ஆவின் பால் உற்பத்தியைப் பெருக்க 20 கோடி ரூபாய் ஒதுக்கீடு: தமிழக அரசின் புதிய முன்னெடுப்பு

ஆவின் நிறுவனம் சார்பில் பால் உற்பத்தியைப் பெருக்கவும், பசுக்களின் இனப்பெருக்கத் திறனை மேம்படுத்தவும் 20 கோடி ரூபாய் மதிப்பீட்டில் புதிய திட்டங்கள் அறிமுகம் செய்யப்பட்டுள்ளன.

தமிழகத்தில் பால் உற்பத்தியை அதிகரிக்கவும், கால்நடைகளின் ஆரோக்கியம் மற்றும் இனப்பெருக்கத் திறனை மேம்படுத்தவும் ஆவின் நிறுவனம் இரண்டு முக்கிய திட்டங்களைச் செயல்படுத்த முடிவு செய்துள்ளது. தமிழ்நாடு புதுமை முன்முயற்சிகள் (TANII) திட்டத்தின் கீழ் தலா 10 கோடி ரூபாய் வீதம் மொத்தம் 20 கோடி ரூபாய் செலவில் இந்தத் திட்டங்கள் முன்னெடுக்கப்பட உள்ளன என்று பால்வளத்துறை அமைச்சர் சி. விஜயலட்சுமி சட்டப்பேரவையில் அறிவித்துள்ளார். பால் உற்பத்தியில் தன்னிறைவு பெறுவதையும், விவசாயிகளின் வாழ்வாதாரத்தை உயர்த்துவதையும் நோக்கமாகக் கொண்டு இந்த நடவடிக்கை எடுக்கப்பட்டுள்ளது.

முதல் திட்டத்தின் கீழ், மாநிலம் முழுவதிலும் இருந்து தேர்ந்தெடுக்கப்படும் 4,000 ஜெர்சி கலப்பின கன்றுகளைக் கொண்டு ஒரு விரிவான ஆய்வு மேற்கொள்ளப்பட உள்ளது. இக்கன்றுகளின் பூப்படைதலை விரைவுபடுத்துதல், கருத்தரிக்கும் திறனை அதிகரித்தல் மற்றும் முழுமையான உடல் வளர்ச்சியை உறுதி செய்தல் ஆகிய அம்சங்கள் இதில் அடங்கும். இதற்கு 10 கோடி ரூபாய் நிதி ஒதுக்கீடு செய்யப்பட்டுள்ளது. தேர்ந்தெடுக்கப்படும் கன்றுகளுக்குத் தேவையான ஊட்டச்சத்து மிக்க தீவனங்கள், குடற்புழு நீக்க மருந்துகள் மற்றும் தாது உப்புகள் ஆகியவை வழங்கப்படும். மேலும், பால் உற்பத்தித் திறனை மேம்படுத்தும் நோக்கில் இவை பாலின வகைப்படுத்தப்பட்ட விந்து மூலம் செயற்கை முறை கருவூட்டலுக்கு உட்படுத்தப்படும். இந்த ஆய்வின் மூலம் பெறப்படும் முடிவுகள், வருங்காலத்தில் பால் பண்ணை விவசாயிகளுக்குப் பெரிதும் உதவியாக இருக்கும்.

இரண்டாவது திட்டமானது, இனப்பெருக்கக் கோளாறுகளால் பாதிக்கப்பட்டுள்ள கறவை மாடுகளின் நலனை மேம்படுத்துவதில் கவனம் செலுத்துகிறது. இதற்காக மாநிலம் முழுவதும் சுமார் 50,000 கறவை மாடுகள் கண்டறியப்பட உள்ளன. மூன்று முறை செயற்கை முறை கருவூட்டல் செய்தும் கருத்தரிக்காத மாடுகள் மற்றும் நீண்ட நாட்களாகக் கருத்தரிக்காத மாடுகள் இதில் முன்னுரிமை அடிப்படையில் கண்டறியப்படும். ஊட்டச்சத்து மேலாண்மை, தாது உப்புகள் வழங்குதல் மற்றும் கால்நடை மருத்துவ நிபுணர்களின் தொடர் கண்காணிப்பு மூலம் இவற்றின் இனப்பெருக்கச் சுழற்சி சீரமைக்கப்படும். இந்த மருத்துவ தலையீடுகள் மூலம் மாடுகளின் இனப்பெருக்கத் திறனை உயர்த்தி பால் உற்பத்தியை அதிகரிக்கத் திட்டமிடப்பட்டுள்ளது.

இப்பணிகளைச் செம்மையாகச் செயல்படுத்தும் வகையில், பால்வளத் துறையில் போதிய மனிதவளத்தை உருவாக்கும் நோக்கில் புதிய அறிவிப்பையும் அமைச்சர் வெளியிட்டுள்ளார். அதன்படி, வேலைவாய்ப்பற்ற இளைஞர்களில் 100 பேரைத் தேர்ந்தெடுத்து, அவர்களுக்கு செயற்கை முறை கருவூட்டல் தொழில்நுட்பத்தில் முறையான பயிற்சி அளிக்கப்பட உள்ளது. இத்தகைய திறன்மிகு பயிற்சி பெற்ற நபர்கள் மூலம், கிராமப்புறங்களில் கால்நடை மருத்துவச் சேவைகளை எளிதில் கொண்டு சேர்க்க முடியும் என்று அரசு கருதுகிறது. இத்திட்டங்களின் செயல்பாடுகள் பால் உற்பத்தியாளர்கள் மற்றும் பண்ணையாளர்கள் மத்தியில் பெரும் எதிர்பார்ப்பை ஏற்படுத்தியுள்ளது.