தமிழகத்தில் 19,000 பள்ளி மாணவர்களுக்கு சிறப்புப் பேருந்து வசதி: போக்குவரத்துத் துறையின் அதிரடித் திட்டங்கள்

தமிழகத்தில் உள்ள 140 பள்ளிகளில் படிக்கும் 19,000 மாணவர்களின் பாதுகாப்பான பயணத்திற்காக சிறப்பு அரசுப் பேருந்துகளை இயக்க அமைச்சர் ஏ.விஜய தமிழன் அறிவித்துள்ளார்.

தமிழ்நாடு அரசு பள்ளி மாணவர்களின் பாதுகாப்பான மற்றும் தடையற்ற கல்விப் பயணத்தை உறுதி செய்யும் நோக்கில் புதிய திட்டத்தை அறிவித்துள்ளது. மாநிலத்தின் கிராமப்புறம், மலைப்பகுதிகள் மற்றும் போக்குவரத்து வசதிகள் குறைவாக உள்ள உட்புறக் கிராமங்களில் வசிக்கும் சுமார் 19,000 பள்ளி மாணவர்களின் பயணத் தேவையைப் பூர்த்தி செய்யும் வகையில் சிறப்பு அரசுப் பேருந்துகள் இயக்கப்படும் என்று போக்குவரத்துத் துறை அமைச்சர் ஏ.விஜய தமிழன் பார்த்திபன் சட்டப்பேரவையில் தெரிவித்தார். இதற்காக ஏற்கனவே பயன்பாட்டில் உள்ள அரசுப் பேருந்துகள் காலை மற்றும் மாலை வேளைகளில் சிறப்பாகப் பயன்படுத்தப்படும் என்றும், இதன் மூலம் 140 பள்ளிகளில் பயிலும் மாணவ, மாணவியர் பயனடைவார்கள் என்றும் அவர் குறிப்பிட்டார்.

பயணிகளின் வசதியை மேம்படுத்தும் நோக்கில் 'சிங்கார சென்னை' தேசிய பொது இயக்க அட்டை (NCMC) திட்டம் மாநிலம் முழுவதும் உள்ள அனைத்து அரசுப் போக்குவரத்துக் கழகப் பேருந்துகளுக்கும் விரிவுபடுத்தப்பட உள்ளது. இதன் மூலம் பயணிகள் பணமில்லா பரிவர்த்தனை முறையைப் பயன்படுத்தி கட்டணம் செலுத்தும் வசதியைப் பெற முடியும். மேலும், பேருந்து நிலையங்களில் பயணிகளின் காத்திருப்பு நேரத்தைக் குறைக்கவும், சில்லறைத் தட்டுப்பாடு போன்ற சிக்கல்களைத் தவிர்க்கவும் இந்த டிஜிட்டல் முறை பெரிதும் உதவும் என்று எதிர்பார்க்கப்படுகிறது. மேலும், பொது-தனியார் பங்களிப்பு (PPP) மாதிரியில் பேருந்து நிலையங்கள் மற்றும் பணிமனைகளை மறுசீரமைக்கும் பணியும் மேற்கொள்ளப்படும்.

தொழில்நுட்பத்தைப் பயன்படுத்தி சாலைப் பாதுகாப்பை வலுப்படுத்த தமிழக அரசு முனைப்பு காட்டி வருகிறது. குறிப்பாக, ஐஐடி மெட்ராஸ் உடன் இணைந்து சாலைப் பாதுகாப்பு புத்தாக்க மையம் அமைக்கப்பட உள்ளது. பாதுகாப்பு வசதிகளை மேம்படுத்தும் விதமாக 13,490 அரசுப் பேருந்துகளில் வாகன இருப்பிடத்தைக் கண்டறியும் கருவிகள் (VLT) மற்றும் அவசர கால பொத்தான்கள் 17.99 கோடி ரூபாய் செலவில் பொருத்தப்பட உள்ளன. கூடுதலாக, ஓட்டுநர்களின் பாதுகாப்பான பணிச்சூழலை உறுதி செய்ய 42,114 அரசுப் பேருந்து ஓட்டுநர்களுக்கு ஆண்டுதோறும் இலவச மருத்துவப் பரிசோதனைகள் வழங்கப்படும் என்றும் அறிவிக்கப்பட்டுள்ளது.

போக்குவரத்துக் கழகங்களின் வருவாயைப் பெருக்கும் விதமாக ஒருங்கிணைந்த சரக்கு சேவை அறிமுகப்படுத்தப்பட உள்ளது. இதற்காக 9,536 பேருந்துகள் பயன்படுத்தப்படும். மேலும் சுற்றுச்சூழலைக் காக்கும் நோக்கில் 100 பழைய டீசல் பேருந்துகள் மின்சாரப் பேருந்துகளாக மாற்றப்பட உள்ளன. விபத்துகளைக் குறைக்கும் வகையில் செயற்கை நுண்ணறிவு தொழில்நுட்பத்தைப் பயன்படுத்தி 'ThinnAI' என்ற ஓட்டுநர் பயிற்சி தளம் மற்றும் 100 ரோந்து வாகனங்களில் 'விழி' என்ற கேமராக்கள் பொருத்தப்படும். மோட்டார் வாகன விபத்துகள் தொடர்பான நீண்டகாலமாக நிலுவையில் உள்ள 5,665 இழப்பீட்டு வழக்குகளுக்கு 500 கோடி ரூபாய் நிதி ஒதுக்கீடு செய்யப்பட்டு தீர்வு காணப்படும் என்றும் அமைச்சர் தனது அறிவிப்பில் தெரிவித்துள்ளார்.