தமிழக தேர்தலில் வாக்களித்த இலங்கை நபர்: நீதிமன்றத்தில் மனு தள்ளுபடி

தமிழக சட்டமன்றத் தேர்தலில் வாக்களித்த இலங்கை குடிமகனுக்கு நிவாரணம் வழங்க சென்னை உயர்நீதிமன்ற மதுரை கிளை மறுப்பு தெரிவித்துள்ளது.

தமிழக சட்டமன்றத் தேர்தலில் தவறாக வாக்களித்த விவகாரத்தில், இலங்கைக் குடியுரிமை பெற்ற நபர் ஒருவருக்கு சென்னை உயர்நீதிமன்றத்தின் மதுரை கிளை நிவாரணம் வழங்க மறுத்துவிட்டது. திருநெல்வேலியைப் பூர்வீகமாகக் கொண்ட ஜெயா அனந்தன் என்பவர், தனது தாயாரின் அறுவை சிகிச்சைக்காக கடந்த ஏப்ரல் மாதம் தமிழகம் வந்துள்ளார். அப்போது தனது பெயர் வாக்காளர் பட்டியலில் இடம் பெற்றிருந்ததைக் கண்ட அவர், அந்தத் தேர்தலில் வாக்களித்துள்ளார். இது தொடர்பான புகாரின் பேரில் திருநெல்வேலி காவல்துறையினர் அவர் மீது வழக்குப்பதிவு செய்து விசாரணை நடத்தி வருகின்றனர்.

இந்த வழக்கில் தொடர்புடைய ஜெயா அனந்தனின் பாஸ்போர்ட் மற்றும் ஓவர்சீஸ் சிட்டிசன் ஆஃப் இந்தியா (OCI) அட்டை ஆகியவை காவல்துறையினரால் பறிமுதல் செய்யப்பட்டன. பின்னர், விசாரணைக்குத் தேவைப்படும்போது ஆஜராக வேண்டும் என்ற நிபந்தனையுடன் அவை அவரிடம் ஒப்படைக்கப்பட்டன. இந்தச் சூழலில், தான் மீண்டும் இலங்கை திரும்புவதற்குத் தடைகள் நீக்கப்பட வேண்டும் என்று கோரி அவர் உயர்நீதிமன்றத்தில் மனு தாக்கல் செய்திருந்தார். தான் வெளிநாட்டுக் குடியுரிமை பெற்றவர் என்பதை மறைக்கவோ அல்லது தேர்தல் நடைமுறைகளில் வேண்டுமென்றே தலையிடவோ முயலவில்லை என்றும், வாக்காளர் பட்டியலில் பெயர் இருந்ததால் தனக்கு வாக்களிக்க உரிமை இருப்பதாகக் கருதியதாகவும் மனுதாரர் தரப்பில் வாதிடப்பட்டது.

இந்த மனுவை விசாரித்த நீதிபதி எல். விக்டோரியா கௌரி, மிக முக்கிய சட்டப்பூர்வமான அவதானிப்பை முன்வைத்தார். ஒரு நபர் வெளிநாட்டுக் குடியுரிமை பெற்றிருந்தால், வாக்காளர் பட்டியலில் பெயர் தவறுதலாக நீக்கப்படாமல் இருந்தாலும், அவருக்கு இந்திய அரசியலமைப்புச் சட்டத்தின்படி வாக்களிக்கும் உரிமை வழங்கப்பட முடியாது என்று நீதிமன்றம் தெளிவுபடுத்தியது. வாக்காளர் பட்டியலில் பெயர் இருப்பது மட்டும் ஒரு வெளிநாட்டவர் வாக்களிப்பதற்குச் சட்டப்பூர்வமான அனுமதியாகிவிடாது என்று நீதிபதி சுட்டிக்காட்டினார்.

மேலும், மனுதாரர் எந்தவிதத் தடங்கலும் இன்றி இலங்கை செல்ல அனுமதி கோரியதை நீதிமன்றம் ஏற்கவில்லை. இத்தகைய உத்தரவை வழங்குவது, நிலுவையில் உள்ள புலன்விசாரணை மற்றும் குடியேற்றத்துறை அதிகாரிகளின் சட்டப்பூர்வ நடவடிக்கைகளை முடக்கும் செயலாக அமையும் என்று நீதிபதி தனது உத்தரவில் குறிப்பிட்டார். விசாரணை அதிகாரிகளின் கோரிக்கைகள் மற்றும் வழக்கின் ஆவணங்களை ஆய்வு செய்து, வெளிநாட்டுப் பயணம் குறித்த தகுந்த முடிவை அந்தந்தக் குற்றவியல் நீதிமன்றமே எடுக்க வேண்டும் என்று அறிவுறுத்திய நீதிமன்றம், மனுதாரரின் கோரிக்கையை நிராகரித்து வழக்கை தள்ளுபடி செய்தது.