தமிழக அரசு அண்ணன் சீர் திட்டம்: 60,000 மணப்பெண்களுக்கு தங்கம் மற்றும் பட்டுப்புடவை வழங்க ஏற்பாடு

தமிழகத்தில் அண்ணன் சீர் திட்டத்தின்கீழ் 60,000 மணப்பெண்களுக்கு தங்கம் மற்றும் பட்டுப்புடவை வழங்க ரூ.812 கோடி ஒதுக்கீடு செய்யப்பட்டுள்ளது.

தமிழக அரசு செயல்படுத்தி வரும் அண்ணன் சீர் திட்டத்தின் கீழ், தகுதியுள்ள மணப்பெண்களுக்கு தங்கம் மற்றும் உயர்தர பட்டுப்புடவைகளை வழங்க மாநில அரசு அதிரடி முடிவை எடுத்துள்ளது. 2026-27 ஆம் நிதியாண்டிற்காக சுமார் 812 கோடி ரூபாய் நிதி ஒதுக்கீடு செய்யப்பட்டு, இத்திட்டத்தின் மூலம் 60,000 மணப்பெண்கள் பயனடைவார்கள் என்று அறிவிக்கப்பட்டுள்ளது. நீண்ட இடைவெளிக்குப் பிறகு, மணப்பெண்களுக்கு தங்க நாணயங்கள் வழங்கும் முறை மீண்டும் அறிமுகப்படுத்தப்படுவது குறிப்பிடத்தக்கது.

சமூக நலன் மற்றும் மகளிர் உரிமைத் துறை வெளியிட்டுள்ள டெண்டர் ஆவணங்களின்படி, ஒரு பயனாளிக்கு தலா 1.35 லட்சம் ரூபாய் மதிப்புடைய தங்கம் மற்றும் பட்டுப்புடவை வழங்கப்பட உள்ளது. இதில் வழங்கப்படவுள்ள தங்க நாணயங்கள் 916 சுத்தத்தன்மை கொண்டதாகவும், இந்திய தர நிர்ணய அமைப்பின் (BIS) ஹால்மார்க் முத்திரையைப் பெற்றிருப்பதை உறுதி செய்ய வேண்டும் என்றும் தெரிவிக்கப்பட்டுள்ளது. தங்க நாணயத்தின் ஒரு பக்கத்தில் மாநில அரசு முத்திரையும், மறுபக்கத்தில் அதன் எடை மற்றும் தூய்மை குறித்த விவரங்களும் பொறிக்கப்பட வேண்டும் என்பது அரசின் கட்டாய நிபந்தனையாகும்.

பட்டுப்புடவைகளின் தரத்தில் அரசு மிகுந்த கவனம் செலுத்தியுள்ளது. இவை 100 சதவீதம் தூய மல்பெரி பட்டு நூலால் நெய்யப்பட்டிருக்க வேண்டும் என்றும், ஒரு புடவையின் மொத்த எடையில் 380 கிராம் பட்டு இருக்க வேண்டும் என்றும் குறிப்பிடப்பட்டுள்ளது. புடவையின் கரை மற்றும் இதர அலங்கார வேலைப்பாடுகளுக்கு மட்டுமே 100 சதவீத பாலியஸ்டர் கலந்த நூல்கள் பயன்படுத்தப்பட வேண்டும். புடவையின் மொத்த நீளம் 6.2 மீட்டராகவும், அதன் மொத்த எடை 430 கிராமிற்கு மிகாமலும் இருக்க வேண்டும் என்று நெறிமுறைகள் வகுக்கப்பட்டுள்ளன.

இத்திட்டத்தின் பலனைப் பெற மணப்பெண்களின் குடும்ப ஆண்டு வருமானம் 2.5 லட்சம் ரூபாய்க்குள் இருக்க வேண்டும் என்ற வரம்பு நிர்ணயிக்கப்பட்டுள்ளது. மேலும், தமிழகத்தைச் சேர்ந்தவர்களாகவும், தமிழகத்தில் திருமணம் நடைபெறுபவர்களாகவும் இருக்க வேண்டும் என்பது அடிப்படைத் தகுதியாகும். அதிமுக ஆட்சிக்காலத்தில் நடைமுறையில் இருந்த தாலிக்குத் தங்கம் திட்டத்தின் மேம்படுத்தப்பட்ட வடிவமாகவே தற்போது இந்த அண்ணன் சீர் திட்டம் செயல்படுத்தப்படுகிறது. பல்வேறு சூழல்களால் முந்தைய திட்டத்தில் ஏற்பட்ட தொய்வுகளைத் தவிர்த்து, முறையாக இந்தத் திட்டத்தை முன்னெடுத்துச் செல்ல அரசு நிர்வாகம் திட்டமிட்டுள்ளது.