தமிழக அரசு நிதி ரூ.22 கோடி மோசடி: வங்கி கணக்குகளை பயன்படுத்திய 7 பேர் கைது

தமிழக அரசு நிதியிலிருந்து ரூ.22.3 கோடி மோசடி செய்ததாக 7 பேர் கைது செய்யப்பட்டுள்ளனர்.
தமிழக அரசின் ஊரக வளர்ச்சி மற்றும் ஊராட்சித் துறைக்குச் சொந்தமான வங்கி கணக்கிலிருந்து சுமார் 22.3 கோடி ரூபாய் முறைகேடாகப் பரிமாற்றம் செய்யப்பட்ட சம்பவம் பெரும் பரபரப்பை ஏற்படுத்தியுள்ளது. இந்த மோசடியில் தொடர்புடைய 7 பேர் கொண்ட கும்பலை சென்னை மத்திய குற்றப்பிரிவு போலீசார் அதிரடியாகக் கைது செய்துள்ளனர். இந்த நிதியானது 15-வது நிதிக்குழுவின் சுகாதார மானியத் திட்டத்தின் கீழ், கிராமப்புறங்களில் சுகாதார உள்கட்டமைப்பை மேம்படுத்துவதற்காக ஒதுக்கப்பட்டதாகும். சென்னை சிஐடி நகரில் உள்ள வங்கியொன்றில் பராமரிக்கப்பட்டு வரும் மத்திய அரசின் இந்த நிதியை, அந்தந்த பகுதி வட்டார வளர்ச்சி அலுவலர்களுக்கு வழங்கப்பட்ட இணையவழி உள்நுழைவு அங்கீகாரத்தைப் பயன்படுத்தி சைபர் குற்றவாளிகள் கையாடல் செய்துள்ளனர்.
விசாரணையில், இந்த மோசடியானது கடந்த அக்டோபர் 12 முதல் அக்டோபர் 30 வரையிலான காலகட்டத்தில் நடந்துள்ளது தெரியவந்துள்ளது. நாகப்பட்டினம் மாவட்டம் கீழையூர், ராமநாதபுரம் மாவட்டம் மண்டபம் மற்றும் திருப்பூர் மாவட்டம் தாராபுரம் ஆகிய பகுதிகளில் உள்ள அதிகாரிகளின் இணையவழி கடவுச்சொற்களைப் பயன்படுத்தி, குற்றவாளிகள் சுமார் 25 வெவ்வேறு வங்கி கணக்குகளுக்குத் திட்டமிட்டுப் பணத்தை மாற்றியுள்ளனர். இந்தத் தொகை அரசின் சுகாதாரத் திட்டத்திற்காக வைக்கப்பட்டிருந்த நிலையில், அதனை நூதனமான முறையில் சைபர் மோசடி கும்பல் திருடியுள்ளது.
கைது செய்யப்பட்ட ஏழு பேரும் தனியார் நிறுவனங்களில் பணியாற்றுபவர்கள் என்றும், இவர்கள் தங்களது வங்கி கணக்குகளை மோசடி கும்பலின் பயன்பாட்டிற்காக வாடகைக்கு விட்டுள்ளனர் என்றும் காவல்துறை தரப்பில் தெரிவிக்கப்பட்டுள்ளது. இவர்களது கணக்கிற்கு வரும் பணத்தைப் பெற்று, அதை ரொக்கமாக மாற்றிப் பின்னர் பிற கணக்குகளுக்கு மாற்றும் பணியை இவர்கள் செய்துள்ளனர். இவர்களுக்குப் பிரதிபலனாகக் கமிஷன் தொகை வழங்கப்பட்டுள்ளது. செல்லபாண்டியன், அண்ணாதுரை, லோகநாதன், அப்துல் ரகுமான், ஜெகதீஷ், அஷ்ரப் அலி மற்றும் கண்ணதாசன் ஆகியோரை போலீசார் கைது செய்துள்ளனர். இவர்களிடமிருந்து 7 கைப்பேசிகளும், 14 சிம் கார்டுகளும், வங்கி ஆவணங்களும் கைப்பற்றப்பட்டுள்ளன.
இந்த மோசடியின் பின்னணியில் உள்ள முக்கிய சூத்திரதாரிகளைப் பிடிக்கும் பணியில் போலீசார் தீவிரமாக ஈடுபட்டுள்ளனர். முதல் கட்டமாக கைது செய்யப்பட்ட மூன்று பேர் நீதிமன்றக் காவலில் சிறையில் அடைக்கப்பட்டுள்ளனர். கொள்ளையடிக்கப்பட்ட அரசு நிதியை மீட்கும் முயற்சிகளையும் காவல்துறை மேற்கொண்டு வருகிறது. அரசுத் திட்டங்களுக்காக ஒதுக்கப்பட்ட நிதி இத்தகைய சைபர் குற்றவாளிகளால் திருடப்பட்டிருப்பது குறித்து அரசுத் துறை அதிகாரிகள் கடும் அதிர்ச்சியடைந்துள்ளனர். இனி வரும் காலங்களில் இது போன்ற டிஜிட்டல் பரிமாற்றங்களில் கூடுதல் பாதுகாப்பு நடைமுறைகளைக் கொண்டு வருவது குறித்து ஆலோசனை மேற்கொள்ளப்பட்டு வருகிறது.









