மன்னார் வளைகுடா கடற்கரையில் கரை ஒதுங்கிய கடல் பாசிகள்: மீனவர்கள் மத்தியில் நிலவும் அச்சம்

மன்னார் வளைகுடா பகுதியில் கடல் பாசி மற்றும் இறந்த மீன்கள் கரை ஒதுங்கியுள்ளதால் மீனவர்கள் கவலையடைந்துள்ளனர்.

ராமநாதபுரம் மாவட்டம், மன்னார் வளைகுடா கடற்கரைப் பகுதிகளில் வழக்கத்திற்கு மாறாக அதிக அளவிலான கடல் பாசிகளும், இறந்த மீன்களும் கரை ஒதுங்கியுள்ள சம்பவம் மீனவர்களிடையே பெரும் கவலையை ஏற்படுத்தியுள்ளது. ராமேஸ்வரம் அருகில் உள்ள பாம்பன், குந்துகால் மற்றும் மண்டபம் ஆகிய கடற்கரை பகுதிகளில் 'பாடினா' எனப்படும் விசிறி வடிவிலான கடல் பாசிகள் பெருமளவில் குவிந்து காணப்படுகின்றன. இதனால் அப்பகுதி முழுவதும் துர்நாற்றம் வீசுவதுடன், கடலோரப் பகுதிகளில் கடல் நீர் சேறும் சகதியுமாக மாறியுள்ளது.

வழக்கமாக வடகிழக்கு பருவமழைக் காலங்களில் கடல் சீற்றம் மற்றும் காற்று காரணமாக இத்தகைய பாசிகள் கரை ஒதுங்குவது வழக்கம் என்று மீனவர்கள் தெரிவிக்கின்றனர். ஆனால், இந்த ஆண்டு பருவமழை தொடங்குவதற்கு முன்னரே இவ்வளவு அதிகப்படியான பாசிகள் கரை ஒதுங்கியுள்ளது அசாதாரணமான ஒன்றாகக் கருதப்படுகிறது. பாம்பன் பகுதியைச் சேர்ந்த மீனவர் எஸ். பாஷா இது குறித்து கூறுகையில், இந்த பாசிகளின் வருகை மற்றும் கடலில் காணப்படுபடும் மாற்றங்கள் தங்களுக்கு அதிர்ச்சியை ஏற்படுத்தியுள்ளதாகத் தெரிவித்துள்ளார்.

கடலில் காணப்படும் இந்த மாற்றங்கள் மற்றும் இறந்த மீன்களின் எண்ணிக்கை குறித்த உரிய ஆய்வை மேற்கொள்ள வேண்டுமென மீனவர்கள் மீன்வளத்துறைக்கும், கடல்சார் ஆராய்ச்சி நிறுவனங்களுக்கும் கோரிக்கை விடுத்துள்ளனர். இந்த பாசிகள் பாறைகள் நிறைந்த பகுதிகளில் அடர்த்தியாக வளரும் தன்மை கொண்டவை என்பதால், அங்கு வாழும் மீன்களின் சுவாசத்திற்குப் பாதிப்பு ஏற்படலாம் என அஞ்சப்படுகிறது. மேலும், கடலோரச் சூழலியலில் ஏற்பட்டுள்ள இந்த மாற்றம் எதனால் என்பதைத் தெளிவுபடுத்த வேண்டியது அவசியமாகிறது.

கடல்சார் வல்லுநர்கள் இது குறித்து கருத்து தெரிவிக்கையில், தற்போது மக்கள் பீதியடையத் தேவையில்லை என்றும், இருப்பினும் மன்னார் வளைகுடா பகுதியில் நிகழும் சுற்றுச்சூழல் மாற்றங்களைத் தொடர்ந்து கண்காணிக்க வேண்டியது அவசியம் என்று வலியுறுத்தியுள்ளனர். கடல் நீரோட்டங்கள் மற்றும் நீருக்கடியில் ஏற்படும் சூழலியல் மாற்றங்கள் காரணமாக இத்தகைய பாசி வளர்ச்சி ஏற்படுவதாகக் கருதப்பட்டாலும், தொடர்ச்சியான கண்காணிப்பு மற்றும் ஆய்வுகள் மூலம் மட்டுமே கடல் வாழ் உயிரினங்களின் பாதுகாப்பு மற்றும் சுற்றுச்சூழல் சமநிலையை உறுதி செய்ய முடியும் என ஆய்வாளர்கள் தெரிவித்துள்ளனர்.