தமிழக உணவகங்களில் அதிரடி சோதனை: செப்டம்பர் 1 முதல் 3 மாத கால சிறப்பு ஆய்வு

தமிழகம் முழுவதும் செப்டம்பர் 1 முதல் மூன்று மாதங்களுக்கு உணவகங்களில் தீவிர உணவு பாதுகாப்பு ஆய்வுகள் மேற்கொள்ளப்பட உள்ளன.

தமிழகத்தில் உணவகங்கள் மற்றும் உணவு விற்பனை நிலையங்களில் சுகாதாரமான சூழலை உறுதி செய்யும் நோக்கில், உணவு பாதுகாப்புத் துறை அதிரடி நடவடிக்கைகளை மேற்கொள்ள உள்ளது. இதன்படி, செப்டம்பர் 1-ஆம் தேதி முதல் நவம்பர் 30-ஆம் தேதி வரை மூன்று மாதங்களுக்கு மாநிலம் முழுவதும் உள்ள அனைத்து உணவு நிறுவனங்களிலும் தீவிர ஆய்வுகள் நடத்தப்படவுள்ளதாக உணவு பாதுகாப்பு ஆணையர் ஆர். லால்வேனா உத்தரவிட்டுள்ளார். மகாராஷ்டிரா, கர்நாடகா மற்றும் கேரளா ஆகிய மாநிலங்களைத் தொடர்ந்து, தமிழகத்திலும் தரம் குறைந்த உணவு விற்பனையைத் தடுக்க இந்த சிறப்பு நடவடிக்கை முன்னெடுக்கப்படுகிறது.

பொதுவாக மத்திய உணவு பாதுகாப்பு மற்றும் தர நிர்ணய ஆணையத்தின் (FSSAI) உரிமம் பெற்ற நிறுவனங்களை மாநில அதிகாரிகள் ஆய்வு செய்வதில்லை. ஆனால், இந்த சிறப்புத் திட்டத்திற்காக மத்திய உரிமம் பெற்ற நிறுவனங்களையும் ஆய்வு செய்ய மாநில அதிகாரிகளுக்கு அனுமதி வழங்கப்பட்டுள்ளது. உணவகங்கள், ஹோட்டல்கள், சிற்றுண்டி சாலைகள், உணவுக் கூடங்கள், கேன்டீன்கள் மற்றும் சிறிய அளவிலான டீக்கடைகள் என அனைத்து உணவு சார்ந்த நிறுவனங்களும் இந்த ஆய்வுக்கு உட்படுத்தப்படும். ஆய்வுக்கு முன்னதாக, அனைத்து உணவக உரிமையாளர்களும் தங்களது நிறுவனங்களில் சுய-தணிக்கை (Self-audit) மேற்கொள்ள அறிவுறுத்தப்பட்டுள்ளனர். அத்துடன், உணவுச் சங்கங்களுடன் ஆலோசனைக் கூட்டங்களை நடத்தி, இந்த ஆய்வு முறைகள் குறித்து விளக்கம் அளிக்கவும் அதிகாரிகளுக்கு உத்தரவிடப்பட்டுள்ளது.

ஆய்வின் போது, உணவகங்களின் சமையலறைகள் மற்றும் கிடங்குகள் தூய்மையாக உள்ளதா என்பது முக்கியமாக கவனிக்கப்படும். பூச்சி கட்டுப்பாடு நடவடிக்கைகள், குடிநீர் தரப் பரிசோதனை, குளிர்சாதனப் பெட்டிகளின் வெப்பநிலை பராமரிப்பு மற்றும் சமையலறையில் துருப்பிடிக்காத கத்திகள் மற்றும் உபகரணங்கள் பயன்படுத்தப்படுகிறதா என்பது குறித்து அதிகாரிகள் ஆய்வு செய்வார்கள். சுவர்களில் எண்ணெய் கறைகள் மற்றும் சுகாதாரமற்ற சூழல் இருப்பின் கடுமையான நடவடிக்கை எடுக்கப்படும். மேலும், சமையல் பணியாளர்கள் முறையான மருத்துவ உடற்தகுதி சான்றிதழ் பெற்றிருக்க வேண்டும் மற்றும் கையுறைகள், தலைக்கவசம் அணிவது போன்ற பாதுகாப்பு நடைமுறைகளைப் பின்பற்றுவதை உறுதி செய்ய வேண்டும்.

இது தவிர, உணவகங்களில் பயன்படுத்தப்படும் பழைய சமையல் எண்ணெய், அங்கீகரிக்கப்பட்ட ஆர்.யு.சி.ஓ (RUCO) நிறுவனங்களிடம் முறையாக ஒப்படைக்கப்படுகிறதா என்பதை உறுதி செய்ய பதிவேடுகள் சரிபார்க்கப்படும். ஒவ்வொரு வாரமும் வெள்ளிக்கிழமை அன்று ஆய்வின் முன்னேற்ற அறிக்கையை சமர்ப்பிக்கவும், சோதனைகளின் முடிவுகளை இணையதளத்தில் பதிவேற்றவும் அதிகாரிகளுக்கு அறிவுறுத்தப்பட்டுள்ளது. உணவுப் பொருட்களில் ஏதேனும் சந்தேகம் இருப்பின், மாதிரி சேகரிக்கப்பட்டு ஆய்வகப் பரிசோதனைக்கு அனுப்பப்படும். முறையான உரிமம் இல்லாமல் இயங்கும் உணவகங்கள் கண்டறியப்பட்டால், அபராதம் விதிக்கப்படுவதோடு, உடனடியாக உரிமம் பெறவும் வழிகாட்டப்படும் என்று அதிகாரிகள் தெரிவித்துள்ளனர்.