தமிழ்நாட்டில் ரூ.1,370 கோடியில் முதலீடு செய்ய முன்வந்த தென் கொரிய நிறுவனங்கள்: மாநில அரசின் சாதனை

தென் கொரிய நிறுவனங்களான ஹ்வாஷின் மற்றும் சியோயான் தமிழ்நாட்டில் 1,370 கோடி ரூபாய் முதலீடு செய்ய முன்வந்துள்ளன.
தமிழ்நாட்டின் வாகன உற்பத்தித் துறையில் மீண்டும் ஒரு முக்கிய மைல்கல்லாக, தென் கொரியாவைச் சேர்ந்த இரண்டு முன்னணி வாகன உதிரிபாக உற்பத்தி நிறுவனங்கள், மாநிலத்தில் 1,370 கோடி ரூபாய் முதலீடு செய்யத் திட்டமிட்டுள்ளன. ஹ்வாஷின் மற்றும் சியோயான் ஆகிய இந்த இரண்டு நிறுவனங்களும் நவம்பர் 11 ஆம் தேதியிட்ட கடிதங்கள் மூலம் தங்கள் முதலீட்டு விருப்பத்தை அதிகாரப்பூர்வமாகத் தெரிவித்துள்ளன. இந்தத் தகவல், தமிழ்நாட்டின் தொழில்துறை சூழல் மீது சர்வதேச நிறுவனங்கள் தொடர்ந்து வைத்துள்ள நம்பிக்கையை உறுதிப்படுத்துவதாக அமைந்துள்ளது.
முன்னதாக, சில முதலீடுகள் அண்டை மாநிலங்களுக்குச் செல்வதாக எழுந்த விவாதங்களுக்கு முற்றுப்புள்ளி வைக்கும் வகையில் இந்த அறிவிப்பு வெளிவந்துள்ளது. ஹ்வாஷின் நிறுவனம், ஏற்கனவே காஞ்சிபுரம் மாவட்டம் இருங்காட்டுக் கோட்டையில் உள்ள சிப்காட் வளாகத்தில் தனது உற்பத்தி ஆலையை நிர்வகித்து வரும் நிலையில், தற்போது சுமார் 850 கோடி ரூபாயை ஆராய்ச்சி மற்றும் மேம்பாடு, மேம்பட்ட உற்பத்தி தொழில்நுட்பங்கள் மற்றும் திறன் விரிவாக்கத்திற்காக முதலீடு செய்ய முன்வந்துள்ளது. இந்த முதலீடு நிறுவனத்தின் புதிய வணிக வாய்ப்புகளை ஊக்குவிக்கும் என்று எதிர்பார்க்கப்படுகிறது.
இதேபோல், சியோயான் இ-ஹ்வா சம்மிட் ஆட்டோமோட்டிவ் இந்தியா நிறுவனம், தனது தொழில்நுட்ப மேம்பாடு மற்றும் உற்பத்தி வசதிகளை நவீனப்படுத்துவதற்காக 520 கோடி ரூபாய் முதலீடு செய்யத் திட்டமிட்டுள்ளது. இந்த முதலீட்டுத் திட்டங்கள் குறித்த புரிந்துணர்வு ஒப்பந்தங்கள் விரைவில் கையெழுத்தாகும் என எதிர்பார்க்கப்படுகிறது. தொழில்துறை அமைச்சர் எஸ். கீர்த்தனா இது குறித்துக் கூறுகையில், முதலீட்டாளர்கள் ஒரு மாநிலத்தின் உள்கட்டமைப்பு மற்றும் நிறுவனங்களின் தரத்தை நம்பியே முடிவெடுப்பதாகவும், தமிழ்நாட்டின் தொழில் வளம் உலகளாவிய நிறுவனங்களை மீண்டும் ஈர்த்துள்ளது என்றும் குறிப்பிட்டார்.
முதலமைச்சர் சி. ஜோசப் விஜய் தலைமையிலான அரசின் கீழ், புதிய முதலீடுகளை ஈர்ப்பது மட்டுமின்றி, ஏற்கனவே உள்ள தொழிற்சாலைகள் தங்களை மேம்படுத்திக்கொள்ளவும், அதிக வேலைவாய்ப்புகளை உருவாக்கவும் ஏற்ற சூழல் உருவாக்கப்பட்டுள்ளதாக அமைச்சர் தெரிவித்தார். இதனிடையே, சென்னையில் உள்ள பெருங்குடியில் மின்சார இருசக்கர வாகன தயாரிப்பு நிறுவனமான ரேப்டி நிறுவனத்தின் புதிய அனுபவ மையத்தை முதலமைச்சர் சி. ஜோசப் விஜய் காணொலி காட்சி மூலம் திறந்து வைத்தார். தமிழ்நாடு தொழில் வளர்ச்சி நிறுவனம் (டிட்கோ) இத்தகைய ஸ்டார்ட்-அப் நிறுவனங்களுக்கு ஊக்கம் அளிக்கும் வகையில் முதலீடுகளை மேற்கொண்டு வருவது குறிப்பிடத்தக்கது.









