சிவகங்கையில் சோகம்: புதிய கார் வாங்கிய கொண்டாட்டத்தில் நண்பர்கள் இருவர் படுகொலை

சிவகங்கையில் புதிய கார் வாங்கியதை கொண்டாடிய போது ஏற்பட்ட தகராறில் இருவர் படுகொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.

சிவகங்கை மாவட்டத்தில் புதிய கார் வாங்கிய மகிழ்ச்சியை கொண்டாடிய இரு நண்பர்கள், மர்ம நபர்களால் விரட்டி விரட்டி படுகொலை செய்யப்பட்ட சம்பவம் பெரும் பரபரப்பை ஏற்படுத்தியுள்ளது. குந்தாணி பகுதியைச் சேர்ந்த தேவேந்திரன் (35) மற்றும் மறவமங்கலத்தைச் சேர்ந்த பூபாண்டி (30) ஆகிய இருவருமே இந்த கொடூர சம்பவத்தில் உயிரிழந்தவர்கள் ஆவர். தேவேந்திரன் புதிதாக கார் வாங்கியதைக் கொண்டாடுவதற்காக, நண்பர்கள் சிலருடன் சேர்ந்து மது அருந்தும் விருந்துக்கு ஏற்பாடு செய்திருந்தது விசாரணையில் தெரியவந்துள்ளது.

கொடிக்காடு கண்மாய் பகுதியில் இந்த மது விருந்து நடைபெற்றுக் கொண்டிருந்தபோது, அங்கு குழுமியிருந்த மர்ம நபர்களுக்கும் தேவேந்திரன் மற்றும் பூபாண்டிக்கும் இடையே திடீரென வாக்குவாதம் ஏற்பட்டதாகத் தெரிகிறது. இந்த விவாதம் முற்றிய நிலையில், அந்த மர்ம கும்பல் இருவரையும் கண்மாய் பகுதி வரை விரட்டிச் சென்று சரமாரியாக வெட்டி கொலை செய்துள்ளது. தாக்குதலில் ஈடுபட்டவர்கள், உயிரிழந்தவர்களின் முகத்தை அடையாளம் காண முடியாத அளவிற்கு சிதைத்துவிட்டு அங்கிருந்து தப்பிச் சென்றுள்ளனர். சம்பவ இடத்தில் நிறுத்தப்பட்டிருந்த தேவேந்திரனின் புதிய கார் பலத்த சேதமடைந்து காணப்பட்டது.

சம்பவம் குறித்து தகவல் அறிந்த காவல்துறையினர், உடனே அந்த இடத்திற்கு விரைந்து வந்து விசாரணை நடத்தினர். உயிரிழந்த இருவரின் உடல்களும் உடற்கூறாய்வு பரிசோதனைக்காக சிவகங்கை அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டன. சம்பவ இடத்திலிருந்து மது பாட்டில்கள் மற்றும் சில காலணிகள் உள்ளிட்ட முக்கிய தடயங்களை காவல்துறையினர் கைப்பற்றியுள்ளனர். இந்த கொடூரச் செயலில் சுமார் ஆறு பேர் ஈடுபட்டிருக்கலாம் என முதற்கட்ட விசாரணையில் தெரியவந்துள்ளது.

இந்த இரட்டை கொலை வழக்கை விசாரிக்க, சிவகங்கை துணை காவல் கண்காணிப்பாளர் அமலா அட்வின் தலைமையில் ஐந்து தனிப்படைகள் அமைக்கப்பட்டுள்ளன. தலைமறைவாகியுள்ள கொலையாளிகளைத் தீவிரமாகத் தேடி வரும் காவல்துறையினர், கொலையுண்டவர்களுடன் மது அருந்த வந்தவர்கள் யார், அவர்களுக்கு இடையே என்ன முன்விரோதம் இருந்தது என்பது குறித்து விசாரணை நடத்தி வருகின்றனர். கொலையாளிகள் கைது செய்யப்பட்ட பின்னரே இந்த கொடூரக் கொலைக்கான உண்மையான காரணம் தெரியவரும் என்று காவல்துறை தரப்பில் தெரிவிக்கப்பட்டுள்ளது.