தாம்பரம் ரயில் நிலையத்தில் கூடுதல் வசதிகள்: முதியவர்கள் மற்றும் மாற்றுத்திறனாளிகளுக்கான முக்கிய அறிவிப்பு

தாம்பரம் ரயில் நிலையத்தில் முதியவர்கள் மற்றும் மாற்றுத்திறனாளிகளுக்காக 13 சக்கர நாற்காலிகள் வசதி செய்யப்பட்டுள்ளதாக தெற்கு ரயில்வே அறிவித்துள்ளது.

சென்னை தாம்பரம் ரயில் நிலையத்தில் முதியவர்கள் மற்றும் மாற்றுத்திறனாளிகள் எதிர்கொள்ளும் சிரமங்களை நிவர்த்தி செய்யும் வகையில், தெற்கு ரயில்வே நிர்வாகம் பல்வேறு மேம்பாட்டு நடவடிக்கைகளை எடுத்துள்ளது. முன்னதாக, ரயில் நிலைய வளாகத்தில் பயணிகள் லக்கேஜ் தள்ளுவண்டிகளில் அமரவைக்கப்படுவதாகவும், அதிக கட்டணம் வசூலிக்கப்படுவதாகவும் எழுந்த புகார்களைத் தொடர்ந்து இந்த புதிய அறிவிப்புகள் வெளியாகியுள்ளன. இனிவரும் காலங்களில் லக்கேஜ் தள்ளுவண்டிகளில் பயணிகளை ஏற்றிச் செல்லக்கூடாது என்று பணியாளர்களுக்குக் கண்டிப்பான அறிவுறுத்தல்கள் வழங்கப்பட்டுள்ளன.

ரயில் நிலையத்தின் பல்வேறு முக்கிய பகுதிகளில் மொத்தம் 13 சக்கர நாற்காலிகள் தயார் நிலையில் வைக்கப்பட்டுள்ளன. முதியவர்கள் இந்த சக்கர நாற்காலிகளைப் பயன்படுத்திக்கொள்ள 100 ரூபாய் கட்டணமாக நிர்ணயிக்கப்பட்டுள்ளது. அதேநேரத்தில், மாற்றுத்திறனாளிகளுக்குச் சக்கர நாற்காலி வசதி முற்றிலும் இலவசமாக வழங்கப்படும் என்று தெரிவிக்கப்பட்டுள்ளது. பயணிகள் தங்களின் அடையாள அட்டையை நிலைய அதிகாரியிடம் சமர்ப்பித்து சக்கர நாற்காலிகளைப் பெற்றுக்கொள்ளலாம். பாதுகாப்புக் கருதி, சக்கர நாற்காலியைத் திருப்பி ஒப்படைத்தவுடன் அடையாள அட்டை அவர்களிடம் மீண்டும் வழங்கப்படும்.

புதிய நடைபாதை மேம்பாலம் (Foot Over Bridge) கட்டி முடிக்கப்படும் வரை, பயணிகளுக்குத் தேவையான கூடுதல் உதவிகளை ரயில்வே ஊழியர்கள் மேற்கொள்வார்கள். சக்கர நாற்காலியில் பயணிப்பவர்களை ரயிலுக்கு அழைத்துச் செல்வது மற்றும் ரயிலில் ஏறுவதற்குத் தேவையான உதவிகளைச் செய்வது போன்ற பணிகள் தற்காலிகமாகத் தொடர்ந்து நடைபெறும் என்று ரயில்வே தரப்பில் தெரிவிக்கப்பட்டுள்ளது. இதுதவிர, நிர்ணயிக்கப்பட்ட கட்டண விவரங்கள் மற்றும் உதவிக்கான தொடர்பு எண்கள் ரயில் நிலையத்தின் முக்கிய இடங்களில் காட்சிப்படுத்தப்பட்டுள்ளன.

ரயில் நிலைய பிளாட்பாரங்களுக்குச் செல்லும் சாய்வுதளப் பாதைகள் மற்றும் தள்ளுவண்டி பாதைகளில் சக்கர நாற்காலிகளை இயக்குவதில் உள்ள சிரமங்கள் குறித்து பயணிகள் சுட்டிக்காட்டியிருந்தனர். இதனைச் சரிசெய்யும் வகையில், பாதைகளைச் சீரமைக்கும் பணிகள் தற்போது தீவிரமாக நடைபெற்று வருகின்றன. இந்தப் பணிகள் ஓரிரு நாட்களில் நிறைவடையும் என்று எதிர்பார்க்கப்படுகிறது. உதவியாளர் துணையுடன் தற்போதுள்ள பாதைகளைப் பயன்படுத்திக்கொள்ளலாம் என்று ரயில்வே அதிகாரிகள் உறுதி அளித்துள்ளனர்.