள்வது குறித்து தமிழக அரசு பரிசீலிக்க வேண்டும் என உச்ச நீதிமன்றம் அறிவுறுத்தியுள்ளது. இந்த விவகாரத்தில் தமிழக அரசின் நிலைப்பாடு மிகவும் பிடிவாதமாக இருப்பதாகக் குறிப்பிட்ட நீதிமன்றம், கல்வி நிறுவனங்களுக்கான நிலப் பயன்பாட்டை வணிக ரீதியான ஆக்கிரமிப்புகளுடன் ஒப்பிட முடியாது என்பதைச் சுட்டிக்காட்டியுள்ளது.

உச்ச நீதிமன்ற தலைமை நீதிபதி சூர்யா காந்த் தலைமையிலான நீதிபதிகள் ஜாய்மால்யா பாக்ஜி மற்றும் வி. மோகனா ஆகியோர் அடங்கிய அமர்வு இந்த வழக்கினை விசாரித்தது. அப்போது, பல்கலைக்கழகத்தின் சார்பில் ஆஜரான மூத்த வழக்கறிஞர் சி.எஸ். வைத்தியநாதன், தாங்கள் முன்வைத்த மாற்று நிலம் குறித்த ஆலோசனைகளை அரசு கவனத்தில் கொள்ளவில்லை என வாதிட்டார். இதற்குப் பதிலளித்த தமிழக அரசு தரப்பு மூத்த வழக்கறிஞர் ராகேஷ் துவிவேதி, பல்கலைக்கழகம் தரப்பில் வழங்கப்பட்ட மாற்று நிலங்கள் அந்தத் திட்டத்திற்கு உகந்ததாக இல்லை என்று தெரிவித்தார்.

நீதிமன்றத்தில் நடைபெற்ற விசாரணையின் போது, அந்த இடத்தில் திறந்தவெளி சிறைச்சாலை திட்டத்தை அமைக்க அரசு திட்டமிட்டுள்ளதாகவும், ஆனால் நிலம் மீதான வழக்கு காரணமாக அதைக் செயல்படுத்த முடியவில்லை என்றும் அரசுத் தரப்பில் தெரிவிக்கப்பட்டது. இதைக் கேட்ட தலைமை நீதிபதி, திறந்தவெளி சிறைச்சாலைக்காக அரசுக்குத் தேவையான நிலத்தை அடையாளம் காணுமாறும், அதற்குப் பதிலாக அந்த நிலத்தை பல்கலைக்கழக நிர்வாகமே சந்தை மதிப்பை விட 5 முதல் 10 மடங்கு கூடுதல் விலை கொடுத்து வாங்கும்படி அறிவுறுத்தலாம் எனப் பரிந்துரைத்தார். இத்தகைய நடவடிக்கை ஆக்கிரமிப்புகளை ஊக்குவிப்பதாக அமையாது என்பதையும் நீதிபதிகள் தெளிவுபடுத்தினர்.

தஞ்சாவூர் மாவட்டம் திருமலைசமுத்திரத்தில் செயல்பட்டு வரும் சாஸ்த்ரா நிகர்நிலை பல்கலைக்கழகத்தின் மீது சுமத்தப்பட்டுள்ள ஆக்கிரமிப்பு குற்றச்சாட்டுகள் மற்றும் சென்னை உயர் நீதிமன்றம் கடந்த ஜனவரி 9 ஆம் தேதி பிறப்பித்த உத்தரவை எதிர்த்து பல்கலைக்கழக நிர்வாகம் இந்த மேல்முறையீட்டைச் செய்துள்ளது. அரசு தனது நிலத்தைக் கையகப்படுத்தி பல்கலைக்கழகத்தை வெளியேற்ற வேண்டும் என்ற முந்தைய உயர் நீதிமன்றத் தீர்ப்புக்கு எதிராகப் பல்கலைக்கழகம் வாதிட்டு வருகிறது. இந்த வழக்கில் தமிழக அரசு தரப்பில் கூடுதல் ஆலோசனைகளைப் பெற்றுத் தெரிவிக்க அவகாசம் கோரப்பட்டதையடுத்து, விசாரணையை நீதிமன்றம் ஒத்திவைத்தது.