தமிழ்நாடு முழுவதும் 300 புதிய அங்கன்வாடி மையங்கள்: அரசு அதிரடி அறிவிப்பு

தமிழ்நாட்டில் நகர்ப்புறங்களில் 300 புதிய அங்கன்வாடி கட்டிடங்கள் மற்றும் செயற்கை நுண்ணறிவு மூலம் கல்வி வீடியோக்கள் உருவாக்கப்படும் என்று அரசு அறிவித்துள்ளது.

தமிழ்நாட்டில் உள்ள அங்கன்வாடி மையங்களின் உள்கட்டமைப்பை மேம்படுத்துவதற்கும், குழந்தைகள் மற்றும் முதியோர்களின் நலனை உறுதி செய்வதற்கும் சமூக நலத்துறை பல்வேறு முக்கிய அறிவிப்புகளை வெளியிட்டுள்ளது. சட்டப்பேரவையில் சமர்ப்பிக்கப்பட்ட மானியக் கோரிக்கையின் அடிப்படையில், மாநிலம் முழுவதும் நகர்ப்புறங்களில் 300 புதிய அங்கன்வாடி மையங்களை உருவாக்குவதற்கு 51 கோடி ரூபாய் நிதி ஒதுக்கீடு செய்யப்பட்டுள்ளது. மேலும், தற்போது ஆஸ்பெஸ்டாஸ் கூரைகளின் கீழ் இயங்கி வரும் 1,662 அங்கன்வாடி மையங்களுக்குப் பதிலாக, தரமான PUF பேனல் கூரைகளை அமைப்பதற்கு 66.48 கோடி ரூபாய் நிதி ஒதுக்கப்பட்டுள்ளது. இந்த நடவடிக்கைகள் மூலம் குழந்தைகளின் கற்றல் சூழலும் பாதுகாப்பும் மேம்படுத்தப்படும் என்று எதிர்பார்க்கப்படுகிறது.

கல்வித் துறையில் புதிய தொழில்நுட்பங்களைப் புகுத்தும் வகையில், இரண்டு முதல் ஐந்து வயது வரையிலான குழந்தைகளுக்காக செயற்கை நுண்ணறிவு (AI) தொழில்நுட்பம் சார்ந்த கல்வி வீடியோக்களை உருவாக்கவும் திட்டமிடப்பட்டுள்ளது. அமைச்சர் கே. ஜெகதீஸ்வரி அறிவித்த இந்த திட்டத்தின்படி, முன்னோடி முயற்சியாக 50 வட்டாரங்களில் உள்ள ஒரு லட்சம் குழந்தைகளுக்கு ஐந்து கோடி ரூபாய்க்கும் அதிகமான மதிப்பீட்டில் கற்றல் உபகரணங்கள் வழங்கப்படும். அதேபோல், நான்கு முதல் ஐந்து வயது வரையிலான சுமார் 2.70 லட்சம் குழந்தைகளுக்குப் பயிற்சிப் புத்தகங்கள் மற்றும் செயல்பாட்டு புத்தகங்கள் வழங்கப்பட உள்ளன. மேலும், ரத்த சோகையைத் தடுக்கும் நோக்கில் 12 மாவட்டங்களில் உள்ள 5,502 பள்ளிகளில் பயிலும் 4.42 லட்சம் மாணவர்களுக்குச் சிறப்பு ஊட்டச்சத்து திட்டத்தைச் செயல்படுத்த 38 கோடி ரூபாய் ஒதுக்கப்பட்டுள்ளது.

முதியோர்களின் நலனைக் கருத்தில் கொண்டு, தமிழகத்தின் அனைத்து 38 மாவட்டங்களிலும் ஒருங்கிணைந்த சேவை மையங்கள் அமைக்கப்பட உள்ளன. இந்த மையங்களின் மூலம் முதியோர் நலத் திட்டங்கள் குறித்த தகவல்கள், வழிகாட்டுதல் மற்றும் ஆலோசனை சேவைகள் ஒரே இடத்தில் கிடைக்கும். அரசு உதவி பெறும் 65 முதியோர் இல்லங்களில் படுக்கையில் இருக்கும் முதியவர்கள் மற்றும் நீண்டகால நோயால் பாதிக்கப்பட்டவர்களுக்காக பிசியோதெரபி மற்றும் வலி மேலாண்மை சேவைகள் வழங்கப்பட உள்ளன. மேலும், அரசு மற்றும் தனியார் பங்களிப்புடன் நவீன முதியோர் இல்லங்களை அமைக்க 14.5 கோடி ரூபாய் நிதி ஒதுக்கப்பட்டுள்ளது.

குழந்தைகள் மற்றும் விளிம்புநிலை மக்களின் பாதுகாப்பு குறித்த முக்கிய அறிவிப்புகளையும் அரசு வெளியிட்டுள்ளது. குறிப்பாக, குழந்தைகளுக்கு எதிரான பாலியல் குற்றங்களைத் தடுக்கும் வகையில் 'போக்சோ' (POCSO) இணையதளம் 2.0 அறிமுகம் செய்யப்பட உள்ளது. மேலும், குழந்தை உதவி மையமான 1098 எண்ணை வலுப்படுத்தும் விதமாக, ஏழு கூடுதல் அழைப்பு முனையங்கள் மற்றும் பிரத்யேக அலைபேசி செயலி உருவாக்க 41 லட்சம் ரூபாய் ஒதுக்கப்பட்டுள்ளது. திருநங்கைகளுக்கான நலத் திட்டங்களை ஒரே இடத்தில் வழங்கும் வகையில் ஒற்றைச் சாளர முறை நடைமுறைப்படுத்தப்படும் என்றும் சமூக நலத்துறை தெரிவித்துள்ளது.