தமிழ்நாடு பள்ளி மாணவிகளுக்கு இலவச சானிட்டரி நாப்கின்: பள்ளிக்கல்வித்துறை முக்கிய உத்தரவு

தமிழ்நாட்டின் அனைத்துப் பள்ளிகளிலும் மாணவிகளுக்கு இலவச சானிட்டரி நாப்கின் வழங்கும் வெண்டிங் மெஷின்களை நிறுவ பள்ளிக்கல்வித்துறை உத்தரவிட்டுள்ளது.

தமிழ்நாட்டில் உள்ள அனைத்துப் பள்ளிகளிலும் மாணவிகளுக்கு இலவசமாக உயிரியல் ரீதியாக சிதையக்கூடிய மற்றும் மட்கக்கூடிய சானிட்டரி நாப்கின்களை வழங்க பள்ளிக்கல்வித்துறை அதிரடி உத்தரவு பிறப்பித்துள்ளது. இதற்காகப் பள்ளிகளில் மாதவிடாய் சுகாதார மேலாண்மை மையங்கள் அமைக்கப்பட வேண்டும் என்றும், மாணவிகளுக்குத் தடையின்றி நாப்கின்கள் கிடைப்பதை உறுதி செய்ய வேண்டும் என்றும் அறிவுறுத்தப்பட்டுள்ளது. உச்ச நீதிமன்றத்தின் டாக்டர் ஜெயா தாக்கூர் மற்றும் இந்திய ஒன்றியத்திற்கு எதிரான வழக்கின் தீர்ப்புகள் மற்றும் தேசிய மாதவிடாய் சுகாதாரக் கொள்கையின் அடிப்படையில் இந்த நடவடிக்கை மேற்கொள்ளப்பட்டுள்ளது. இதன் மூலம், போதிய சுகாதார வசதிகள் இல்லாத காரணத்தால் மாணவிகள் வகுப்புகளைத் தவறவிடுவது தடுக்கப்படும் என்று எதிர்பார்க்கப்படுகிறது.

இந்த உத்தரவின்படி, ஒவ்வொரு பள்ளியும் தங்களது வளாகத்தில் உள்ள மாணவிகளின் கழிவறைகளில் தானியங்கி வெண்டிங் மெஷின்களை நிறுவ வேண்டும். ஒருவேளை தொழில்நுட்பக் காரணங்களால் வெண்டிங் மெஷின்களை நிறுவ முடியாத சூழல் இருந்தால், பள்ளி நிர்வாகம் மாற்று ஏற்பாடுகளைச் செய்து மாணவிகளுக்கு எவ்விதத் தடையுமின்றி நாப்கின்களை வழங்க வேண்டும். மேலும், பள்ளிக் கழிவறைகள் பாலின வாரியாகப் பிரிக்கப்பட்டு, எப்போதும் தண்ணீர் வசதி, சோப்பு மற்றும் கை கழுவும் வசதிகளுடன் சுத்தமாகப் பராமரிக்கப்பட வேண்டும் என்றும் அறிவுறுத்தப்பட்டுள்ளது. மாற்றுத்திறனாளி மாணவிகளும் எளிதில் அணுகும் வகையில் கழிவறை கட்டமைப்புகள் இருக்க வேண்டும் என்பது கட்டாயமாக்கப்பட்டுள்ளது.

கழிவறை பயன்பாட்டிற்குப் பிறகு நாப்கின்களை முறையாக அப்புறப்படுத்த, ஒவ்வொரு கழிவறை அறையிலும் மூடப்பட்ட குப்பைத் தொட்டிகள் வைக்கப்பட வேண்டும். திடக்கழிவு மேலாண்மை விதிகளின்படி இந்த கழிவுகள் அகற்றப்படுவதை பள்ளி நிர்வாகம் உறுதி செய்ய வேண்டும். தற்போது போதிய துப்புரவுப் பணியாளர்கள் இல்லாத பள்ளிகள், தற்காலிக ஏற்பாடுகளை உடனடியாகச் செய்து சுகாதாரத்தைப் பேண வேண்டும். சுகாதாரமான சூழலை உருவாக்குவதோடு மட்டுமல்லாமல், மாதவிடாய் தொடர்பான விழிப்புணர்வை ஏற்படுத்தவும் தீவிர நடவடிக்கைகள் எடுக்கப்பட உள்ளன.

மாணவிகளுக்கு மாதவிடாய் சுழற்சி, சுகாதாரம் மற்றும் பிசிஓஎஸ் (PCOS) போன்ற இனப்பெருக்க ஆரோக்கியம் சார்ந்த பிரச்சினைகள் குறித்து விழிப்புணர்வு ஏற்படுத்த வேண்டும் என்று தெரிவிக்கப்பட்டுள்ளது. இதற்காக ஆண் மற்றும் பெண் ஆசிரியர்களுக்குத் தகுந்த பயிற்சிகள் அளிக்கப்பட்டு, மாதவிடாய் குறித்த சமூகத் தடைகளை உடைக்கவும், மாணவிகளின் கண்ணியத்தையும் தனிப்பட்ட சுகாதாரத்தையும் பாதுகாக்கவும் பள்ளிகள் செயல்பட வேண்டும். இந்த உத்தரவைச் சிறப்பாகச் செயல்படுத்த அனைத்து மாவட்ட முதன்மைக் கல்வி அலுவலர்களுக்கும் பள்ளிக்கல்வித்துறை சுற்றறிக்கை அனுப்பியுள்ளது.