ஜெயிலர் 2 படத்தில் இணையும் மலையாள நடிகர் சுராஜ் வெஞ்சாரமூடு: வெளியானது மிரட்டலான கதாபாத்திரம்

சூப்பர் ஸ்டார் ரஜினிகாந்தின் ஜெயிலர் 2 திரைப்படத்தில் திலீப் எனும் மர்மமான கேங்ஸ்டர் கதாபாத்திரத்தில் நடிகர் சுராஜ் வெஞ்சாரமூடு நடிக்கிறார்.

சூப்பர் ஸ்டார் ரஜினிகாந்த் நடிப்பில் பிரம்மாண்டமாக உருவாகி வரும் ஜெயிலர் 2 திரைப்படம் குறித்த முக்கிய அறிவிப்பை தயாரிப்பு நிறுவனமான சன் பிக்சர்ஸ் வெளியிட்டுள்ளது. இந்தப் படத்தின் மூலம் தமிழ் திரையுலகிற்கு மீண்டும் ஒரு வலுவான வரவாக மலையாள நடிகர் சுராஜ் வெஞ்சாரமூடு இணைந்துள்ளார். தனுஷின் காரா படத்திற்கு பிறகு அவர் நடிக்கும் முக்கியத் தமிழ் படமாக இது அமையும் என எதிர்பார்க்கப்படுகிறது. படத்தில் அவர் திலீப் என்ற பெயரில் ஒரு மர்மமான கேங்ஸ்டர் கதாபாத்திரத்தில் நடிப்பதை படக்குழுவினர் உறுதிப்படுத்தியுள்ளனர்.

சுமார் 30 நொடிகள் கொண்ட அறிமுகக் காட்சியின் மூலம் சுராஜ் வெஞ்சாரமூட்டின் மிரட்டலான தோற்றத்தை படக்குழுவினர் ரசிகர்களுக்கு அறிமுகப்படுத்தியுள்ளனர். ஒரு கும்பலோடு அவர் களத்தில் இறங்கும் காட்சிகளும், தனது கதாபாத்திரத்தின் கொடூரமான எண்ணங்களை அவர் விவரிக்கும் பின்னணி குரலும் ரசிகர்களிடையே எதிர்பார்ப்பை அதிகரித்துள்ளது. முத்துவேல் பாண்டியன் கதாபாத்திரத்தில் நடிக்கும் ரஜினிகாந்துடன், சுராஜ் வெஞ்சாரமூட்டின் இந்த திலீப் கதாபாத்திரம் எத்தகைய மோதலை ஏற்படுத்தும் என்பது திரையரங்குகளில் பெரும் வரவேற்பைப் பெறும் என்று நம்பப்படுகிறது.

நெல்சன் திலீப்குமார் இயக்கத்தில் உருவாகும் இந்தப் படத்தை கலாநிதி மாறன் தனது சன் பிக்சர்ஸ் பேனரில் தயாரிக்கிறார். முதல் பாகத்தின் வெற்றிக் கூட்டணியைத் தொடர்ந்து, ரம்யா கிருஷ்ணன், மோகன்லால், சிவராஜ்குமார், மிர்ணா மேனன், யோகி பாபு மற்றும் ஜாபர் சாதிக் உள்ளிட்ட நட்சத்திரங்கள் மீண்டும் இணைந்துள்ளனர். இவர்களுடன் பகவதி பெருமாள், தமிழ், ஜதின் சர்னா, மேக்னா ராஜ் சார்ஜா மற்றும் பியோர்ன் சுர்ராவ் உள்ளிட்ட பல நட்சத்திரங்கள் ஜெயிலர் 2 படத்தில் முக்கியக் கதாபாத்திரங்களில் நடிக்கின்றனர்.

இப்படத்திற்கு இசையமைப்பாளர் அனிருத் ரவிச்சந்தர் இசையமைக்கிறார். ரஜினிகாந்துடன் இவர் இணையும் ஆறாவது படம் இதுவாகும் என்பது குறிப்பிடத்தக்கது. மேலும், ஒளிப்பதிவாளர் விஜய் கார்த்திக் கண்ணன், படத்தொகுப்பாளர் ஆர். நிர்மல், கலை இயக்குனர் டிஆர்கே கிரண் மற்றும் சண்டைக் கலை இயக்குனர் சேத்தன் டி'சௌசா உள்ளிட்ட தொழில்நுட்பக் கலைஞர்கள் இப்படத்தில் பணியாற்றி வருகின்றனர். முதல் பாகத்தின் பிரம்மாண்ட வெற்றியைத் தொடர்ந்து, ஜெயிலர் 2 படமும் ரசிகர்களுக்கு விருந்தாக அமையும் என்று எதிர்பார்க்கப்படுகிறது.