தமிழ்நாடு கூட்டுறவு சங்கங்களில் அனைத்து விவசாயிகளுக்கும் மானிய விலையில் உரங்கள்: அரசு முக்கிய அறிவிப்பு

தமிழ்நாட்டில் உள்ள அனைத்து விவசாயிகளும் கூட்டுறவு சங்கங்களில் மானிய விலையில் விதைகள் மற்றும் உரங்களைப் பெறலாம் என அரசு அறிவித்துள்ளது.

தமிழகத்தில் விவசாயிகளின் நலனைக் கருத்தில் கொண்டு கூட்டுறவுத் துறை புதிய அறிவிப்பு ஒன்றை வெளியிட்டுள்ளது. இதன்படி, மாநிலம் முழுவதும் உள்ள 4,400 தொடக்க வேளாண்மை கூட்டுறவு கடன் சங்கங்கள் (PACCS) மூலம் இனி அனைத்து விவசாயிகளும் மானிய விலையில் விதைகள் மற்றும் உரங்களைப் பெற்றுக்கொள்ள முடியும். இதற்கு முன்பு, கூட்டுறவு வங்கிகளில் பயிர்க்கடன் பெற்ற விவசாயிகள் மற்றும் சங்க உறுப்பினர்கள் மட்டுமே இந்தச் சலுகையைப் பெற்று வந்த நிலையில், தற்போது இந்த நடைமுறை எளிமைப்படுத்தப்பட்டுள்ளது.

இந்த புதிய மாற்றத்தின்படி, கூட்டுறவு சங்கத்தின் உறுப்பினராக இல்லாதவர்கள் அல்லது பயிர்க்கடன் பெறாத விவசாயிகளும் இனி தாராளமாக உரங்கள் மற்றும் தரமான விதைகளை வாங்கிக் கொள்ளலாம். வேளாண்மையை ஊக்குவிக்கும் நோக்கில் இந்த முக்கிய முடிவை கூட்டுறவுத் துறை எடுத்துள்ளது. விவசாயிகள் தாங்கள் பயிரிட்டுள்ள நிலத்தின் உரிமையை உறுதி செய்யும் வகையில் சிட்டா மற்றும் அடங்கல் ஆவணங்களைச் சமர்ப்பித்து, நிர்ணயிக்கப்பட்ட அதிகபட்ச சில்லறை விலையில் (MRP) உரங்களை வாங்கிக்கொள்ளலாம் என்று அரசு தரப்பில் தெரிவிக்கப்பட்டுள்ளது.

தமிழக கூட்டுறவு விற்பனை இணையம் (TANFED) கூட்டுறவுத் துறையின் கீழ் இயங்கி வருகிறது. இது மாநிலம் முழுவதும் உரங்கள் மற்றும் இதர வேளாண் இடுபொருட்களை மொத்தமாகப் பெற்று தொடக்க வேளாண்மை கூட்டுறவு கடன் சங்கங்கள் மூலம் விநியோகம் செய்கிறது. மத்திய அரசு ஒதுக்கீடு செய்யும் மானிய உரங்களை இந்த அமைப்பின் மூலமாகவே தமிழகம் பெற்று வருகிறது. இத்தகைய வலுவான விநியோகக் கட்டமைப்பைப் பயன்படுத்தி, அனைத்து விவசாயிகளுக்கும் இடுபொருட்கள் தங்குதடையின்றி கிடைப்பதை உறுதி செய்ய அரசு திட்டமிட்டுள்ளது.

மத்திய அரசு 2025-26-ஆம் நிதியாண்டில் தமிழகத்திற்கு மொத்தம் 29.4 லட்சம் டன் உரங்களை ஒதுக்கீடு செய்திருந்தது. இதில் 12.65 லட்சம் டன் உரங்கள் கூட்டுறவு சங்கங்கள் மூலமாக விநியோகிக்கப்பட்டுள்ளன. இது தவிர, கூட்டுறவு சங்கங்கள் தனியார் நிறுவனங்களிடமிருந்தும் கூடுதல் உரங்களைக் கொள்முதல் செய்து வருகின்றன. நடப்பு நிதியாண்டில், ஜூலை 31-ஆம் தேதி வரை மட்டும் சுமார் 122.87 டன் தரமான விதைகள் கூட்டுறவு சங்கங்கள் மூலம் விவசாயிகளுக்கு விநியோகம் செய்யப்பட்டுள்ளன என்பது குறிப்பிடத்தக்கது.