எளிமையான கதாபாத்திரங்களே சவாலானவை - மனம் திறந்த நடிகர் ஃபஹத் பாசில்

டான்ட் டிரபுள் த டிரபுள் திரைப்படத்தின் வெளியீட்டிற்கு முன்னதாக, தனது புதிய கதாபாத்திரம் மற்றும் நடிப்பு அனுபவம் குறித்து நடிகர் ஃபஹத் பாசில் மனம் திறந்துள்ளார்.

இந்திய சினிமாவில் தனித்துவமான நடிப்புத் திறமையால் ரசிகர்களைக் கவர்ந்தவர் நடிகர் ஃபஹத் பாசில். தற்போது தெலுங்குத் திரையுலகில் முதல்முறையாக கதாநாயகனாக அறிமுகமாகும் டான்ட் டிரபுள் த டிரபுள் (Don't Trouble the Trouble) திரைப்படம் வெள்ளிக்கிழமை வெளியாகிறது. ஷஷாங்க் ஏலேட்டி இயக்கியுள்ள இப்படத்தை எஸ்.எஸ். ராஜமௌலி வழங்க, எஸ்.எஸ். கார்த்திகேயா, ஷோபு யார்லகடா மற்றும் பிரசாத் தேவினேனி ஆகியோர் தயாரித்துள்ளனர். இப்படம் குழந்தைகளுக்கானது மட்டுமல்லாமல், பெரியவர்களையும் கவரும் வகையில் நேர்த்தியாக உருவாக்கப்பட்டுள்ளதாக ஃபஹத் பாசில் தெரிவித்துள்ளார்.

இந்தத் திரைப்படத்தில் ஃபஹத் பாசில் ஒரு மேஜிக் கலைஞர் கதாபாத்திரத்தில் நடித்துள்ளார். வழக்கமான தனது தீவிரமான வேடங்களிலிருந்து மாறுபட்டு, இது சற்று வித்தியாசமான மற்றும் கலகலப்பான கதாபாத்திரம் என்று குறிப்பிடும் அவர், எளிமையான கதாபாத்திரங்களில் நடிப்பதும், அதில் ரசிகர்களை ஈர்ப்பதுமே மிகப்பெரிய சவால் என்று கூறியுள்ளார். ஆவேசம் போன்ற படங்களில் நடிப்பதைக் காட்டிலும், இது போன்ற எதார்த்தமான கதையம்சம் கொண்ட படங்களில் நடிப்பது கடினமானது என்று தனது அனுபவத்தைப் பகிர்ந்துள்ளார். கதாநாயகன், வில்லன் என்ற பிரிவினை பார்க்காமல், தன்னை ஒரு கலைஞனாக மட்டுமே கருதுவதாக அவர் உறுதிபடக் கூறியுள்ளார்.

தயாரிப்பாளராகவும் வெற்றிகரமாகச் செயல்பட்டு வரும் ஃபஹத், தான் தயாரிக்கும் படங்களுக்கும், பிற தயாரிப்பாளர்கள் படங்களில் நடிப்பதற்கும் இடையில் உள்ள வித்தியாசத்தை விளக்கியுள்ளார். தனது தயாரிப்பில் இயக்குநர்களின் தேவைக்கேற்ப செலவுகளைத் திட்டமிடுவதையும், மற்ற படங்களில் செலவுகளைக் குறைத்து தரமான படைப்பைக் கொடுப்பதையும் நோக்கமாகக் கொண்டிருப்பதாக அவர் தெரிவித்தார். இப்படத்தின் படப்பிடிப்பு நிஜமான இடங்களில் நடத்தப்பட்டதால், ஆரம்பத்தில் கூட்டத்தைக் கட்டுப்படுத்துவதில் சவால்கள் இருந்தன என்றும், பின்னர் அவை திட்டமிட்டபடி சரிசெய்யப்பட்டன என்றும் அவர் குறிப்பிட்டார்.

திரைப்படத்தின் தெலுங்கு, தமிழ் மற்றும் மலையாள பதிப்புகளின் டிரெய்லரில் கமல்ஹாசன், மோகன்லால் மற்றும் நந்தமுரி பாலகிருஷ்ணா ஆகியோர் குரல் கொடுத்திருப்பது குறிப்பிடத்தக்கது. இது குறித்து பேசிய ஃபஹத், சினிமாவுக்குத் திருப்பித் தரும் ஒரு நல்ல முயற்சியாக இதைக் கருதுவதாகத் தெரிவித்துள்ளார். இளம் இயக்குநர்கள் மற்றும் தொழில்நுட்பக் கலைஞர்களுடன் இணைந்து பணியாற்றுவது தனக்கு மிகுந்த உற்சாகத்தைத் தருவதாகவும், ஒரு நீண்ட இடைவெளிக்குப் பிறகு மீண்டும் புதுமையான அனுபவத்தைப் பெறுவதாகவும் அவர் கூறியுள்ளார். தனது தந்தை ஃபாசில் இயக்கத்தில் நடிக்க ஆவலாக இருப்பதாகக் கூறிய அவர், தற்போது கதைகளைத் தேர்ந்தெடுப்பதில் மிகுந்த நிதானத்துடன் செயல்படுவதாகத் தெரிவித்துள்ளார்.