தமிழகம் முழுவதும் 1.77 கோடி ஸ்மார்ட் மீட்டர் பொருத்தும் பணி: புதிய டெண்டர்களை வெளியிட்டது மின்வாரியம்

தமிழகம் முழுவதும் 1.77 கோடி ஸ்மார்ட் மீட்டர் பொருத்துவதற்கான ஒப்பந்தப்புள்ளிகளை மின்சார வாரியம் வெளியிட்டுள்ளது.

தமிழகத்தில் மின் நுகர்வு முறையை நவீனப்படுத்தவும், மின் இழப்புகளைக் குறைக்கவும் தமிழ்நாடு மின் பகிர்மானக் கழகம் (TNPDCL) முக்கிய நடவடிக்கைகளை மேற்கொண்டுள்ளது. மத்திய அரசின் சீரமைக்கப்பட்ட மின் பகிர்மானத் துறை திட்டத்தின் (RDSS) கீழ், மாநிலம் முழுவதும் உள்ள மாநகராட்சி பகுதிகளில் சுமார் 1.77 கோடி ஸ்மார்ட் மீட்டர்களைப் பொருத்துவதற்கான மின்-ஒப்பந்தப்புள்ளிகளை (e-tenders) மின்சார வாரியம் வெளியிட்டுள்ளது. மேம்பட்ட அளவீட்டு உள்கட்டமைப்பு சேவை வழங்குநர்களை (AMISP) நியமிப்பதற்கான இந்த ஒப்பந்தங்கள், முழு செலவு (TOTEX) மாதிரியின் அடிப்படையில் செயல்படுத்தப்பட உள்ளன.

இந்த திட்டத்தின் கீழ், அரசு கட்டிடங்கள், விவசாய இணைப்புகள் மற்றும் குடிசை வீடுகளுக்கான மின் இணைப்புகளைத் தவிர்த்து, அனைத்து குறைந்த மின்னழுத்த (LT) நுகர்வோர்களுக்கும் ஸ்மார்ட் மீட்டர்கள் பொருத்தப்பட உள்ளன. மின்வாரியத்தின் தரவுகளின்படி, சென்னை மண்டலத்தில் மட்டும் 56.85 லட்சம் ஸ்மார்ட் மீட்டர்களைப் பொருத்த திட்டமிடப்பட்டுள்ளது. முன்னதாக, சென்னை தியாகராய நகர் பகுதியில் ஸ்மார்ட் சிட்டி திட்டத்தின் கீழ் சுமார் 1.29 லட்சம் ஸ்மார்ட் மீட்டர்கள் ஏற்கனவே வெற்றிகரமாகப் பொருத்தப்பட்டுள்ளன என்பது குறிப்பிடத்தக்கது.

திட்டத்தின் நிர்வாக வசதிக்காக, மாநிலம் முழுவதும் உள்ள மாநகராட்சிகள் ஏழு தொகுப்புகளாகப் பிரிக்கப்பட்டுள்ளன. இதில் சென்னை மண்டலம் இரண்டு தொகுப்புகளாகவும், மீதமுள்ள 23 மாநகராட்சிகள் ஐந்து தொகுப்புகளாகவும் பிரிக்கப்பட்டுள்ளன. காஞ்சிபுரம், விழுப்புரம், வேலூர் மற்றும் திருவண்ணாமலை ஆகிய ஆறு மாநகராட்சிகள் ஒரு தொகுப்பாகவும், ஈரோடு மற்றும் கரூர் உள்ளிட்ட ஐந்து மாநகராட்சிகள் மற்றொரு தொகுப்பாகவும் உள்ளன. அதேபோன்று திருச்சி-தஞ்சாவூர் மற்றும் மதுரை-திருநெல்வேலி மாநகராட்சிகள் தனித்தனி தொகுப்புகளாக வகைப்படுத்தப்பட்டு பணிகள் மேற்கொள்ளப்பட உள்ளன.

மின் பகிர்மான மாற்றங்களை துல்லியமாகக் கண்காணிக்க, விநியோக மின்மாற்றிகளில் (Distribution Transformers) மட்டும் 4.72 லட்சம் ஸ்மார்ட் மீட்டர்களைப் பொருத்துவதற்கான தனி டெண்டரையும் மின்வாரியம் வெளியிட்டுள்ளது. இதன் மூலம் தொழில்நுட்ப ரீதியான மற்றும் வணிக ரீதியான மின் இழப்புகளைக் கண்டறிவதுடன், மின் திருட்டுகளைத் தடுக்கவும் முடியும் என எதிர்பார்க்கப்படுகிறது. மத்திய அரசின் விதிமுறைப்படி, இந்த முழுமையான ஸ்மார்ட் மீட்டர் பொருத்தும் பணிகளை மார்ச் 2028-க்குள் நிறைவு செய்ய இலக்கு நிர்ணயிக்கப்பட்டுள்ளது.