பெண்களின் பாதுகாப்பு குறித்த வாக்குறுதிகளை நிறைவேற்றத் தவறியது ஏன்? முதலமைச்சர் சி.ஜோசப் விஜயைக் கடுமையாகச் சாடிய மு.க.ஸ்டாலின்

தமிழகத்தில் பெண்களுக்கு எதிரான குற்றங்கள் அதிகரித்துள்ளதாகக் கூறி முதல்வர் சி.ஜோசப் விஜயை கடுமையாகச் சாடியுள்ளார் திமுக தலைவர் மு.க.ஸ்டாலின்.

தமிழகத்தில் சட்டம் ஒழுங்கு சீர்குலைந்துள்ளதாகவும், பெண்களுக்குப் பாதுகாப்பு இல்லை என்றும் குற்றம் சாட்டி திமுக தலைவர் மு.க.ஸ்டாலின் கடும் கண்டனத்தைப் பதிவு செய்துள்ளார். அக்கட்சியின் மகளிர் அணியினர் மாநிலம் தழுவிய போராட்டத்திற்குத் தயாராகி வரும் நிலையில், மு.க.ஸ்டாலின் வெளியிட்டுள்ள வீடியோ செய்தி அரசியல் வட்டாரத்தில் பெரும் பரபரப்பை ஏற்படுத்தியுள்ளது. தேர்தல் வாக்குறுதிகளில் பெண்களின் பாதுகாப்பிற்கும் சட்டம் ஒழுங்கை நிலைநாட்டுவதற்கும் முன்னுரிமை அளிக்கப்படும் என்று கூறிய முதல்வர் சி.ஜோசப் விஜயை, தனது செயல்களால் அவர் அந்த வாக்குறுதிகளைக் காற்றில் பறக்கவிட்டுள்ளதாக ஸ்டாலின் விமர்சித்துள்ளார்.

தேர்தல் பிரசாரத்தின் போது சட்டம் ஒழுங்கு சீர்கேடு மற்றும் போதைப் பொருட்கள் நடமாட்டம் குறித்துக் குரல் எழுப்பிய ஜோசப் விஜய், தற்போது ஆட்சியில் அமர்ந்த பிறகு அதே பிரச்சினைகளைத் தடுக்கத் தவறியுள்ளதாக மு.க.ஸ்டாலின் சுட்டிக்காட்டியுள்ளார். குற்றவாளிகள் அச்சமின்றிச் செயல்படுவதாகவும், தற்போதைய ஆட்சி அவர்களுக்கு ஆதரவாக இருப்பதாகவும் அவர் குற்றம் சாட்டியுள்ளார். காவல்துறையைக் கையாள்வதில் உள்ள குளறுபடிகள் குறித்துக் கேள்வி எழுப்பியுள்ள அவர், குற்றச் செயல்கள் அதிகரிப்பதற்கு ஆளுங்கட்சியினரின் ஈடுபாடே முக்கியக் காரணம் என்று வலியுறுத்தியுள்ளார்.

காவல்துறையைக் கட்டுப்படுத்துவதற்கு முன்னதாக, ஆளுங்கட்சியான தவெகவின் நிர்வாகிகளைக் கட்டுக்குள் வைத்தாலே தமிழகத்தில் குற்றங்களின் அளவு கணிசமாகக் குறையும் என்று மு.க.ஸ்டாலின் தெரிவித்தார். மேலும், சர்வதேச போதைப் பொருள் கடத்தல் மற்றும் உற்பத்தி வலைப்பின்னல் தொடர்பான வழக்கில் தவெக நிர்வாகி ஒருவர் வருவாய் புலனாய்வு இயக்குநரகத்தால் (DRI) கைது செய்யப்பட்ட விவகாரத்தையும் அவர் சுட்டிக்காட்டினார். இது ஆளுங்கட்சியின் செயல்பாடுகளைக் கேள்விக்குள்ளாக்கும் வகையில் அமைந்துள்ளதாக அவர் குறிப்பிட்டார்.

அத்தியாவசியப் பொருட்களின் விலை உயர்வு குறித்தும் மு.க.ஸ்டாலின் தனது எதிர்ப்பைத் தெரிவித்துள்ளார். குறிப்பாக, ரேஷன் கடைகளில் தரமான அரிசி மற்றும் மானிய விலையில் சின்ன வெங்காயம் கிடைப்பதாக அரசு மக்களைத் தவறாக வழிநடத்துவதாகவும் அவர் குற்றம் சாட்டினார். தேர்தலுக்கு முன் அளித்த வாக்குறுதிகளை நிறைவேற்றத் தவறிய தவெக அரசு, நிர்வாக ரீதியாகவும் பொருளாதார ரீதியாகவும் மக்களிடம் நம்பிக்கையை இழந்து வருவதாகத் தெரிவித்துள்ள ஸ்டாலின், இந்தப் போராட்டங்கள் மூலம் மக்களின் குரலைப் பதிவு செய்யப் போவதாகக் கூறியுள்ளார்.