dhina anjal logo
முகப்பு/தமிழ்நாடு

தமிழ்நாடு கட்டிட விதிமுறைகள்: 19.5 மீட்டர் வரை உயரத்தை அதிகரிக்க புதிய அனுமதி

By K. ராதாகிருஷ்ணன்
163 views
தமிழ்நாட்டில் ஏற்கனவே அனுமதி பெற்ற கட்டிடங்களின் உயரத்தை 19.5 மீட்டர் வரை உயர்த்திக்கொள்ள தமிழக அரசு அனுமதி அளித்துள்ளது.

தமிழ்நாட்டில் ஏற்கனவே அனுமதி பெற்ற கட்டிடங்களின் உயரத்தை 19.5 மீட்டர் வரை உயர்த்திக்கொள்ள தமிழக அரசு அனுமதி அளித்துள்ளது.

தமிழகத்தில் உள்ள அடுக்குமாடி அல்லாத கட்டிடங்களுக்கான உயர வரம்பினை அதிகரித்து தமிழக அரசு முக்கிய அறிவிப்பை வெளியிட்டுள்ளது. இதன்படி, கடந்த அக்டோபர் 26-ம் தேதிக்கு முன்னதாக முறையான திட்ட அனுமதி அல்லது கட்டிட அனுமதி பெற்ற கட்டிடங்கள், எந்தவிதமான கூடுதல் திருத்த அனுமதி பெறாமலேயே 19.5 மீட்டர் உயரம் வரை உயர்த்தி கட்டிக்கொள்ள வழிவகை செய்யப்பட்டுள்ளது. இது தொடர்பான தெளிவுபடுத்தலை வீட்டுவசதி மற்றும் நகர்ப்புற வளர்ச்சித் துறை வெளியிட்டுள்ளது.

வீட்டுவசதி மற்றும் நகர்ப்புற வளர்ச்சித் துறை செயலாளர் ஆர். கிர்லோஷ் குமார் இது தொடர்பாக நகர் மற்றும் ஊரமைப்புத் துறை ஆணையர் மற்றும் சென்னை பெருநகர வளர்ச்சிக் குழுமத்தின் (CMDA) உறுப்பினர் செயலர் ஆகியோருக்கு அனுப்பியுள்ள கடிதத்தில், ஏற்கனவே வழங்கப்பட்ட அனுமதிகளைக் கொண்டே இந்த மாற்றத்தைச் செய்துகொள்ளலாம் என்று தெரிவிக்கப்பட்டுள்ளது. இருப்பினும், இந்த விதிமுறை தரைத்தளம் அல்லது ஸ்டில்ட் தளத்துடன் சேர்த்து அதிகபட்சம் ஐந்து தளங்கள் கொண்ட கட்டிடங்களுக்கு மட்டுமே பொருந்தும்.

ஏற்கனவே 16 மீட்டர் முதல் 18.3 மீட்டர் உயரம் வரை கட்டிடம் கட்ட அனுமதி பெற்றவர்கள், தற்போது அரசின் இந்த புதிய உத்தரவின்படி 19.5 மீட்டர் உயரம் வரை உயர்த்திக்கொள்ளலாம். ஆனால், இந்த சலுகையைப் பெற சில முக்கிய நிபந்தனைகளை அரசு விதித்துள்ளது. அதாவது, கட்டிடத்தின் வரைபடம், தளங்களின் எண்ணிக்கை, குடியிருப்பு அலகுகள், தரை பரப்பு (FSI), பிளாட் கவரேஜ், செட்பேக் அல்லது வாகன நிறுத்துமிடம் ஆகியவற்றில் எந்த மாற்றமும் செய்யக்கூடாது. கட்டிடத்தின் உயரத்தை உயர்த்துவதைத் தவிர, அனுமதியளிக்கப்பட்ட திட்டத்தில் வேறு எந்தவிதமான மாறுதல்களும் செய்ய அனுமதி இல்லை என்பது குறிப்பிடத்தக்கது.

இதனுடன் சேர்த்து, திருத்தப்பட்ட கட்டிட வரைபட ஒப்புதல் கட்டணங்களை கணக்கிடும் முறையிலும் தமிழக அரசு மாற்றம் கொண்டு வந்துள்ளது. நகராட்சி நிர்வாக இயக்குநரகம் இது குறித்து உள்ளாட்சி அமைப்புகளுக்கு அனுப்பிய சுற்றறிக்கையில், கூடுதல் பரப்பளவிற்கு மட்டும் கட்டணம் வசூலிக்கப்படும் என்று குறிப்பிடப்பட்டுள்ளது. இதற்கு முன்னர், ஏற்கனவே உள்ள பரப்பளவு மற்றும் கூடுதல் பரப்பளவு என இரண்டிற்கும் சேர்த்து மொத்தமாக கட்டணம் வசூலிக்கப்பட்டு வந்த நிலையில், இனி கூடுதல் பரப்பளவிற்கு மட்டும் கட்டணம் செலுத்தினால் போதுமானது என்று மாற்றப்பட்டுள்ளது. இந்த நடைமுறை மாற்றங்கள் பொதுமக்களுக்கும் கட்டுமான நிறுவனங்களுக்கும் பெரும் பயனை அளிக்கும் வகையில் அமையும் என எதிர்பார்க்கப்படுகிறது.

More From Dhinaanjal


no comments
கமெண்ட் செய்ய தொடங்கவும்

ஹேஷ்டேக்ஸ்

#தமிழககட்டிடவிதி
#கட்டுமானத்துறை
#தமிழகஅரசு
#சென்னை
#கட்டிடஅனுமதி
#TamilNaduBuildingRules
#BuildingHeight
#ConstructionNews
#ChennaiRealEstate
#UrbanDevelopment
#Dhinaanjal
#தினஅஞ்சல்
#தினஅஞ்சல் பப்ளிகேஷன்ஸ்
#Dhinaanjalpublications