தமிழகத்தில் 50,000 புதிய விவசாய மின் இணைப்புகள்: ரூ.127 கோடி மானியம் வழங்க அரசு அனுமதி

தமிழகத்தில் 2026-27 ஆம் நிதியாண்டில் 50,000 புதிய விவசாய மின் இணைப்புகளை வழங்க தமிழக அரசு உத்தரவிட்டுள்ளது.

தமிழகத்தில் விவசாயிகளின் நலனைக் கருத்தில் கொண்டு, 2026-27 ஆம் நிதியாண்டில் மொத்தம் 50,000 புதிய விவசாய மின் இணைப்புகளை வழங்க தமிழ்நாடு மின் உற்பத்தி மற்றும் பகிர்மான கழகத்திற்கு (TANGEDCO/TNPDCL) தமிழக அரசு அதிகாரப்பூர்வமாக உத்தரவிட்டுள்ளது. இதற்கான நிர்வாக அனுமதியை எரிசக்தித் துறை அக்டோபர் 23 அன்று வெளியிட்ட அரசாணையின் மூலம் உறுதிப்படுத்தியுள்ளது. இந்தத் திட்டத்தைச் செயல்படுத்துவதற்காக, recurring எனப்படும் தொடர் செலவினங்களுக்காக சுமார் 127.56 கோடி ரூபாயை மானியமாக வழங்கவும் தமிழக அரசு ஒப்புதல் அளித்துள்ளது.

இந்த புதிய மின் இணைப்புகள் பல்வேறு பிரிவுகளின் கீழ் பிரித்து வழங்கப்பட உள்ளன. இதில் பொதுப்பிரிவு, சுயநிதித் திட்டம் மற்றும் தட்கல் திட்டம் ஆகிய பிரிவுகள் அடங்கும். ஒட்டுமொத்த இலக்கான 50,000 இணைப்புகளில், 20,000 இணைப்புகள் சாதாரண பிரிவின் கீழ் வழங்கப்பட உள்ளன. இதில் பிற்படுத்தப்பட்டோர், மிகவும் பிற்படுத்தப்பட்டோர் மற்றும் சீர்மரபினர் இனத்தைச் சேர்ந்த சிறு மற்றும் குறு விவசாயிகளுக்கு முன்னுரிமை அடிப்படையில் 3,215 இணைப்புகள் ஒதுக்கீடு செய்யப்பட்டுள்ளன. இதுதவிர, மேம்படுத்தப்பட்ட சுயநிதித் திட்டத்தின் கீழ் 3,372 இணைப்புகளும், தட்கல் திட்டத்தின் கீழ் அதிகபட்சமாக 25,282 மின் இணைப்புகளும் வழங்கப்படும் என்று தெரிவிக்கப்பட்டுள்ளது.

மீதமுள்ள 1,346 மின் இணைப்புகள் பல்வேறு அரசுத் திட்டங்கள், சிறப்புக் கவனம் தேவைப்படும் பிரிவுகள் மற்றும் நாடாளுமன்ற அல்லது சட்டமன்ற உறுப்பினர்களின் பரிந்துரைகளின் அடிப்படையில் வழங்கப்பட உள்ளன. மேலும், கடந்த ஏப்ரல் 1 முதல் செப்டம்பர் 21 வரையிலான இடைப்பட்ட காலத்தில், அதிகாரப்பூர்வ அரசாணை வருவதற்கு முன்பாகவே தமிழ்நாடு மின் உற்பத்தி மற்றும் பகிர்மான கழகத்தால் ஏற்கனவே வழங்கப்பட்ட 7,313 விவசாய மின் இணைப்புகளையும் இந்த நடப்பு ஆண்டு இலக்கான 50,000 உடன் சேர்த்து கணக்கிடவும் அரசு அனுமதி வழங்கியுள்ளது.

இந்த மின் இணைப்புகளை வழங்குவதற்கான ஆரம்பக்கட்ட மற்றும் நிரந்தரமற்ற செலவினங்களான 750 கோடி ரூபாயை தமிழ்நாடு மின் உற்பத்தி மற்றும் பகிர்மான கழகமே ஏற்கும் என்று அறிவிக்கப்பட்டுள்ளது. அதேநேரத்தில், மின் கொள்முதல் செலவுகள் மற்றும் கழகத்தின் தற்போதைய நிதி நிலையை கருத்தில் கொண்டு, ஏற்கனவே வழங்கப்பட்டுள்ள விவசாய மின் இணைப்புகள் முறையான பயன்பாட்டிற்கு மட்டுமே பயன்படுத்தப்படுகின்றனவா என்பதை உறுதிப்படுத்துமாறும், தவறான பயன்பாடுகளை கண்டறிய முறையான ஆய்வுகளை மேற்கொள்ளுமாறும் மின்வாரியத்திற்கு அரசு அறிவுறுத்தியுள்ளது.